Левито 27 - Библия - Пэ Балтитко Романи чиб (Романэс) 2019

Сыр тэ Высвэнцынэс Манушэ́н и Миштыпэ́н Дэвлэ́скэ

¹ И пхэндя́ Рай Дэвэ́л Мойза́скэ, ракири́:

² “Ра́кир Израилёскирэ чхавэ́нгэ и пхэн лэ́нгэ: ‘Кон совлахала тэ высвэнцынэл вари-конэ́скиро ди Ра́скэ-Дэвлэ́скэ пир тыри́ тими́н (цэна),

³ то тыри́ тими́н муршэскэ бишэ́ бэршэ́ндыр кэ шовдэша́ исын банги тэ явэ́л пандждэша́ руповэ шэ́кели, пир шэ́келё свэнтонэскэ;

⁴ ко́ли дава́ исын джувлы́, тэды тыри́ тими́н исын банги тэ явэ́л трия́нда шэ́кели;

⁵ панджэ́ бэршэ́ндыр кэ биш бэрш тими́н тыри́ муршэскэ исын банги тэ явэ́л трия́нда шэ́кели, а джувля́кэ дэш шэ́кели.

⁶ А чхонэстыр кэ пандж бэрш тими́н тыри́ муршэскэ исын банги тэ явэ́л пандж рупувэ́ шэ́кели, а джувля́кэ тыри́ тими́н трин рупувэ́ шэ́кели;

⁷ шовдэшэ бэршэ́ндыр и пхурэды́р муршэскэ тыри́ тими́н исын банги тэ явэ́л дэшупандж рупувэ́ шэ́кели, а джувля́кэ дэш шэ́кели.

⁸ Ко́ли ёв исын чороро́ и на дрэ зор тэ заплэскирэл пир тыри́ тими́н, тэды мэк тэ сыкавэ́н лэс раша́скэ, и раша́й мэк тэ дэл лэ́скэ тими́н (чол): ада́кицы, кицы́ исын мол исын манушэ́скиро барвалыпэ́н, саво́ дыя́ совла́х, мэк тэ дэл лэ́скэ тими́н раша́й.

⁹ Ко́ли дова́ тэ явэ́н кхэри́тка мурдала́ (ското), савэ́н янэ́на дро свэ́нто дыибэ́н (жэ́ртва) Ра́скэ-Дэвлэ́скэ, тэды саро́, со дыно́ Ра́скэ-Дэвлэ́скэ, исын банго́ тэ явэ́л свэ́нто.

¹⁰ Нашты́ тэ выпарувэн лэс и тэ запарувэс лачхо́ налачхэса ци на́лачхо лачхэса; ко́ли лэ́ла кон тэ запарувэл мурдалэс мурдалэса, тэды и ёв и лэ́скиро запаруибэн явэ́ла свэ́нто.

¹¹ Ко́ли дова́ явэ́ла вари-саво́ нажужо мурда́л, савэ́с на янэ́на Ра́скэ-Дэвлэ́скэ дро свэ́нто дыибэ́н, то дова́ трэй тэ сыкавэ́н раша́скэ,

¹² и раша́й дэ́ла тими́н лэ́скэ, ци лачхо́ ёй ци на́лачхо, и саво́ дэ́ла раша́й тими́н, адя́кэ и трэй тэ явэ́л.

¹³ Нэ ко́ли вари-кон (хула́й) камэ́ла тэ выкинэл лэс, тэды мэк тэ дочхувэл па́нджто паш кэ тыри́ тими́н.

¹⁴ Ко́ли кон отдэ́ла пэ́скиро Кхэр Ра́скэ-Дэвлэ́скэ дрэ свэнтыма, тэды раша́й исын банго́ тэ дэл тими́н лэ́скэ, адя́кэ и явэ́ла.

¹⁵ Ко́ли ману́ш, саво́ отдыя́ пэ́скиро кхэр, закамэ́ла тэ выкинэл лэс, тэды мэк ёв тэ дочхувэл па́нджто рупэскири паш тырэ́ тиминакэ, и тэды явэ́ла лэ́скиро.

¹⁶ Ко́ли вари-кон пэ́скирэ хулаибнастыр отдэ́ла фэ́лда Ра́скэ-Дэвлэ́скэ, тэды тыри́ тими́н трэй тэ явэ́л пир сеиныбнаскири тими́н: пал сеиныбэн хомеро ґэрсто (ячменё) пандждэша́ шэ́кели рупэ́са.

¹⁷ Ко́ли свэнкитконэ бэршэстыр вари-кон отдэ́ла пэ́скири фэ́лда, дава́ трэй тэ явэ́л пир тыри́ тими́н;

¹⁸ ко́ли вари-кон отдэ́ла пэ́скири фэ́лда пало́ свэ́нко, тэды раша́й исын банго́ тэ розгинэл руп пир бэрша́, савэ́ ячнэ́пэ свэнкоскирэ бэршэстыр, и исын банго́ пэ ада́кицы тэ тыкнякирэл тыри́ тими́н.

¹⁹ Ко́ли ману́ш, саво́ отдыя́ фэ́лда, закамэ́ла ла тэ выкинэл, тэды мэк ёв тэ дочхувэл па́нджто рупэскиро/и паш тырэ́ тиминакири, и ёй ячэ́лапэ пал лэ́стэ;

²⁰ ко́ли ёв фэ́лда на выкинэла, и фэ́лда явэ́ла бикиндлы явирэ манушэ́скэ, тэды ла нашты́ тэ выкинэл:

²¹ доя́ фэ́лда, ке́ли ёй отджала сыр свэнкоскири, явэ́ла свэ́нто Ра́скэ-Дэвлэ́скэ, сы́рбы фэ́лда совлахады; раша́скэ ёй ячэ́лапэ дро хулаибэн.

²² А ко́ли вари-кон отдэ́ла киндлы фэ́лда Ра́скэ-Дэвлэ́скэ сыр свэ́нто, сави́ на лэ́скирэ фэлдэндыр,

²³ тэды раша́й исын банго́ тэ розгинэл лэ́скэ ци бут тими́н кэ свэнкоскиро бэрш, и ёв исын банго́ ёв тэ отдэ́л пир розгиныбэн дрэ дова́-паць дывэ́с, сыр Ра́скирэ-Дэвлэ́скири свэнтыма.

²⁴ А фэ́лда пэ свэнкоскиро бэрш пириджала нэвэ́с кэ одова́ ману́ш, конэ́стыр киндлэ, конэ́скэ приджалапэ доя́ пхув дро хулаибэн.

²⁵ Кажно тыри́ тими́н исын банги тэ явэ́л пир шэ́келё раша́скэ, биш геры трэй, соб (кай) тэ явэ́н дрэ шэ́келё.

²⁶ Фэ́ни (екхэ) пэрвонэ́ тыкнорэн мурдалэ́ндыр, савэ́ отлыджанапэ Ра́скэ-Дэвлэ́скэ, нашты́ нико́н тэ дэл дрэ свэнтыма: ци гурув да, ци тыкно́ кхэри́тко мурда́л, ёнэ исын Ра́скирэ-Дэвлэ́скирэ.

²⁷ Ко́ли мурда́л исын нажужо, тэды исын бангэ́ тэ выкинэл пир тыри́ тими́н и тэ дочхувэл кэ дова́ па́нджто паш; ко́ли на выкинэла, тэды исын бангэ́ тэ бикнэл пир тыри́ тими́н.

²⁸ Екх саро́ засовлахадо, со тэл совла́х ману́ш отдэ́ла Ра́скэ-Дэвлэ́скэ пэ́скирэ хулаибнастыр, ци манушэ́с, ци кхэритконэ́ мурдалэс, ци фэ́лда пэ́скирэ маёнкостыр, на бикнэлапэ и на выкинэлапэ; саро́ засовлахадо исын бари свэнтыма Раскири-Дэвлэ́скири;

²⁹ Саро́ засовлахадо, со исын совлахадо манушэ́ндыр, на выкинэлапэ: дава́ исын банго́ тэ явэ́л отдыно́ мэрибна́скэ.

³⁰ И кажно дэ́што паш, со пхув дэ́ла ци зя́рка, ци барьякирдо́ (пло́до) исын Ра́скирэ-Дэвлэ́скирэ: дава́ исын Ра́скирэ-Дэвлэ́скири свэнтыма.

³¹ Ко́ли вари-кон закамэ́ла тэ выкинэл пэ́скири дэ́што паш, тэды мэк ёв тэ причхувэл кэ ла́кири тими́н па́нджто паш.

³² И кажно дэ́што паш барэ́ и тыкнэ́ кхэритконэ́ мурдалэ́ндыр, сарэ́стыр, со проджа́ла тэл дэсто́ чхупнарискиро (жэзло), дэ́што паш исын бангэ́ тэ отдэ́н Ра́скэ-Дэвлэ́скэ;

³³ о ману́ш нашты́ тэ роскэдэл ци лачхо́ дова́, ци фуй, и нашты́ тэ запарувэл лэс; ко́ли кон лэс запарувэла, тэды и кокоро́ ёв и лэ́скиро запаруибэн явэ́ла свэнтонэса, и на могинэ́ла тэ явэ́л выкиндло.’”

³⁴ Ѓа́да, исын припхэныбэна́, савэ́ ракирдя́ Рай Дэвэ́л Мойза́скэ ваш Израилёскирэ чхавэ́нгэ пэ бэ́рга Синаё.