Левито 20 - Библия - Пэ Балтитко Романи чиб (Романэс) 2019

Кары, Ко́ли Пхагирэна Зако́ны

¹ И пхэндя́ Рай Дэвэ́л Мойза́скэ, ракири́:

² “Ра́кир дава́ Израилёскирэ чхавэ́нгэ: Ко́ли вари-кон Израилёскирэ чхавэ́ндыр и манушэ́ндыр, савэ́ явнэ́ явирэ ригэ́ндыр, савэ́ дживэ́на машки́р Израилитянэндэ, дэ́ла екхэ́с пэ́скирэ чхавэ́ндыр Молохоскэ, одова́ мэк тэ явэ́л отдыно́ мэрибна́скэ, адалэ́ пхувья́кирэ мануша́ мэк тэ замарэ́н лэс барэ́нца;

³ и Мэ рискира́ва Миро муй пэ одолэ́ манушэ́стэ и хасякира́ва лэс лэ́скирэ манушэ́ндыр, пал-дова́ со ёв отдыя́ пэ́скирэ чхавэ́ндыр Молохоскэ, соб (кай) тэ магирэл Миро свэ́нто штэ́то и тэ тэлякирэл свэ́нто Миро лав;

⁴ и, ко́ли адалэ́-пхувья́кирэ мануша́ на рискирэна пэ́скирэ якха́ пэ одолэ́ манушэ́стэ, ке́ли ёв дэ́ла пэ́скирэ чхавэ́ндыр Молохоскэ, и на мулякирэна лэс,

⁵ то тэды Мэ рискира́ва Миро муй пэ одолэ́ манушэ́стэ и пэ лэ́скиро ро́до, и хасякира́ва лэс лэ́скирэ манушэ́ндыр, и сарэ́н, кон псирэ́ла пал лэ́стэ, соб (кай) блэндыи тэ псирэ́н пала́л Молохостэ.

⁶ И ко́ли вари-саво́ ди рискирэ́ла годы́ кэ мануша́, савэ́ выкхарэна мулэн и кэ човаханэ, соб (кай) блэндыи тэ псирэ́с пал лэ́ндэ, тэды Мэ рискира́ва пэ́скиро Муй пэ дова́ ди, и хасякира́ва лэс ла́кирэ манушэ́ндэ.

⁷ Свэнцякирэн пэс и явэ́н свэ́нта, пал-дова́ со Мэ сом Рай Дэвэ́л, тумаро́ Дэвэ́л, и Мэ сом Свэ́нто.

⁸ Ракхэ́н Мирэ́ стату́ты и кэрэ́н саро́ пир лэ́ндэ, пал-дова́ со Мэ сом Рай Дэвэ́л, Саво́ свэнцякирэла тумэн.

⁹ Кон явэ́ла тэ кошэл пэ́скирэ дадэ́с ци пэскирья́ да, одова́ мэк тэ явэ́л отдыно́ мэрибна́скэ; пэ́скирэ дадэ́с и да пэскирья́ ёв костя: лэ́скиро рат явэ́ла пэ лэ́стэ.

¹⁰ Ко́ли вари-кон явэ́ла тэ кэрэ́л биладжаипэ́н палоромитконэ ромня́са, ко́ли вари-кон явэ́ла тэ кэрэ́л биладжаипэ́н пэ́скирэ пашатунэскирэ ромня́са, мэк тэ явэ́н отдынэ́ мэрибна́скэ, биладжакуно и биладжакуны.

¹¹ Ко́ли вари-кон пасёла пэ́скирэ-дадэ́скирэ ромня́са, одова́ хай отчхакирдя́ лэ́скирэ-дадэ́скиро нангипэ́н, мэк тэ явэ́н отдынэ́ мэрибна́скэ дуйджинэ́, лэ́нгиро рат тэ явэ́л пэ лэ́ндэ.

¹² Ко́ли вари-кон пасёла пэ́скирэ борьяса, тэды дуйджинэ́ ёнэ мэк тэ явэ́н отдынэ́ мэрибна́скэ: магирипэ́н ёнэ кэрдэ́, лэ́нгиро рат тэ явэ́л пэ лэ́ндэ.

¹³ Ко́ли вари-кон пасёла муршэса, сыр джувля́са, тэды ёнэ дуйджинэ́ кэрдэ́ магирипэ́н: мэк ёнэ тэ явэ́н отдынэ́ мэрибна́скэ, лэ́нгиро рат тэ явэ́л пэ лэ́ндэ.

¹⁴ Ко́ли вари-кон лэ́ла пэ́скэ ромня́ и лакирья да: дава́ исын проти зако́но; пэ яг трэй тэ хачкирэ́н лэс и лэн, соб (кай) тэ на пхагирэн зако́но машки́р тумэ́ндэ.

¹⁵ Кон кхэтанякирэлапэ кхэритконэ́ мурдалэса (скотоса), одолэ́с тэ отдэс мэрибна́скэ, и мурдалэс тэ замарэ́н.

¹⁶ Ко́ли джувлы́ джа́ла кэ вари-саво́ мурда́л (жывотно), соб (кай) тэ кэрэ́л биладжаипэ́н лэ́са, тэды замар джувля́ и мурдалэс, мэк тэ явэ́н ёнэ отдынэ́ мэрибна́скэ, лэ́нгиро рат тэ явэ́л пэ лэ́ндэ.

¹⁷ Ко́ли вари-кон лэ́ла пэскирья́ пхэня́, пэ́скирэ-дадэ́скирэ чха ци пэ́скирэ-да́кирэ чха, и удыкхэ́ла ла́киро нангипэ́н, и ёй удыкхэ́ла лэ́скиро нангипэ́н: дава́ исын ладж, мэк тэ явэ́н ёнэ хасякирдэ́ анги́л пэ́скирэ-чхавэ́нгирэ манушэ́нгирэ якха́; ёв отчхакирдя́ пэ́скирэ-пхэнякиро нангипэ́н: пэ́скиро грэ́хо лыджа́ла ёв.

¹⁸ Ко́ли кон пасёла ромня́са дрэ дава́ часо, ке́ли ла́тэ джувликаны дукх, и отчхакирэла ла́киро нангипэ́н, тэды ёв отчхакирдя́ ла́киро тхадыпэн, и ёй отчхакирдя́ пэ́скирэ рата: дуйджинэ́ ёнэ мэк тэ явэ́н хасякирдэ́ пэ́скирэ манушэ́ндыр.

¹⁹ На отчхакир нангипэ́н тырэ́-да́кирэ пхэнякиро и тырэ́-дадэ́скирэ пхэнякиро, пал-дова́ со адасаво́ ману́ш нангякирэла пэ́скири сэмэ́нца; грэ́хо пэ́скиро лыджа́на ёнэ.

²⁰ Кон пасёла пэ́скирэ бибьяса, одова́ отчхакирдя́ нангипэ́н пэ́скирэ какэскиро; грэ́хо пэ́скиро лыджа́на ёнэ, би чхаворэнгиро мэрэ́на ёнэ.

²¹ Ко́ли вари-кон лэ́ла пэ́скирэ-пшалэ́скирэ ромня́: дава́ исын джунгало́ (брыдко) рэ́ндо; ёв отчхакирдя́ пэ́скирэ-пшалэскиро нангипэ́н, би чхаворэнгиро явэ́на ёнэ.

²² Ракхэ́н сарэ́ Мирэ́ стату́ты и сарэ́ зако́ны Мирэ́, и кэрэ́н саро́ пир лэ́ндэ, и на вычхурдэла тумэн пэ́стыр пхув, пэ сави́ Мэ лыджа́ва тумэн тэ дживэ́н.

²³ На кэрэ́н пир манушы́тко присыкляибэн, савэ́н Мэ традава криг тумэ́ндыр; пал-дова́ со ёнэ кэрдэ́ саро́ дава́, и Мэ холясыём пэ лэ́ндэ,

²⁴ и пхэндём Мэ тумэ́нгэ: ‘тумэ́ хулаинэна лэ́нгирэ пхувья́са, и тумэ́нгэ отда́ва дро мэкно́ миштыпэ́н (наследство) пхув, дрэ сави́ тхадэ́ла тхуд и авги́н. Мэ сом Рай Дэвэ́л, тумаро́ Дэвэ́л, саво́ чхудя́ дрэ риг тумэн сарэ́ манушэ́ндыр.

²⁵ Роскэдэн пэ́скэ жужэ́ мурдалэс нажужэстыр и жужэ́ чирикля́ нажужатыр, и на магирэ́н тумарэ́ дия́ мурдалэса и чирикляса и сарэ́са, со ползынэла пир пхув, со приґалыём Мэ, сыр нажужо.

²⁶ Явэ́н свэ́нта анги́л Ма́ндэ, пал-дова́ со Мэ сом Рай Дэвэ́л, тумаро́ Дэвэ́л, сом Свэ́нто, и Мэ чхудём дрэ риг тумэн манушэ́ндыр, соб (кай) тумэ́ тэ явэ́н Мирэ́.

²⁷ Мурш ци джувлы́, ко́ли ёнэ явэ́на тэ выкхарэн мулэн ци тэ човаханякирэн, мэк тэ явэ́н отдынэ́ ёнэ мэрибна́скэ, трэй тэ домарэн лэн барэ́нца, лэ́нгиро рат тэ явэ́л пэ лэ́ндэ.’”