Luka 2 - Библия - Пэ Балтитко Романи чиб (Романэс) 2019

Сыр Христо́со Бия́ндыя

¹ Дрэ долэ́ дывэса́ Римоскиро кхенинго (кесарё) Аўгусто дыя́ упхэныбэ́н тэ пиригинэн сарэ́ манушэ́н, савэ́ сыс пир сари́ пхув.

² Дава́ сыс пэ́рво пиригиныбэ́н и лэс кэрэ́нас дро дова́ часо, ке́ли о Квиринеё сыс Сириякирэ-тхэмэскиро барыдыро́.

³ Кажнонэ́скэ трэиндя́ тэ явэ́л дро пэ́скиро фо́ро ваш пиригиныбэ́н.

⁴ И Ёза (Иосифо) адя́кэ-паць гия́ Назаретостыр, саво́ исын дрэ Галиле́я кэ Юдэ́я дро фо́ро Вифлеэмо, саво́ кхарлапэ адя́кэ-паць “Давидо́скиро фо́ро”, пал-дова́ со ёв сыс Давидо́скирэ манушэ́ндыр и родо́стыр,

⁵ тэ зачхинэлпэ Марияса, Сави́ гиндяпэ лэ́скэ сыр ромны́, и Сави́ сыс пхари́.

⁶ И сыс адя́кэ: пака ёнэ сыс одо́й, явдя́ Ла́кэ дывэ́с тэ биянэ́л,

⁷ и Ёй бияндя́ Пэ́скирэ Пэрвонэ́ Чхавэ́с, и патькирдя Лэс дрэ пхэрнэ, и чхудя́ Лэс дрэ ясла (кхурлы), пал-дова́ со на сыс лэ́нгэ штэ́то дро затрадыпнытко кхэр (гостиница).

Чхупна́рья и Янго́лы

⁸ Сыс чхупна́рья (пастухи) пэ кодоя риг пэ фэ́лда, и ракхэнас раты́ пэ́скиро гурто.

⁹ И екха́тыр (сра́зу) Дэвлэ́скиро Янго́ло явдя́ анги́л лэ́ндэ, и Дэвлэ́скири сла́ва сыр ягуно дуд (свэ́то) засвэнцындя пашы́л лэ́ндэ; и пыя́ пэ лэ́ндэ бари дар.

¹⁰ И Янго́ло пхэндя́ лэ́нгэ: “На дарэ́н, мэ пхэна́ва тумэ́нгэ лачхо́ нэвипэн пал бари ра́дыма ваш сарэ́ манушэ́нгэ.

¹¹ Ададывэ́с дро Давидо́скиро фо́ро бия́ндыя тумэ́нгэ Зракхибнари, саво́ исын Христо́со, Рай Дэвэ́л.

¹² И, ґа́да, тумэ́нгэ знако (шпэ́ра): тумэ́ латхэ́на Тыкнэ́ Биятос патькирдэс дрэ пхэрнэ, и Ёв явэ́ла дрэ ясла.”

¹³ И екха́тыр сыкадынэ бут болыбны́тка халадыбэна (Янго́лы) кхэтанэ́ далэ́ Янголоса; ёнэ шарэнас Дэвлэ́с и ракирэ́нас:

¹⁴ “Тэ славинэлпэ Дэвэ́л дрэ упратунэ болыбэна, и тэ явэ́л рама́нё (миро) пэ пхув машки́р манушэ́ндэ, савэ́ндыр Дэвэ́л радынэ́лапэ.”

Чхупна́рья дро Вифлее́мо

¹⁵ И сыс адя́кэ: ке́ли Янго́лы гинэ́ криг лэ́ндыр пэ болыбэ́н, то чхупна́рья пхэндлэ́ екх екхэ́скэ: “Явэ́н дро Вифлее́мо тэ дыкхас, со одо́й кэрдя́пэ, пал со сыс дава́ нэвипэн Ра́стыр-Дэвлэ́стыр амарэстыр.”

¹⁶ И ёнэ сы́гэс явнэ́, и латхнэ́ Мари́я и Ёзас (Иосифос) и Тыкнэ́ Биятос, Саво́ сыс пашто́ дрэ ясла (кхурлы).

¹⁷ Ке́ли ёнэ дыкхнэ́ дава́, ёнэ роспхэндлэ́ пал дова́, со сыс пхэндло́ лэ́нгэ пал далэ́ Тыкнэ́ Биятостэ.

¹⁸ И сарэ́, кон шундлэ́ дава́, дивиндлэ́пэ пэ дова́, со лэ́нгэ чхупна́рья пхэндлэ́.

¹⁹ Нэ Мари́я рипирэлас сарэ́ далэ́ лава́, и думинэлас пал лэ́ндэ хор дро Пэ́скиро ило́.

²⁰ И чхупна́рья рисинэ́ палэ шарэнас и парикирэнас Дэвлэ́скэ пал саро́, со ёнэ шундлэ́ и дыкхнэ́ адя́кэ, сыр лэ́нгэ сыс пхэндло́.

Исусо́скэ Дэ́на Лав

²¹ И ке́ли прогинэ́ охто́ (бидуе́нгиро дэш) дывэса́, соб (кай) тэ обчхинэн Тыкнэ́ Биятос, дынэ́ Лэ́скэ лав Ису́со, лав, саво́ дыя́ Янго́ло анги́л дава́, сыр Лэ́скири Дай яця́ пхари́ Лэ́са.

²² И ке́ли прогинэ́ (накхлэ) дывэса́, савэ́ сыс на жужэ́ пир Мойза́скиро Зако́но, ёнэ яндлэ́ лэс тэ свэнцякирэн (тэ сыкавэ́н и тэ чхувэ́н дрэ риг Лэс) анги́л Дэвлэ́стэ,

²³ сыр исын чхиндло́ дро Дэвлэ́скиро Зако́но: “Кажно муршоро, саво́ выджа́ла да́кирэ лочовя́тыр (утробатыр), тэ явэ́л свэнцякирдо ваш Дэвлэ́скэ”,

²⁴ соб (кай) тэ янэ́н свэ́нто дыибэ́н (жэртва), сыр исын пхэндло́ дро Дэвлэ́скиро Зако́но, дуе́н голумбицэн ци дуе́н голумбэнгирэ тыкнорэн.

Симеоно (Семёно) Дыкхэ́ла и Бахтякирэ́ла Исусо́с дрэ Кхангири́

²⁵ И, ґа́да, сыс ману́ш, савэ́с кхардэ́ Симеоно; ёв сыс чачуно́ ману́ш и дарэлас Дэвлэ́стыр; ёв ужакирэлас, ке́ли явэ́ла Израилёскиро Зракхибнари, и Ду́хо (Фа́но) Свэ́нто сыс пэ лэ́стэ.

²⁶ И Ду́хо (Фа́но) Свэ́нто откэрдя джиныбэ́н Лэ́скэ, со ёв на мэрэ́ла, пака ёв дыкхэ́ла Дэвлэ́скирэ Христосо́с.

²⁷ Ду́хо (Фа́но) лыджия́ лэс и яндя́ дрэ Кхангири́. И ке́ли дад и дай яндлэ́ Биятос Исусо́с, соб (кай) тэ кэрэ́н ваш Лэ́скэ дова́, со трэй пир Зако́но,

²⁸ то Симеоно лыя́ Лэс пэ васта́, парикирдя Дэвлэ́скэ и пхэндя́:

²⁹ “Какана́, Раё, Ту отмэкэса Пэ́скирэ писхари́с, пир Лав Тыро́ раманёса (миро́са).

³⁰ Пал-дова́ со Мирэ́ якха́ дыкхнэ́ Тыро́ зракхибэ́н,

³¹ Саво́ Ту приготовиндян анги́л сарэ́ манушэ́ндэ,

³² Ёв явэ́ла сыр Дуд (Свэ́то) тэ откэрэл Тыри́ во́ля ваш Наюдэ́нгэ. Ёв янэ́ла сла́ва Тырэ́ манушэ́нгэ, Израилёскэ.”

³³ Нэ о Ёза, и Биятоскири Дай дивиндлэ́пэ пэ дова́, со сыс пхэндло́ пал Лэ́стэ.

³⁴ Симеоно бахтякирдя́ лэн и пхэндя́ Мариякэ, Дакэ Лэскирьякэ: “Пал Лэ́стэ бут мануша́ Израилёстыр пэрэ́на и ґаздэ́напэ сыр бахталэ́, Ёв явэ́ла сы́рбы ґерты́к (знако) Дэвлэ́стыр, пал Конэ́стэ мануша́ явэ́на тэ ракирэ́н холя́са;

³⁵ и курта́ла (мечо) промарэла тыро́ ило́, соб (кай) тэ откэрэнпэ ґарадэ́ ду́мы.”

³⁶ Ада́й сыс адя́кэ-паць Анна, пророчица, Фануилоскири чхай, Асироскирэ родо́стыр, сави́ додживдя кэ пхуранэ́ бэрша́ и дживдя́ пэ́скирэ ромэса фэ́ни эфта́ бэрш, сыр ёй гия́ палоро́м.

³⁷ Далэ́ пивлякэ (удовакэ) сыс охтодэша́ штар бэрш; ёй на джа́лас Кхангирья́тыр и дынариндя́ Дэвлэ́скэ постоса и мангипнаса Дэвлэ́скэ.

³⁸ Дрэ дова́-паць мардо́ (шту́нда) ёй подги́я и славиндя Дэвлэ́с, и ракирдя́ пал Чхаворэстэ сарэ́нгэ, кон ужакирдя выракхибэн дро Израилё.

Рисибэ́н дро Назаре́то

³⁹ И ке́ли Ёза и Мари́я кэрдэ́ саро́ пир Дэвлэ́скиро Зако́но, ёнэ рисинэ́ дро лэ́нгиро фо́ро Назарето дрэ Галиле́я.

⁴⁰ Бия́то барьёлас и зоралёлас, ячэласпэ ўса годьварэдыр; и Дэвлэ́скиро бахтылэн сыс пэ Лэ́стэ.

⁴¹ Со бэрш дад и дай Лэ́скирэ джа́нас кэ Ерусалимо пэ Свэ́нко Патради́.

⁴² И ке́ли Лэ́скэ сыс дэшуду́й бэрш, ёнэ явнэ́ пэ свэ́нко, сыр лэн сыклякирдэ́.

⁴³ Ке́ли свэнкоскирэ дывэса́ кончындлэпэ, ёнэ рисёнас кхэрэ́, нэ Тэрнэ́-Бэршэнгиро Ису́со яця́пэ дро Ерусалимо, а Лэ́скирэ дада́ на дыкхнэ́ дава́;

⁴⁴ а ёнэ думиндлэ, со Ёв джа́ла явирэнца, нэ сыр ёнэ прогинэ́ (накхлэ) дывэсэскиро дром, лынэ́ тэ родэ́н Лэс машки́р сэмэнцэндэ и джиндлэндэ (пинджкирдэндэ),

⁴⁵ и пал-дова́ со ёнэ на латхнэ́ Лэс, то ёнэ рисинэ́ дро Ерусалимо тэ родэ́л Лэс.

⁴⁶ Пэ три́то дывэ́с ёнэ латхнэ́ Лэс дрэ Кхангири́, кай Ёв сыс бэшто́ машки́р сыклякирдэндэ: Ёв шунэлас лэн и пхучэлас Лэ́ндыр.

⁴⁷ Сарэ́, кон шундя́ Лэс, дивиндлэ́пэ пэ Лэ́скири годы́ и пэ дова́, сыр Ёв отпхэнэ́лас.

⁴⁸ Ке́ли Лэ́скирэ дада́ дыкхнэ́ Лэс, ёнэ здивиндлэпэ, и Лэ́скири Дай пхэндя́ Лэ́скэ: “Мро Чха́воро! Со Ту кэрдя́н амэ́нгэ? Ѓа́да, Тыро́ дад и Мэ барэ́ дукхаса родыям Тут.”

⁴⁹ Ёв пхэндя́ лэ́нгэ: “Ваш со тумэ́нгэ трэиндя́ тэ родэ́н Ман? Ци на джинэнас тумэ́, со Ма́нгэ трэй тэ явав тэ кэра́в Мирэ́-Дадэ́скиро рэ́ндо.”

⁵⁰ Нэ ёнэ на ґалынэ́ лава́, со Ёв пхэндя́ лэ́нгэ.

⁵¹ И Ису́со гия́ лэ́нца и явдя́ дро Назарето, и Ёв зоралэ́с кандэлас лэн. А Лэ́скири Дай рипирдя сарэ́ кадалэ́ лава́ дро Пэ́скиро ило́.

⁵² И Ису́со ячэласпэ годьварэдыр и барьёлас дро ла́ска Дэвлэ́стыр и манушэ́ндыр.