Левито 21 - Библия - Пэ Балтитко Романи чиб (Романэс) 2019

Упхэныбэна́ Рашангэ

¹ И пхэндя́ Рай Дэвэ́л Мойза́скэ: “Ра́кир рашангэ, Аароно́скирэ чхавэ́нгэ, и пхэн лэ́нгэ: ‘Мэк ёнэ тэ на магирэ́н пэс чилавибнаса кэ муло́ пэ́скирэ манушэ́ндыр;

² екх со кэ пэ́скири пашатуны сэмэ́нца, кэ пэ́скири дай и кэ пэ́скиро дад, кэ пэ́скиро чхаво́ и кэ пэ́скири чхай, кэ пэ́скиро пшал,

³ и кэ пэ́скири пхэн, сави́ тэ явэ́л дрэ чхая́, и дживдя́ пашы́л лэ́стэ и на сыс палоро́м, сашты́ лэ́скэ тэ кэрэ́л дава́ нажужыпэн;

⁴ и чилавибнаса кэ кон бы да тэ на явэ́л дрэ пэ́скирэ манушэ́ндэ ёв нашты́ тэ магирэл пэс, соб (кай) тэ на ячэ́л нажужо.

⁵ Лэ́нгэ нашты́ тэ чхинэн кэ нангипэ́н (тэ муравэн) пэ́скирэ шэрэ́ и тэ подчхинэн яго́ры (краи́) дрэ пэ́скирэ чхора (брода), и тэ кэрэ́н чхиныбэ́н пэ пэ́скирэ маса́.

⁶ Лэ́нгэ трэй тэ явэ́н свэ́нта пэ́скирэ Дэвлэ́скэ, и лэ́нгэ нашты́ тэ тэлякирэн пэ́скирэ-Дэвлэ́скиро лав, пал-дова́ со ёнэ янэ́на Ра́скэ-Дэвлэ́скэ свэ́нто дыибэ́н (жэ́ртва) пэ яг, маро́ пэ́скирэ Дэвлэ́скэ, и палдава́ исын бангэ́ тэ явэ́н свэ́нта.

⁷ Лэ́нгэ нашты́ тэ лэн пал пэ́стэ биладжакуня джувля́ и дошваля чха, и нашты́ тэ лэн и джувля́, савья́ мэкця́ ла́киро ром, пал-дова́ со ёнэ исын свэ́нта пэ́скирэ Дэвлэ́скэ.

⁸ Высвэнцын лэн, пал-дова́ со ёнэ янэ́на маро́ тырэ́ Дэвлэ́скэ: мэк тэ явэ́н ёнэ ту́тэ свэ́нта, пал дова́ со Мэ сом свэ́нто Рай Дэвэ́л, Саво́ свэнцякирэла тумэн.

⁹ Ко́ли э рашаскири чхай магирэла пэс биладжаипнаса, тэды ёй тэлякирэла пэ́скирэ дадэ́с; яга́са трэй ла тэ хачкирэ́н.

¹⁰ И баро́ раша́й пэ́скирэ пшалэ́ндыр, пэ савэскиро шэро́ чхувэ́ла макхибнаскиро елеё (дзэт), и саво́ исын высвэнцындло, соб (кай) тэ урьелпэ дрэ свэ́нта ризы, нашты́ тэ нангякирэл пэ́скиро шэро́ и тэ на кушэл пэ́скирэ ризы;

¹¹ и ни кэ кон мулэ́ндыр нашты́ ёв тэ подджа́л: адя́кэ-паць чилавибнаса кэ муло́ пэ́скиро дад и пэ́скири дай ёв нашты́ тэ магирэл пэс.

¹² И свэнтонэ́ штэто́стыр ёв нашты́ тэ отджал и тэ тэлякирэл пэ́скирэ Дэвлэ́скиро свэ́нто штэ́то, пал-дова́ лэс высвэнцындлэ макхибнаскирэ елеёса ваш лэ́скирэ-Дэвлэ́скэ. Мэ сом Рай Дэвэ́л.

¹³ Палоро́м лэ́скэ трэй тэ лэл патываля тэрня джувля́.

¹⁴ Лэ́скэ нашты́ тэ лэл джувля́, савьятэ мыя́ ром, ци савья́ ром мэкця́, ци савья́ обхохадэ, ци биладжакуня джувля́, нэ патываля тэрня джувля́ пэ́скирэ манушэ́ндыр исын банго́ ёв тэ лэл палоро́м;

¹⁵ Лэ́скэ нашты́ тэ ладжакирэл пэ́скиро семё (сал) дрэ пэ́скирэ манушэ́ндэ, пал дова́ со Мэ сом Рай Дэвэ́л, Саво́ лэс свэнцякирава.’”

¹⁶ И пхэндя́ Рай Дэвэ́л Мойза́скэ дасавэ́ лава́:

¹⁷ “Ра́кир Аароно́скэ дасавэ́ лава́: ‘Нико́н тырэ́ родо́стыр дрэ сарэ́ лэ́нгирэ ро́ды, савэ́ндэ пэ маса́ явэ́ла наухтылыбэн, нашты́ тэ подджа́л, соб (кай) тэ янэл маро́ пэ́скирэ-Дэвлэ́скэ;

¹⁸ нико́н, конэ́стэ пэ маса́ исын наухтылыбэн, нашты́ тэ подджа́л, ни короро́, ни лангало, ни рагандо (уродо),

¹⁹ ни саво́, конэ́стэ исын пирипхагирды ґэро́й, ци пирипхагирдо васт,

²⁰ ни ґырбаса, ни шукэ́ членоса, ни карлико, ни плямаса пэ якх, ни ґэрало, ни джувало (пошэсяса), ни дошвало мурш (евнухо);

²¹ ние́кх ману́ш рашаскирэ Аароно́скирэ родо́стыр, савэ́стэ пэ маса́ исын наухтылыбэн, нашты́ тэ подджа́л, соб (кай) тэ янэл Ра́скэ-Дэвлэ́скэ свэ́нта дыибэна́; наухтылыбэн исын пэ лэ́стэ, палдава́ лэ́скэ нашты́ тэ подджа́л, соб (кай) тэ янэл маро́ пэ́скирэ-Дэвлэ́скэ.

²² Маро пэ́скирэ Дэвлэ́скиро исын барэ́ свэнтыматыр и свэнтыматыр ёв сашты́ тэ хал;

²³ нэ кэ полого ёв нашты́ тэ явэ́л, и кэ алта́рё нашты́ лэ́скэ тэ подджа́л, пал-дова́ со наухтылыбэн исын пэ лэ́стэ: ёв нашты́ тэ тэлякирэл Миро свэ́нто штэ́то, пал-дова́ со Мэ сом Рай Дэвэ́л, Саво́ свэнцякирэла лэн.”

²⁴ И дыя́ тэ джинэ́л дава́ Мо́йза Аароно́скэ и лэ́скирэ чхавэ́нгэ и сарэ́ Израилёскирэ чхавэ́нгэ.