Luka 3 - Библия - Пэ Балтитко Романи чиб (Романэс) 2019

Иано́скирэ-Болдэипнари́скиро Пхэныбэ́н

¹ Дро дэшупанджто бэрш, ке́ли Тивериё сыс кхенинго (кесарё), а Понтиё Пила́то сыс балунитко (правителё) пэ Юдэ́я, а Иродо сыс хула́й пэ Галиле́я, Лэ́скиро пшал Филипо сыс хула́й пэ Итурея и Трахонитоскири пхув, а Лисаниё хулаиндя пэ Авилинея;

² и ке́ли Анна и Каиа́фа сыс раша́нгирэ барыдыра́, явдя́ Дэвлэ́скиро лав Ианоскэ, Захариескирэ чхавэ́скэ пэ чхучи́ пхув.

³ И ёв явдя́ пэ пхув пашы́л рэка (лэнь) Иорда́но, сыклякири манушэ́н тэ болэнпэ тэ сыкавэ́н, со ёнэ рискирдэ́ пэ́скиро джиибэ́н кэ Дэвэ́л, соб (кай) Ёв тэ отмэкэ́л грэ́хи.

⁴ Сыр исын чхиндло́ дрэ Исаёскирэ-пророкоскири лылвари́, саво́ раки́рла: “Ѓа́да, исын зан, сави́ дэ́ла го́дла пэ чхучи́ пхув: ‘Кэрэ́н дром Ра́скэ-Дэвлэ́скэ, чхувэ́н Лэ́скэ маму́й дром;

⁵ кажно до́ло тэ явэ́л пхэрдо́, кажно бэ́рга и бэ́ргица тэ явэ́н тэлэды́р, кажно бангипэн тэ явэ́л роўно и бангэ́ дрома́ тэ явэ́н гладка;

⁶ кажно лоч тэ уджинэл пал Дэвлэ́скиро зракхибэ́н.’”

⁷ Иа́но ж ракирдя́ бутэ́ манушэ́нгэ, савэ́ явэ́нас тэ болэнпэ кэ ёв: тумэ́ сан сапитко ро́до! Кон сыклякирдя́ тумэн тэ нашэ́н Дэвлэ́скирэ холя́тыр, со явэ́ла сыг?

⁸ Кэрэ́н вари-со, соб (кай) тэ явэ́л мол, со тумэ́ мэкнэ́ тэ кэрэ́н грэ́хи и рискирдэ́ пэ́скиро джиибэ́н кэ Дэвэ́л, и на думинэн тэ ракирэ́н пэ́скэ: ‘Авраа́мо исын дад амаро́’, пал-дова́ со мэ ракира́ва тумэ́нгэ, со Дэвэ́л могинэ́ла далэндыр барэндыр тэ ґаздэ́н чхаворэ́н Авраамо́скэ;

⁹ ґа́да, ужэ товэр исын пашто́ пашы́л каштэскиро корнё (рукх), кажно кашт, со на дэ́ла лачхо́ барьякирдо́ (пло́до), чингирэна тэлэ́ и чхурдэна дрэ яг.”

¹⁰ Мануша́ пхучнэ́ Лэ́стыр: “Со ж амэ́нгэ тэ кэра́с?”

¹¹ И Иа́но отпхэндя́ лэ́нгэ: “Конэ́стэ исын дуй ґа́да, тэ дэл екх одолэ́скэ, конэ́стэ нанэ; и конэ́стэ исын хабэ́н, тэ кэрэ́л адя́кэ-паць.”

¹² И мытоскирэ скэдыибнарья явнэ́ тэ болэнпэ и пхэндлэ́ Лэ́скэ: “Сыклякирибна́скиро! Со амэ́нгэ тэ кэра́с?”

¹³ “На лэн бутэды́р ловэ́, сыр тумэ́нгэ сашты́ (домэкно) тэ лэн пир Зако́но.”

¹⁴ Вари-савэ́ халадэ́ адя́кэ-паць пхучнэ́ Лэ́стыр: “А со ж амэ́нгэ тэ кэра́с?” Ёв пхэндя́ халадэнгэ: “На отлэн зорья́са никонэстыр, и на бангякирэн никонэ́с хоханэ́с. Явэ́н ра́да далэскэ, со тумэ́нгэ плэскирэна.”

¹⁵ Нэ пал-дова́ со мануша́ ужакирдэ и думиндлэ дро пэ́скиро ило́, со, хоби, Иа́но исын Кокоро́ Христо́со,

¹⁶ Иа́но тэды отпхэндя́ сарэ́нгэ: “Мэ болава тумэн пане́са, нэ пал ма́ндэ джа́ла Одова́, Кон исын зоралэды́р ма́ндыр, со мэ на сом мол аж тэ роспхандав симирья Лэ́скирэ ґэритконэндыр, Ёв явэ́ла тэ болэл тумэн Свэнтонэ́ Духо́са и яга́са;

¹⁷ Лэ́скиро ґанадытко (лопата) исын дро Лэ́скиро васт, и Ёв жужакирэла Пэ́скири шу́рна и скэдэ́ла парно́ гив дрэ Пэ́скири пиралы́, а пхус хачкирэ́ла яга́са, сави́ на мурдёла.”

¹⁸ И бут яви́р ёв сыклякирдя́ манушэ́н, и роспхэндя́ бахталы́ зан (звесь).

¹⁹ Ёв, Иа́но, адя́кэ-паць выракирдя Иродоскэ, саво́ сыс балунитко (тетрархо) пэ доя́ пхув, пал-дова́ со Иродо лыя́ палоро́м Иродиада, пэ́скирэ-пшалэ́скирэ ромня́ и пал яви́р налачхэ́ лэ́скирэ рэ́нды;

²⁰ а Иродо ишчо (инкэ́) буты́р кэрдя́ чорипэ́н: ёв чхудя́ Ианос дро штарибэ́н.

Христосо́скиро Болдэипэ́н

²¹ И сыс адя́кэ: ке́ли сарэ́ мануша́ болдэпэ, и Ису́со тэж болдяпэ и мангдя́пэ, болыбэ́н отчхакирдяпэ,

²² и Свэ́нто Ду́хо (Фа́но) згия пэ Лэ́стэ дро дыцьлы патри́н (о́бразо) сыр голумбо, и сыс зан болыбна́стыр, сави́ ракирдя́: “Ту сан Миро дро́го Чхаво́, дрэ Ту́тэ исын бари Мири́ ра́дыма!”

Христосо́скиро Ро́до

²³ Ке́ли Ису́со лыя́ тэ кэрэ́л Дэвлэ́скири буты́, Лэ́скэ сыс трия́нда бэрш; и, сыр мануша́ думиндлэ, Ёв сыс Ёзаскиро (Иосифоскиро) Чхаво́,

²⁴ а Ёза сыс Илияскиро чхаво́, Или́я сыс Матфатоскиро чхаво́, Матфато сыс Левиёскиро чхаво́, Левиё сыс Мелхиёскиро чхаво́; Мелхиё сыс Ианаёскирэ чхаво́; Ианаё сыс Ёзаскиро чхаво́;

²⁵ Ёза сыс Матафиёскиро чхаво́, Матафиё сыс Амососкиро чхаво́, Амосо сыс Наумоскиро чхаво́; Наумо сыс Еслимоскиро чхаво́; Еслимо сыс Нагеёскиро чхаво́;

²⁶ Нагеё сыс Маафоскиро чхаво́; Маафо сыс Матафиескиро чхаво́; Матафиё сыс Семеиноскиро чхаво́; Семеино сыс Ёзаскиро чхаво́; Ёза сыс Юда́скиро чхаво́;

²⁷ Юда сыс Ёананоскиро чхаво́; Ёанано сыс Рисаёскиро чхаво́; Рисаё сыс Зоровавелёскиро чхаво́; Зоровавелё сыс Салафиилёскиро чхаво́; Салафиилё сыс Нириёскиро чхаво́;

²⁸ Нириё сыс Мелхиёскиро чхаво́; Мелхиё сыс Адиёскиро чхаво́; Адиё сыс Касамоскиро чхаво́; Касамо сыс Елмадоскиро чхаво́; Елмадо сыс Ироскиро чхаво́;

²⁹ Иро сыс Иосия́скиро чхаво́; Иосия сыс Елиезэроскиро чхаво́; Елиезэро сыс Иоримоскиро чхаво́; Иоримо сыс Матфатоскиро чхаво́; Матфато сыс Левиёскиро чхаво́;

³⁰ Левиё сыс Симеоноскиро чхаво́; Симеоно сыс Юда́скиро чхаво́; Юда сыс Ёзаскиро (Иосифоскиро) чхаво́; Ёза сыс Ёнаноскиро чхаво́; Ёнано сыс Елиакимоскиро чхаво́;

³¹ Елиакимо сыс Мелеаёскиро чхаво́; Мелеаё сыс Маинаноскиро чхаво́; Маинано сыс Матафиёскиро чхаво́; Матафиё сыс Нафаноскиро чхаво́; Нафано сыс Давидо́скиро чхаво́;

³² Дави́до сыс Есеёскиро чхаво́; Есеё сыс Авидо́скиро чхаво́; Авидо сыс Ваозо́скиро чхаво́; Вао́зо сыс Салмоно́скиро чхаво́; Салмано сыс Наасоно́скиро чхаво́;

³³ Наасо́но сыс Аминадаво́скиро чхаво́; Аминада́во сыс Админоскиро чхаво́; Админо сыс Арниёскиро чхаво́; Арниё сыс Эсромо́скиро чхаво́; Эсро́мо сыс Фаресо́скиро чхаво́; Фаре́со сыс Юда́скиро чхаво́;

³⁴ Юда сыс Яково́скиро чхаво́; Яково сыс Авраамо́скиро чхаво́; Авраа́мо сыс Фариёскиро чхаво́; Фариё сыс Нахороскиро чхаво́;

³⁵ Нахоро сыс Серухоскиро чхаво́; Серухо сыс Рагавоскиро чхаво́; Рагаво сыс Фалекоскиро чхаво́; Фалеко сыс Евероскиро чхаво́; Еверо сыс Салиёскиро чхаво́;

³⁶ Салиё сыс Каинаноскиро чхаво́; Каинано сыс Арфаксадоскиро чхаво́; Арфакеадо сыс Симоскиро чхаво́; Симо сыс Ноёскиро чхаво́; Ноё сыс Ламехоскиро чхаво́; Ламехо сыс Мафусаилоскиро чхаво́;

³⁷ Мафусаило сыс Енохоскиро чхаво́; Енохо сыс Иаредоскиро чхаво́; Иаредо сыс Малелеилоскиро чхаво́; Малелеило сыс Каиноскиро чхаво́;

³⁸ Каино сыс Енососкиро чхаво́; Еносо сыс Сифоскиро чхаво́; Сифо сыс Адамоскиро чхаво́; Адамо сыс Дэвлэ́скиро чхаво́.