Luka 11 - Библия - Пэ Балтитко Романи чиб (Романэс) 2019

Ису́со Сыклякирэ́ла тэ Мангэ́лпэ Дэвлэ́скэ Дадэ́скэ

¹ И сыс адя́кэ: ке́ли Ису́со мангдя́пэ Дэвлэ́скэ дро екх штэ́то и, сыр пирияця́, тэды екх сыкляибнытконэндыр пхэндя́ Лэ́скэ: “Раё Дэ́вла! Сыкля́кир амэн тэ мангаспэ Дэвлэ́скэ адя́кэ-паць, сыр и Иа́но сыклякирдя́ лэ́скирэ сыкляибнытконэ́н.”

² Ису́со пхэндя́ лэ́нгэ: “Ке́ли тумэ́ мангэ́напэ Дэвлэ́скэ, тэды ракирэ́н: ‘Дад амаро́ Болыбна́скиро! Мэк тэ славинэлпэ Тыро́ свэ́нто лав; Мэк тэ явэ́л Тыро́ Кралипэ́н, Мэк тэ сполнинэ́лпэ, Тыри́ во́ля сыр пэ пхув, адя́кэ пэ болыбэ́н;

³ Подэ амэ́нгэ маро́ пэ кажно дывэ́с;

⁴ И приманг амэ́нгэ грэ́хи амарэ́, Сыр амэ примангаса одолэ́нгэ, Савэ исын вужлэ амэ́нгэ; И на домэк амэн кэ пропатякирибэн; Нэ зра́кх амэн налачхэстыр’”

⁵ И Ёв пхэндя́ лэ́нгэ: “Конэ́стэ тумэ́ндыр исын дру́го (мал), и ке́ли тумэ́ явэ́на кэ ёв дрэ пашрат и пхэнэ́на лэ́скэ: ‘Пша́ла, дэ дро вужлыпэ́н (длуго) ма́нгэ трин лабы маро́,

⁶ пал-дова́ со миро мал дромэ́стыр загия́ кэ мэ и ма́нгэ нанэ со тэ дав лэ́скэ;

⁷ и кадава́ мал отпхэнэ́ла тумэ́нгэ: ‘Дэ ма́нгэ тэ откхинёвав! Вуда́р исын пхандло и мирэ́ чхаворэ́ исын какана́ сутэ́ ма́нца; мэ на могина́ва тэ уштав и тэ псиравав (тэ отпхандав) ту́кэ?’”

⁸ Мэ пхэна́ва тумэ́нгэ, со мэк (хоць) ёв на уштэ́ла и на дэ́ла тумэ́нгэ, пал-дова́ со тумэ́ сан лэ́скиро мал, нэ ваш дова́, соб (кай) тумэ́ тэ на ладжакирэн лэс мангипнаса, ёв уштэ́ла и дэ́ла тумэ́нгэ ада́кицы, кицы́ тумэ́ камэ́на.

⁹ И Мэ ракира́ва тумэ́нгэ: мангэ́н, и явэ́ла дыно́ тумэ́нгэ; родэ́н, и латхэ́на; марэ́н дро вуда́р, и псиравэна тумэ́нгэ.

¹⁰ Пал-дова́ со кажно, кон мангэ́ла, дорэсэ́ла пэ́скиро; кажно, кон родэ́ла, латхэ́ла; кажнонэ́скэ, кон марэла дро вуда́р, явэ́ла псирадо.

¹¹ Нэ, ци исын вари-кон тумэ́ндыр сыр дад, со, ко́ли лэ́скиро чхаво́ мангэ́ла лэ́стыр маро́, тэ дэл чхавэ́скэ бар? Ци, ке́ли мангэ́ла мачхэс, тэ дэл лэ́скэ сапэс?

¹² Ци, ке́ли мангэ́ла парноро, тэ дэл лэ́скэ скорпионос?

¹³ Ко́ли тумэ́ сан налачхэ́ и джинэ́на тэ кэрэ́н лачхипэ́н пэ́скирэ чхавэ́нгэ, пэ кицы́ буты́р тумэ́ндыр тумаро́ Болыбна́скиро Дад дэ́ла Свэ́нто Ду́хо (Фа́но) одолэ́нгэ, савэ́ мангэна Лэ́стыр!”

Ису́со и Вельзэву́ло

¹⁴ Екхвар Ису́со вытрадэлас на́лачхо ду́хо (фа́но) немонэ (муто) манушэ́стыр. Ке́ли на́лачхо ду́хо (фа́но) выгия́ лэ́стыр, немо ману́ш лыя́ тэ ракирэ́л. И мануша́ дивиндлэ́пэ.

¹⁵ Нэ вари-савэ́ лэ́ндыр ракирдэ́: “Ёв вытрадэла налачхэ́ ду́хи (фаны) Вельзэвулоскирэ зорья́са, саво́ исын хула́й пэ налачхэ́ ду́хи.”

¹⁶ А яви́р мануша́ пропатякирэнас Лэс, трэбинэнас Лэ́стыр, соб (кай) тэ явэ́л ґерты́к (знаме́ниё) болыбна́стыр.

¹⁷ Нэ Ису́со джиндя́, со ёнэ думиндлэ и пхэндя́ лэ́нгэ: “Кажно Кралипэ́н, кай нанэ екхипэ́н андра́л, явэ́ла сыр шуки́ пхув; кажно кхэр, кай нанэ екхипэ́н андра́л, на явэ́ла тэ тэрдёл;

¹⁸ и ко́ли налачхэстэ нанэ екхипэ́н андра́л, сыр лэ́скиро кралипэ́н явэ́ла тэ тэрдёл? А тумэ́ ж ракирэ́на, со Мэ вытрадава налачхэ́ ду́хи Вельзэвулоскирэ зорья́са.

¹⁹ Нэ ко́ли Мэ вытрадава налачхэ́ ду́хи Вельзэвулоса, тэды тумарэ́ чхавэ́, савэ́ зорья́са вытрадэна? Палдава́ ёнэ явэ́на сэнда́рья тумэ́нгэ, со тумэ́ ракирэ́на начачипэ́н.

²⁰ А ко́ли Мэ вытрадава налачхэ́ ду́хи Дэвлэ́скирэ зорья́са, тэды Дэвлэ́скиро Кралипэ́н явдя́ кэ тумэ́.

²¹ Ке́ли зорало́ ману́ш ракхэ́ла пэ́скиро кхэр карэдыняса, лэ́скиро миштыпэ́н нико́н на чилавэ́ла;

²² нэ ке́ли ману́ш зоралэды́р лэ́стыр пэрэ́ла пэ лэ́стэ, и пиризорьякирэла хула́с, ёв закэдэла саро́ лэ́скиро марды́тко (оружыё), пал савэ́ хула́й рикирдяпэ, и роздэла лэ́скиро чордо миштыпэ́н.

²³ Кон исын на Ма́нца, одова́ исын проти Ма́ндэ, и кон на скэдэ́ла Ма́нца, одова́ росчхурдэла.

Сыр На́лачхо Ду́хо (Фа́но) Рисёла

²⁴ Ке́ли на́лачхо ду́хо (фа́но) выджа́ла манушэ́стыр, тэды ёв лодэла пир бипанескирэ штэ́ты, родэ́ла откхиныбэн и на латхэ́ла, и тэ́ньчи раки́рла: ‘Рисевава мэ дро миро кхэр, каты́р мэ явдём.’

²⁵ И ке́ли ёв явэ́ла, латхэ́ла, со кхэр нанэ залыно, вышуладо и укэдыно;

²⁶ тэ́ньчи ёв джа́ла и лэ́ла пэ́са эфта́ (битринэ́нгиро дэш) яви́р ду́хи, со исын фуеды́р лэ́стыр, и ёнэ заджа́на и дживэ́на одо́й; и ячэ́лапэ ваш далэ́ манушэ́скэ фуеды́р, сыр сыс анги́л дава́.”

Чачуны́ Бахт

²⁷ И сыс адя́кэ: ке́ли Ису́со пхэндя́ дава́, вари-сави́ джувлы́, сави́ сыс машки́р манушэ́ндэ, откхардяпэ зоралэ́ заня́са и пхэндя́ Лэ́скэ: “Бахталы́ исын джувлы́, сави́ бияндя́ и чарадя колынэса Тут.”

²⁸ А Ису́со отпхэндя́: “Чачо́, бахталэ́ исын кодолэ́, савэ́ шунэ́на Дэвлэ́скиро лав и кандэ́на лэс.”

Исусо́стыр Пхучэ́на тэ Кэрэ́л Ди́во

²⁹ Ке́ли мануша́ скэдынэ́пэ кхэтанэ́, Ису́со лыя́ тэ ракирэ́л: “Ѓа́да, исын на́лачхо и напатяибнытко ро́до, саво́ родэ́ла ґерты́к (знаме́ниё); на явэ́ла лэ́нгэ ґерты́к апри́ч Ионаскири ґерты́к.

³⁰ Адя́кэ, сыр Иона сыс ґерты́к ваш манушэ́нгэ Ниневиятыр, адя́кэ-паць Чхаво́ Манушэ́скиро явэ́ла ваш дава́ ро́до.

³¹ Паш-Дывэсэскири (Татэ-Ригакири) Кра́лица ґаздэ́лапэ тэ сэндинэлпэ манушэ́нца далэ́ родо́стыр и допхэнэ́ла пэ лэ́ндэ: пал-дова́ со ёй явэ́лас пхувья́кирэ ягоро́стыр (краёстыр) тэ шунэ́л Соломоно́скиро годьварипэн; и ада́й исын Екх, Саво́ исын барэды́р Соломоностыр.

³² Ниневиякирэ мануша́ ґаздэ́напэ тэ сэндинэнпэ далэ́ родоса и ёнэ допхэнэна пэ лэ́ндэ, пал-дова́ со ёнэ на рисинэ́ грэхэ́ндыр кэ Дэвэ́л, ке́ли Иона пхэндя́ лав; и ада́й исын Екх, Саво́ исын барэды́р Ионастыр.

Пал Дуд Ваш Маса́

³³ И ке́ли захачкирэна момолы, на гаравэна ла ци чхувэ́на ла тэл пири́, а дро шандало (подсвечнико), соб (кай) тэ дыкхэ́н мануша́, савэ́ джа́на андрэ́ дро кхэр.

³⁴ Момолытко (свети́льнико) ваш маса́ исын яг. Палдава́, ко́ли якх тыри́ явэ́ла жужы, то кокорэ́ маса́ явэ́на жужэ́; ко́ли якх тыри́ на явэ́ла жужы, тэды ту кокоро́ явэ́са дро цямлыпэ́н (калыпэ́н).

³⁵ Дыкх жа, соб (кай) дуд (свэ́то), саво́ исын дрэ ту́тэ, тэ на явэ́л цямло.

³⁶ Пал-дова́ со, ко́ли сарэ́ тырэ́ маса́ исын святла сыр яг, а нанэ пэ лэ́стэ ни екх цямло штэтыцо, тэды ту явэ́са тэ зяинэс дудэса сыр момолытконэстыр (светильникостыр), саво́ захачкирдо.”

Ису́со Бангякирэ́ла Фарисее́н и Лылвариконэ́н

³⁷ Ке́ли Ису́со ракирдя́, екх Фарисеё кхардя́ Лэс кэ хал лэ́стэ; Ёв загия́ и бэсця́ пал сками́нд.

³⁸ Фарисе́и дивиндэпэ, ке́ли дыкхнэ́, со Ису́со на мордя васта́ анги́л хабэ́н.

³⁹ Нэ Рай Дэвэ́л пхэндя́ Лэ́скэ: “Тумэ́, Фарисе́и, какана́ морэна тахтая́ (чашы) и чарэ́ яврестыр, а андра́л, дро тумаро́ ило́ исын пхэрдо́ бокх кэ чу́жо миштыпэ́н и налачхэ́ ду́мы.

⁴⁰ Тумэ́ сан бигодякирэ! Ци да на Дэвэ́л, Кон кэрдя́ дава́ саро́ яврестыр и андрэстыр.

⁴¹ Нэ тумэ́ фэды́р отдэ́н дыибэ́н илэ́стыр долэ́стыр, со тумэ́ндэ исын дрэ тахтая́, и тумэ́ явэ́на жужэ́.

⁴² Бида тумэ́нгэ, Фарисе́и; пал-дова́ со тумэ́ дэ́на дэ́што ме́ра мятатыр, рутатыр и кажнонэ́ чарьятыр, нэ тумэ́ на думинэ́на пал сэ́ндо и Дэвлэ́скири ла́ска; дава́ трэиндя́ тэ кэрэ́н и адя́кэ-паць тэ на бистрэн пал яви́р.

⁴³ Бида тумэ́нгэ, Фарисе́и: пал-дова́ со тумэ́ камэ́на най фэдэды́р штэ́ты дрэ синагоги и, соб (кай) мануша́ тэ дэн ‘паклоно’ тумэ́нгэ пэ таргитка штэ́ты.

⁴⁴ Бида тумэ́нгэ: пал-дова́ со тумэ́ сан сы́рбы надыцьлэ маґилы, со мануша́ псирэ́на пир лэ́ндэ и на джинэ́на лэн.”

⁴⁵ И екх лылваритконэндыр отпхэндя́ Исусо́скэ: “Сыклякирибнарискиро! Ко́ли Ту ракирэ́са адя́кэ, Ту ладжакирэса адя́кэ-паць амэн!”

⁴⁶ И пхэндя́ Ису́со: “Бида тумэ́нгэ, лылвари́тка: пал-дова́ со тумэ́ чхувэ́на барэ́ пхарипэна дро джиибэ́н пэ манушэ́ндэ, а кокорэ́ на камэ́на ангуштэса тэ чилавэн лэн.

⁴⁷ Бида тумэ́нгэ; пал-дова́ со тумэ́ кэрэ́на коплицы пророкэнгэ, савэ́н тумарэ́ дада́ замардэ́.

⁴⁸ Адя́кэ тумэ́ допхэнэна ж пэ тумарэ́ дадэндэ, и подрикирэна лэн дро дова́, со ёнэ кэрдэ́; пал дава́, со ёнэ замарэнас пророкэ́н, а тумэ́ лэ́нгэ кэрэ́на коплицы.

⁴⁹ Ваш дава́ и Дэвлэ́скирэ годя́са исын пхэндло́: ‘Мэ бичхава́ва лэ́нгэ пророкэ́н и Апостолэн; ёнэ замарэна екхэн, а явирэ́н ёнэ вытрадэна сыр джуклэн’,

⁵⁰ мэк тэ явэ́л сэ́ндо пэ дава́ ро́до пал пророкэ́нгирэ рата, савэ́ прочхудэ свэто́скирэ англыпна́стыр

⁵¹ Авелёскирэ ратэстыр кэ Захариёскиро рат, савэ́с замардэ́ машки́р алта́рё и Кхангирья́кири паш; чачэс, Мэ, ракира́ва тумэ́нгэ: явэ́ла пхучно, сыр трэй далэ́ родо́стыр.

⁵² Бида тумэ́нгэ, лылвари́тка: пал-дова́ со тумэ́ гаравэна клыдына вударэндыр дро джиныбнаскиро кхэр; тумэ́ ж кокорэ́ на загинэ́ и на мэкнэ́ явирэ́н.”

⁵³ И ке́ли Ису́со пхэндя́ саро́ дава́ лэ́нгэ, лылвари́тка и Фарисе́и лынэ́ тэ рэсэн кэ Ёв холя́са, соб (кай) Ёв тэ отпхэнэл пэ бут пхучыбэна;

⁵⁴ а кокорэ́ ужакирдэ чораханэ́с тэ ухтылэ́н Лэс дро лав, и соб (кай) ёнэ могинэ́нас тэ бангякирэн Лэс.