Левито 23 - Библия - Пэ Балтитко Романи чиб (Романэс) 2019

Свэ́нки Дэвлэ́скирэ

¹ И пхэндя́ Рай Дэвэ́л Мойза́скэ, ракири́:

² “Дэ тэ джинэ́н Израилёскирэ чхавэнэ и пхэн лэ́нгэ пал Ра́скирэ-Дэвлэ́скирэ свэ́нки, дрэ савэ́ тумэ́нгэ трэй тэ скэдэ́н свэ́нта скэдыибэна. Ѓа́да, Мирэ́ свэ́нки исын дасавэ́:

Са́вато

³ шов дывэса́ сашты́ тэ кэрэ́с буты́, а пэ эфта́то (битринэ́нгиро дэ́што) дывэ́с са́вато (субо́та) тэ откинён, свэ́нто скэдыибэ́н; нисави́ буты́ на кэрэ́н: дава́ исын са́вато Ра́скиро-Дэвлэ́скиро дрэ сарэ́ тумарэ́ кхэра́.

Патради́ (Пасха)

⁴ Ѓа́да, исын Ра́скирэ-Дэвлэ́скирэ свэ́нки, свэ́нта скэдыибэна, савэ́ тумэ́нгэ трэй тэ кэрэ́н дрэ пэ́скиро часо (цы́ро);

⁵ дро пэ́рво (англатуно́) чхон, пэ дэшуштартонэ-чхонэ́скиро дывэ́с бэльвэле́ тэ явэ́л Патради́ Ра́скирэ-Дэвлэ́скири;

Опреснокэнгиро Свэ́нко

⁶ и пэ дэшупанджто дывэ́с долэ́ чхонэ́скиро свэ́нко опресноки Ра́скэ-Дэвлэ́скэ; эфта́ дывэса́ хан апресноки.

⁷ А пэ англатуно́ (пэ́рво) дывэ́с мэк тэ явэ́л тумэ́ндэ свэ́нто скэдыибэ́н; нисави́ буты́ на кэрэ́н;

⁸ и дрэ сарэ́ эфта́ (битринэ́нгиро дэш) дывэса́ янэ́н Ра́скэ-Дэвлэ́скэ свэ́нта дыибэна́; пэ эфта́то дывэ́с адя́кэ-паць свэ́нто скэдыибэ́н; нисави́ буты́ на кэрэ́н.”

Свэ́нко пал Пэ́рва Барьякирдэ́ (Пло́ды)

⁹ И пхэндя́ Рай Дэвэ́л Мойза́скэ дасавэ́ лава́:

¹⁰ “Дэ тэ джинэ́н Израилёскирэ чхавэ́нгэ и пхэн лэ́нгэ: ‘Ке́ли явэ́на пэ пхув, сави́ Мэ да́ва тумэ́нгэ, и явэ́на тэ чхинэн пэ ла́тэ жатва, тэды янэ́н пэ́рво тумарэ́-жатвакиро ґарбо (снопо) кэ раша́й;

¹¹ ёв ґаздэ́ла дава́ ґарбо анги́л Растэ-Дэвлэ́стэ, соб (кай) тумэ́нгэ тэ явэ́л Ра́скирэ-Дэвлэ́скири ла́ска; пэ яви́р свэнкоскиро дывэ́с ґаздэ́ла лэс раша́й;

¹² и дро дывэ́с, ке́ли ґаздэ́на ґарбо, янэ́н Ра́скэ-Дэвлэ́скэ дрэ цэ́ло схачкирибэ́н екхэ-бэршытконэ бидошэнгирэ бакрорэс,

¹³ и кхэтанэ́ лэ́са маруно́ яныбэ́н дуй дэшта паша́ эфа пшэнично (парнэ́ гивэстыр) яржо́ пиримешындло елеёса, дро Ра́скирэ-Дэв-лэ́скиро свэ́нто дыибэ́н, ваш гудло́ тхув, и вычхуибэн кэ ёв шта́рто гино мол (вино);

¹⁴ ни саво́ нэво́ маро́, ни шукэ́ зя́рки, ни киндэ зя́рки на хан кэ дова́ дывэ́с, дро саво́ янэ́на амарэ́ Ра́скэ-Дэвлэ́скэ яныбэ́н: дава́ исын ве́чно упхэныбэ́н дрэ тумарэ́ ро́ды дрэ сарэ́ тумарэ́ кхэра́.

Свэ́нки пэ Курко

¹⁵ Отгинэн пэ́скэ пэрвонэ́ дывэсэ́стыр коригэды́р (позжэ) свэ́нко, одолэ́ дывэсэ́стыр, дро саво́ тумэ́ янэ́на тринскирибнаскиро ґарбо, эфта́ пхэрдэ́ куркэ,

¹⁶ кэ пэ́рво дывэ́с коригэды́р (позжэ) эфта́то курко отгинэн пандждэша́ дывэса́ и тэды янэ́н нэво́ маруно́ яныбэ́н Ра́скэ-Дэвлэ́скэ:

¹⁷ янэ́н тумарэ́ кхэрэндыр дуй лабы маро́ тэ ґаздэ́н, савэ́ трэй, соб (кай) тэ явэ́н дуе-дэшэнгирэ пашэндыр, савэ́ исын дрэ эфа пшэничнонэ яржэстыр, и трэй тэ явэ́н спэкнэ шутлэ, сыр пэ́рво барьякирдо́ (пло́до) Ра́скэ-Дэвлэ́скэ;

¹⁸ янэ́н кхэтанэ́ марэ́са эфта́ бакрорэ́н бидошакирэн, екхэ-бэршытконэн, и барэ́ кхэритконэ́ мурдалэ́ндыр (ското́стыр) екхэ гуруво́рэс и дуе́н бакрэ́н; мэк тэ явэ́л дава́ дро цэ́ло схачкирибэ́н Ра́скэ-Дэвлэ́скэ, и маруно́ яныбэ́н кхэтанэ́ свэнтонэ́ дыибнаса тэ почхувэн, дро свэ́нто дыибэ́н, дро гудло́ тхув, лачхо́ Ра́скэ-Дэвлэ́скэ.

¹⁹ Кэрэ́н адя́кэ-паць бузнэнгирэ стадатыр екхэ бузнэ́с дрэ свэ́нто дыибэ́н пал грэ́хо, и дуе́н екхэ-бэршытконэн бакрэ́н дрэ ми́рно свэ́нто дыибэ́н.

²⁰ О раша́й исын банго́ тэ янэл дава́, тринскири анги́л Растэ-Дэвлэ́стэ, кхэтанэ́ тринскирдэ марэ́са пэрвонэ́ барьякирдэскирэ (плодоскирэ) и дуе бакрэнца. Дава́ явэ́ла посвэнцындло Ра́скэ-Дэвлэ́скэ; ваш раша́скэ,

²¹ и кхарэ́н манушэ́н дро дава́ дывэ́с, мэк тэ явэ́л тумэ́ндэ свэ́нто скэдыибэ́н, нисави́ буты́ тэ на кэрэ́н: дава́ исын ве́чно упхэныбэ́н дрэ сарэ́ тумарэ́ кхэра́ дрэ тумарэ́ ро́ды.

²² Ке́ли явэ́на тумэ́ пэ тумари́ пхув тэ счхинэн жатва, на чхинэн кэ ко́нцо (кэ яго́ро) тыри́ фэ́лда, ке́ли счхинэса, и со ячэ́лапэ тырэ́ жатватыр, на подкэдэ; чорорэскэ и манушэ́скэ, саво́ явдя́ явирэ рига́тыр ячкир дава́: Мэ сом Рай Дэвэ́л, тумаро́ Дэвэ́л.’”

Свэ́нко Рогэнгиро (Трубэнгиро)

²³ И пхэндя́ Рай Дэвэ́л Мойза́скэ, ракири́:

²⁴ “Пхэн Израилёскирэ чхавэ́нгэ: дрэ эфта́то чхон, пэ англатунэ́-чхонэ́скиро дывэ́с мэк тэ явэ́л тумэ́ндэ откхиныбэн, свэ́нко рогэнгиро (трубэнгиро), свэ́нто скэдыибэ́н;

²⁵ на кэрэ́н нисави́ буты́, и янэ́н Ра́скэ-Дэвлэ́скэ свэ́нто дыибэ́н.”

²⁶ И пхэндя́ Рай Дэвэ́л Мойза́скэ дасавэ́ лава́:

Диенгиро Миро (Рама́нё)

²⁷ “Адя́кэ-паць пэ дэ́што дывэ́с дро дава́-паць эфта́то чхон, дывэ́с тэ жужакирэн пэс, мэк тэ явэ́л тумэ́ндэ свэ́нто скэдыибэ́н; пририкирэн (притасавэн) тумарэ́ дия́, и янэ́н Ра́скэ-Дэвлэ́скэ свэ́нто дыибэ́н;

²⁸ на кэрэ́н нисаво́ рэ́ндо (де́ло) дро дава́ дывэ́с, пал-дова́ со дава́ исын дывэ́с тэ жужакирэнпэ, соб (кай) тэ жужакирэн тумэ́ пэс анги́л Растэ-Дэвлэ́стэ, тумарэ́ Дэвлэ́стэ;

²⁹ а кажно ди, саво́ на пририкирэла пэс пэ дава́ дывэ́с, явэ́ла хасякирдо пэ́скирэ манушэ́ндыр;

³⁰ и ко́ли вари-саво́ ди явэ́ла тэ кэрэ́л вари-саво́ рэ́ндо дро дава́ дывэ́с, Мэ хасякира́ва дава́ ди ла́кирэ манушэ́ндыр;

³¹ на кэрэ́н нисаво́ рэ́ндо: дава́ сын векоскиро упхэныбэ́н дрэ тумарэ́ ро́ды дрэ сарэ́ тумарэ́ кхэра́;

³² дава́ исын ваш тумэ́нгэ дро са́вато тэ откхинёл, и обрикирэн тумарэ́ дия́, бэльвэлятыр долэ́ дывэсэ́стыр дро еня́то дывэ́с чхонэ́скиро; бэльвэлятыр кэ бэльвэ́ль свэнкинэн тумаро́ са́вато.”

³³ И пхэндя́ Рай Дэвэ́л Мойза́скэ, ракири́:

Пал Кушчы (Буды)

³⁴ “Пхэн Израилёскирэ чхавэ́нгэ: дэшупанджэнгиро дывэсэскиро дро дова́-паць эфта́то чхон явэ́ла свэ́нко кушчы (буды), эфта́ дывэса́ Ра́скэ-Дэвлэ́скэ;

³⁵ пэ пэ́рво дывэса́ свэ́нто скэдыибэ́н, на кэрэ́н нисави́ буты́;

³⁶ сарэ́ эфта́ дывэса́ янэ́н Ра́скэ-Дэвлэ́скэ свэ́нто дыибэ́н; пэ охто́то (бидуе́нгиро дэ́што) дывэ́с мэк тэ явэ́л тумэ́ндэ свэ́нто скэдыибэ́н, и янэ́н свэ́нто дыибэ́н Ра́скэ-Дэвлэ́скэ: дава́ исын отдыибэ́н свэнкоскирэ, на кэрэ́н нисави́ буты́.

³⁷ Ѓа́да, исын Ра́скэ-Дэвлэ́скэ свэ́нки, дрэ савэ́ тумэ́нгэ трэй тэ скэдэ́н свэ́нто скэдыибэ́н, соб (кай) тэ янэс дро ягитко свэ́нто дыибэ́н Ра́скэ-Дэвлэ́скэ цэ́ло схачкирибэ́н, маруно́ яныбэ́н, зачхиндлэ́ свэ́нта дыибэна́ и тхадуно дыибэ́н, кажно дро пэ́скиро дывэ́с:

³⁸ апри́ч са́ваты Ра́скирэ-Дэвлэ́скирэ, и апри́ч тумарэ́ да́ры, и апри́ч сарэ́ тумарэ́ совлаха́ и апри́ч саро́, со тумэ́ янэ́на пир тумаро́ ило́, со тумэ́ дэ́на Ра́скэ-Дэвлэ́скэ.

³⁹ А пэ дэшупанджто дывэ́с дро еня́то (биекхэ́скиро дэ́што) чхон, ке́ли тумэ́ укэдэна, со бияндя́ пхув, свэнкинэн Ра́скирэ-Дэвлэ́скиро свэ́нко эфта́ дывэса́: дро пэ́рво дывэ́с откиныбэн и пэ охто́то дывэ́с тэ явэ́л откиныбэн.

⁴⁰ А пэ пэ́рво дывэ́с лэн пэ́скэ гожонэ вэшэ́стыр рандя́ (вэ́тки), пальмакирэ рандя́ и рандя́ буґлэ-патриненгирэ вэшэ́стыр и верба рэка́тыр (лэня́тыр), и радынэ́нпэ пхэрдэ́с анги́л Растэ-Дэвлэ́стэ, тумарэ́ Дэвлэ́стэ, эфта́ дывэса́.

⁴¹ И свэнкинэн дава́ Ра́скирэ-Дэвлэ́скиро свэ́нко эфта́ дывэса́ дро бэрш: дава́ явэ́ла векоскиро упхэныбэ́н дрэ тумарэ́ ро́ды; пэ эфта́то чхон свэнкинэн лэс.

⁴² И явэ́на тумэ́ тэ дживэ́н эфта́ дывэса́ дрэ буды; кажно пэ́скиро ману́ш, Израильтянино исын банго́ тэ дживэ́л дрэ буды,

⁴³ соб (кай) тэ джинэ́н тумарэ́ ро́ды, со дрэ буды чхудём Мэ тэ дживэ́н Израилёскирэ чхавэ́н, ке́ли Мэ вылыджиём лэн Египто́скирэ пхувья́тыр. Мэ сом Рай Дэвэ́л, тумаро́ Дэвэ́л.”

⁴⁴ И дыя́ тэ джинэ́н Мо́йза Израилёскирэ чхавэ́нгэ пал Ра́скирэ-Дэвлэ́скирэ свэ́нки.