Левито 3 - Библия - Пэ Балтитко Романи чиб (Романэс) 2019

Ми́рно Свэ́нто Дыибэ́н

¹ Ко́ли вари-конэ́скиро свэ́нто дыибэ́н исын ми́рно (раманёно), и, ко́ли ёв янэ́ла барэ́ кхэритконэ́ мурдалэ́ндыр (ското́стыр), муршканэ́с ци джувликанэс, мэк тэ янэл лэс Ра́скэ-Дэвлэ́скэ, тэ явэ́л ёв бидошэ́нгиро,

² и чхувэ́ла пэ́скиро васт пэ пэ́скирэ-жэртвакиро шэро́, и зачхинэла лэс пашы́л вуда́р скэдыибна́скири ша́тра; а Аароно́скирэ чхавэ́, рашая́, побрызгинэна ратэ́са пэ алта́рё сарэ́ ригэ́ндыр;

³ и янэ́ла ёв мирнонэ жэртватыр дро свэ́нто дыибэ́н Ра́скэ-Дэвлэ́скэ ту́ко (чэкэ́н), саво́ учхакирэ́ла андратунэ́ маса́ (букорэ), и саро́ чэкэ́н (ту́ко), саво́ исын пэ андратунэ́ маса́,

⁴ и дуй букорэ (почки) и чэкэ́н (ту́ко), саво́ тэ явэ́л пэ лэ́ндэ, саво́ исын пэ стёгны, и сальнико, саво́ исын пэ кало́ буко (печонка); букорэнца (почкэнца) ёв роскэдэла дава́;

⁵ и Аароно́скирэ чхавэ́ схачкирэна дава́ пэ алта́рё кхэтанэ́ цэлонэ́ схачкирибнаса, саво́ исын пэ кашта́ пэ яг: дова́ исын свэ́нто дыибэ́н, гудло́ тхув, Ра́скэ-Дэвлэ́скэ.

⁶ А ко́ли тыкнэ́ кхэритконэ́ мурдалэ́ндыр янэ́ла ёв Ра́скэ-Дэвлэ́скэ ми́рно (раманёно) свэ́нто дыибэ́н, муршкано́ ци джувликано, мэк тэ янэл лэс, тэ явэ́л бидошэ́нгиро.

⁷ Ко́ли ёв янэ́ла пэ́скиро свэ́нто дыибэ́н бакрэ́ндыр, мэк тэ янэл лэс тэ явэ́л анги́л Растэ-Дэвлэ́стэ,

⁸ и чхувэ́ла пэ́скиро васт пэ шэро́ пэ́скирэ жэртвакиро, и зачхинэла ла анги́л скэдыибна́скири ша́тра, и Аароно́скирэ чхавэ́ побрызгинэна ла́кирэ ратэ́са пэ алта́рё сарэ́ ригэ́ндыр;

⁹ и мэк тэ янэл мирнонэ жэртватыр Ра́скэ-Дэвлэ́скэ дро свэ́нто дыибэ́н ла́киро чэкэ́н, саро́ курдюко, отчхины лэс пир са́мо хребтоскиро кокало, и чэкэ́н (ту́ко), саво́ заучхакирэла андратунэ́ маса́ (букорэ), и саро́ чэкэ́н, саво́ исын пэ андратунэ́ маса́,

¹⁰ и дуй букорэ (почки) и чэкэ́н, саво́ исын пэ лэ́ндэ, саво́ исын пэ стёгны, и сальнико, саво́ исын пэ кало́ буко (печонка); букорэнца ёв откэдэла дава́;

¹¹ раша́й схачкирэ́ла дава́ пэ алта́рё; дава́ исын ягакиро маро́ – свэ́нто дыибэ́н Ра́скэ-Дэвлэ́скэ.

¹² А ко́ли ёв янэ́ла свэ́нто дыибэ́н бузнендыр, мэк тэ янэл лэс анги́л Растэ-Дэвлэ́стэ,

¹³ и чхувэ́ла пэ́скиро васт пэ ла́киро шэро́, и зачхинэла ла анги́л скэдыибна́скири ша́тра, и побрызгинэна Аароно́скирэ чхавэ́ лэ́скирэ ратэ́са пэ алта́рё сарэ́ ригэ́ндыр;

¹⁴ и янэ́на лэ́стыр дро яныбэ́н, дро свэ́нто дыибэ́н Ра́скэ-Дэвлэ́скэ чэкэ́н, саво́ учхакирэ́ла андратунэ́ маса́,

¹⁵ и дуй букорэ (почки) и чэкэ́н (ту́ко), саво́ исын пэ лэ́ндэ, саво́ исын пэ стёгны, и сальнико, саво́ исын пэ кало́ буко (печонка); букорэнца (почкэнца) ёв откэдэла дава́;

¹⁶ и схачкирэ́ла лэн раша́й пэ алта́рё: дава́ исын ягакиро маро́, гудло́ тхув, Ра́скэ-Дэвлэ́скэ; а саро́ чэкэ́н Ра́скэ-Дэвлэ́скэ.

¹⁷ Дава́ исын упхэныбэ́н ве́чно дрэ тумарэ́ ро́ды, дрэ сарэ́ тумарэ́ кхэра́; ни саво́ чэкэ́н (ту́ко), и ни саво́ рат тэ на хан.