Левито 26 - Библия - Пэ Балтитко Романи чиб (Романэс) 2019

О Дэвэ́л Дэ́ла Лав тэ Бахтякирэл

¹ На кэрэ́н пэ́скэ вычхудэ́ образы (кумиры) и вычхиндлэ́ муя́ (изваянии), и сты́лбы на чхувэ́н пэ́стэ, и бара́ вычхиндлэ́ муенца на чхувэ́н пэ тумари́ пхув, соб (кай) тэ на бандён анги́л лэ́ндэ, пал-дова́ Мэ сом Рай Дэвэ́л, тумаро́ Дэвэ́л.

² Ракхэ́н са́ваты (суботы) Мирэ́ и дэн паты́в кэ свэ́нто Миро штэ́то. Мэ сом Рай Дэвэ́л.

³ Ко́ли тумэ́ явэ́на тэ кэрэ́н пир Мирэ́ упхэныбэна́, и Мирэ́ припхэныбэна́ явэ́на тэ ракхэ́н и тэ кэрэ́н пир лэ́ндэ,

⁴ тэды Мэ да́ва тумэ́нгэ брышында дрэ пэ́скиро часо (цы́ро), и пхув дэ́ла пэ́скирэ барьякирдэ́ (пло́ды), и фэлды́тка вэша́ дэ́на пэ́скиро барьякирдо́ (пло́до);

⁵ и укэдыибэн маритко явэ́ла тэ доджал тумэ́ндэ кэ винаградоскиро скэдыибэ́н, а винаградоскиро скэдыибэ́н явэ́ла тэ доджал кэ сеиныбэн, и явэ́на тэ хан пэ́скиро маро́ чалэ́с, и явэ́на тэ дживэ́н пэ тумари́ пхув штылыткэс (бидаракирэс).

⁶ Мэ бичхава́ва рама́нё (миро) пэ тумари́ пхув, тумэ́ пасёна тэ совэн, и нико́н тумэн на страхакирэла, Мэ традава криг мижэхонэ рискирибна́скирэ мурдалэ́н (зверен) тумарэ́ пхувья́тыр, и курта́ла на проджа́ла пир тумари́ пхув.

⁷ И тумэ́ явэ́на тэ традэ́н тумарэн вэргэ́н, и пэрэ́на ёнэ анги́л тумэ́ндэ куртала́тыр;

⁸ И пандж тумэ́ндыр протрадэна шэл манушэ́н, и шэл тумэ́ндыр протрадэна бут вэргэ́н кэ калыпэ́н, и пэрэ́на тумарэ́ вэ́рги анги́л тумэ́ндэ куртала́тыр.

⁹ Мэ подыкхава пэ тумэ́ндэ, и бутэ́-бияныбнытконэнца (плодороднэнца) Мэ кэра́ва тумэн, и Мэ бутырьякирава бут тумэн, и Мэ ява́ва твардо (би кунипнаскиро) дрэ Миро завето (доракирибэ́н) тумэ́нца;

¹⁰ и тумэ́ явэ́на тэ хан пхурано́ явирэ-бэршытко, и вычхурдэна пхурано́ ваш нэво́:

¹¹ и Мэ чхува́ва Мири́ ша́тра (кхэр) машки́р тумэ́ндэ, и Миро дескэ тумэ́ на явэ́на джунгалэ́ (стэтка);

¹² и Мэ ява́ва тэ псирав машки́р тумэ́ндэ, и Мэ ява́ва тумарэ́ Дэвлэ́са, а тумэ́ явэ́на Мирэ́ мануша́.

¹³ Мэ сом Рай Дэвэ́л, тумаро́ Дэвэ́л, Саво́ вылыджия́ тумэн Египто́скирэ пхувья́тыр, соб (кай) тумэ́ тэ на явэ́н одо́й писхарье́нца, и тэ пхагирав састыра́ тумарэ́ ґамостыр, и Саво́ лыджия́ тумэн заґаздынэ шэрэ́са.

¹⁴ Ко́ли тумэ́ на кандэ́на Ман, и на явэ́на тэ кэрэ́н пир сарэ́ далэ́ припхэныбэна́,

¹⁵ и ко́ли тумэ́ явэ́на тэ на прилэ́н патыва́са Мирэ́ упхэныбэна́, и ко́ли тумаро́ ди исын насвало́ (брыдинэлапэ) Мирэ́ законэндыр адя́кэ, со тумэ́ на явэ́на тэ кэрэ́н пир сарэ́ Мирэ́ упхэныбэна́, пхагири Миро завето,

¹⁶ то тэды и Мэ кэра́ва тумэ́нца адя́кэ: Мэ бичхава́ва пэ тумэ́ндэ дар, насвалыпэн и хачкирибэ́н, савэ́ндыр кхинёна якха́ и нашавэла зор ди, и тумэ́ явэ́на тэ почхувэн дрэ пхув тумарэ́ зя́рки (семи) ивья́, и тумарэ́ вэ́рги схана лэн;

¹⁷ и Мэ рискира́ва Миро муй пэ тумэ́ндэ, и тумэ́ пэрэ́на анги́л тумарэ́ вэргэ́ндэ, и намала тумарэ́ явэ́на хулая́ пэ тумэ́ндэ, и тумэ́ праста́на, ке́ли нико́н на явэ́ла тэ традэлпэ пал тумэ́ндэ.

¹⁸ Ко́ли пир саро́ дава́ тумэ́ на кандэ́на Ман, то тэды Мэ эфта́ мо́лы кэра́ва барэды́р ка́ра пал тумарэ́ грэ́хи,

¹⁹ и Мэ пхагирава пхутькирды тумари́ нартыма (упорство), и болыбэ́н тумаро́ упра́л кэра́ва, сыр састы́р, и пхув тумари́, сыр харко́ма (медь);

²⁰ и ивья́ (напра́снэс) явэ́ла тэ зджал тумари́ зор, и пхув тумари́ на дэ́ла пэ́скирэ чарьенгэ тэ барьён, и пхувья́кирэ вэша́ на дэ́на пэ́скирэ барьякирдэ́ (пло́ды).

²¹ Ко́ли пало́ саро́ дава́ тумэ́ джа́на пэ Ма́ндэ, и на закамэна тэ шунэ́н Ман, тэды Мэ дочхувава тумэ́нгэ марибэ́н дрэ эфта́ мо́лы пал тумарэ́ грэ́хи:

²² и Мэ бичхава́ва пэ тумэ́ндэ фэлдытконэ рискирибна́скирэ мурдалэ́н (зверен), савэ́ отлэна тумарэ́ чхавэ́н, хасякирэна тумарэ́ кхэритконэ́ мурдалэ́н (ското), и тумэн скэрэна тыкнэды́р, адя́кэ, со явэ́на чхучэ́ тумарэ́ дрома́.

²³ Ко́ли и пало́ дава́ Мэ на высыклякирава тумэн, и тумэ́ джа́на пэ Ма́ндэ,

²⁴ то тэды и Мэ джа́ва пэ тумэ́ндэ, и чхува́ва ка́ра пэ тумэ́ндэ дрэ эфта́ мо́лы пал тумарэ́ грэ́хи,

²⁵ и яна́ва Мэ курта́ла пэ тумэ́ндэ тэ отхал палэ пал завето; и ко́ли тумэ́ гарадёна дрэ тумарэ́ фо́рья, тэды Мэ бичхава́ва пэ тумэ́ндэ фра́нсы (фуя́), и отдынэ́ тумэ́ явэ́на дрэ вэргоскирэ васта́.

²⁶ А маро́, саво́ дэ́ла зор манушэ́скэ, Мэ хасякира́ва тумэ́ндэ; дэш джувля́ явэ́на тэ пэкэн тумаро́ маро́ дро екх бов, и явэ́на тэ отдэ́н маро́ тумаро́, важыны лэс; тумэ́ явэ́на тэ хан, и на явэ́на чалэ.

²⁷ Нэ ко́ли ишчо (инкэ́) и пало́ дава́ тумэ́ на кандэ́на Ман и джа́на пэ Ма́ндэ,

²⁸ тэды и Мэ дрэ холы́ джа́ва пэ тумэ́ндэ, и чхува́ва ка́ра пэ тумэ́ндэ дрэ эфта́ мо́лы пал тумарэ́ грэ́хи,

²⁹ и тумэ́ явэ́на тэ хан тумарэ́-чхавэнгири лоч (плоть), и лоч тумарэ́-чхаенгири явэ́на тэ хан;

³⁰ Мэ роспхагирава кэ пхув тумарэ́ вучипэна́, и роспхагирава тумарэ́ сты́лбы, и чхурдава тэлэ́ тумарэ́ тру́пы пэ тумарэ́-идолэнгирэ котэра́, и ячэ́на джунгалэ́ (брытка) тумэ́ Мирэ́ дескэ;

³¹ а тумарэ́ форье́ндыр Мэ кэра́ва чхучи́ пхув, и скэрава чхучэ́ тумарэ́ кхангирья, и Мэ, на ява́ва тэ сунгавав гудло́ тхув тумарэ́ яныбнастыр.

³² И Мэ кэра́ва тумари́ пхув чхучи́ адя́кэ, со дэнапэ дивоскэ пал ла́тэ тумарэ́ вэ́рги, савэ́ дживэ́на пэ ла́тэ;

³³ а тумэн росчхурдава Мэ тэ дживэ́н машки́р манушэ́ндэ и нангякирава пала́л пал тумэ́ндэ курта́ла, и явэ́ла пхув тумари́ чхучи́ и фо́рья тумарэ́ роспхагирдэ́.

³⁴ Тэды пхув чалякирэла пэс пал пэ́скирэ са́ваты (суботы) дрэ сарэ́ пэ́скирэ чхучипнаскирэ дывэса́; ке́ли тумэ́ явэ́на пэ тумарэ́-вэргэнгири пхув, тэды явэ́ла тэ откхинёл пхув, и чалякирэла пэс пал пэ́скирэ са́ваты.

³⁵ Ёй, пхув, явэ́ла тэ откхинёл дрэ сарэ́ пэ́скирэ чхучипнаскирэ дывэса́, ци бут ёй на откхиныя дрэ тумарэ́ са́ваты, ке́ли тумэ́ дживдэ́ пэ ла́тэ.

³⁶ Одолэ́нгэ, кон ячэ́лапэ тумэ́ндыр, Мэ бичхава́ва дрэ ило́ намуршыпэн пэ пхув лэ́нгирэ вэргэнгири, и шумо патренгиро (листэнгиро), саво́ кунинэлапэ, традэ́ла лэн, и тумэ́ праста́на, сыр куртала́тыр, и пэрэ́на, ке́ли нико́н на традэлапэ,

³⁷ и обштавэнапэ екх пэ екхэ́стэ, сыр куртала́тыр, на дыкхи́ пэ дава́, сыр нико́н на традэлапэ, и на явэ́ла тумэ́ндэ зор тэ тэрдён анги́л тумарэ́ вэргэ́ндэ;

³⁸ и хасёна тумэ́ машки́р манушэ́ндэ, и схала тумэн пхув тумарэ́ вэргэнгири;

³⁹ а кон яця́пэ тумэ́ндыр, явэ́на тэ хасён со дывэ́с пал пэ́скиро чорипэ́н пэ тумарэ́-вэргэнгири пхув, и пал пэ́скирэ-дадэ́нгиро чорипэ́н хасёна тумэ́.

⁴⁰ Нэ ко́ли ёнэ приґалёнапэ дро пэ́скиро чорипэ́н и дрэ пэ́скирэ-дадэ́нгиро чорипэ́н, сыр ёнэ ґаздынэ́пэ проти Ма́ндэ и гинэ́ пэ Ма́ндэ,

⁴¹ пал со и Мэ гиём пэ лэ́ндэ и лыджиём лэн андрэ́ пэ лэ́нгирэ-вэргэнгири пхув; тэ́ньчи, сашты́, лэ́нгиро наобчхиндло ило́ ковлёла, и тэды ёнэ явэ́на тэ вырикинэн пал пэ́скиро чорипэ́н,

⁴² то Мэ пририпирава Миро завето Яковоса, и Миро завето Исаакоса, и пририпирава Миро завето Авраамоса, и пхув пририпирава.

⁴³ То тэды сыр пхув явэ́ла ячкирды лэ́нца, и явэ́ла тэ чалякирэл пэс пал пэ́скирэ са́ваты, палдава́ яця́ чхучи́ (пусто) лэ́ндыр, и ёнэ явэ́на тэ вырикирэн пал пэ́скиро чорипэ́н, пал-дова́, со ёнэ на прилэнас патыва́са Мирэ́ зако́ны, и лэ́нгирэ дескэ сыс джунгалэ́ (брыдка) Мирэ́ упхэныбэна́,

⁴⁴ и тэды, сыр ёнэ явэ́на пэ лэ́нгирэ-вэргэнгири пхув, – Мэ на ява́ва тэ на прилав лэн патыва́са, и ёнэ на явэ́на джунгалэ́ Ма́нгэ кэ дава́, соб (кай) тэ хасякира́в лэн, соб (кай) тэ роскушав Миро завето лэ́нца, пал-дова́ со Мэ сом Рай Дэвэ́л, лэ́нгиро Дэвэ́л;

⁴⁵ Мэ пририпирава ваш лэ́нгэ завето лэ́нгирэ дадэ́нца, савэ́н вылыджиём Мэ Египто́скирэ пхувья́тыр анги́л манушэ́нгирэ якха́, соб (кай) тэ явав лэ́нгирэ Дэвлэ́са: Мэ сом Рай Дэвэ́л.’”

⁴⁶ Ѓа́да, исын упхэныбэна́ и стату́ты и зако́ны, савэ́ Рай Дэвэ́л чхудя́ машки́р пэ́стэ и машки́р Израилёскирэ чхавэ́ндэ пэ бэ́рга Синаё, пир Мойзастэ.