Левито 2 - Библия - Пэ Балтитко Романи чиб (Романэс) 2019

Пал Маруно́ Яныбэ́н

¹ Ко́ли вари-конэ́стэ пэ ило́ тэ янэл Ра́скэ-Дэвлэ́скэ маруно́ свэ́нто дыибэ́н, мэк тэ янэл яржо́ парнэ́ гивэстыр, и чхувэ́ла пэ лэ́стэ елеё (оливи́тко дзэт), и чхувэ́ла пэ лэ́стэ ливано,

² и янэ́ла лэс кэ Аароно́скирэ чхавэ́, кэ рашая́, и лэ́ла пхэрды́ бурнык (жменя) яржо́ елеёса и сарэ́ ливаноса, и схачкирэ́ла раша́й дава́ сыр рипирибэ́н пэ алта́рё; дава́ исын свэ́нто дыибэ́н, гудло́ тхув, Ра́скэ-Дэвлэ́скэ;

³ а со ячэ́ла марунэ яныбнастыр, дова́ явэ́ла Аароно́скэ и лэ́скирэ чхавэ́нгэ: дава́ исын най барэды́р свэнтыма Ра́скирэ-Дэвлэ́скирэ свэнтонэ́ дыибна́стыр (жэртвэндыр).

⁴ Ко́ли янэса свэ́нто дыибэ́н сыр маруно́ яныбэ́н, саво́ исын пэкно дро бов, тэды ян пшенична марэ́ пресна, пиримешындлэ елеёса, ци пресна марикля, помакхнэ елеёса.

⁵ Ко́ли тыро́ свэ́нто дыибэ́н исын маруно́ яныбэ́н скороведатыр (хичатыр), то тэды дава́ трэй тэ явэ́л пшэнично яржо́, пиримешындло елеёса, пресно;

⁶ роспхагир лэс пэ котэра́ (куски), и чхув пэ лэ́стэ елеё: дава́ исын маруно́ яныбэ́н.

⁷ Ко́ли тыро́ свэ́нто дыибэ́н исын маруно́ яныбэ́н пирьятыр, то тэды трэй тэ кэрэ́л лэс пшэничнонэ яржэстыр елеёса (оливитконэ дзэтэса),

⁸ и ян маруно́ яныбэ́н, саво́ счхудо далэ́стыр, Ра́скэ-Дэвлэ́скэ; отдэ́ лэс раша́скэ, а ёв лэс янэ́ла кэ алта́рё;

⁹ и лэ́ла раша́й далэ́ свэнтонэ́ дыибна́стыр паш сыр рипирибэ́н, и схачкирэ́ла пэ алта́рё: дава́ исын свэ́нто дыибэ́н, гудло́ тхув, Ра́скэ-Дэвлэ́скэ;

¹⁰ а со ячэ́лапэ марунэ яныбнастыр, то мэк тэ явэ́л Аароно́скэ и лэ́скирэ чхавэ́нгэ: дая́ исын бари свэнтыма свэнтонэ́ дыибна́стыр (жэртвэндыр) Ра́скэ-Дэвлэ́скэ.

¹¹ Ни саво́ маруно́ яныбэ́н, саво́ янэ́на Ра́скэ-Дэвлэ́скэ, на кэрэ́н квашэно пэ дрожджы, пал-дова́ со ни квашэно, ни авги́н нашты́ тумэ́ тэ хачкирэ́н дро свэ́нто дыибэ́н Ра́скэ-Дэвлэ́скэ;

¹² сыр яныбэ́н пэрвонэ́ барьякирдэндыр (плодэндыр) янэ́на лэн Ра́скэ-Дэвлэ́скэ, а пэ алта́рё нашты́ тэ чхувэ́н лэн ваш гудло́ тхув.

¹³ Кажно тыро́ маруно́ яныбэ́н лондькир лондэса, и на ячкир тыро́ свэ́нто дыибэ́н би лондэскиро тырэ́ Дэвлэ́скирэ заветостыр: кажнонэ́ тырэ́ яныбнаса ян лонд.

¹⁴ Ко́ли янэса Ра́скэ-Дэвлэ́скэ пэрвонэ́ барьякирлдэндыр маруно́ яныбэ́н, ян дро да́ро тырэ́ англатунэ́ барьякирдэндыр, савэ́ исын колосэндыр, савэ́ вышутькирдэ пэ яг, ростасадэ зя́рки,

¹⁵ и чхув пэ лэ́ндэ елеё, и чхув пэ лэ́ндэ ливано: дава́ исын маруно́ яныбэ́н;

¹⁶ и схачкирэ́ла раша́й сыр рипирибэ́н паш зя́рки и елеё сарэ́ ливаноса: дава́ исын свэ́нто дыибэ́н (жэ́ртва) Ра́скэ-Дэвлэ́скэ.