Левито 19 - Библия - Пэ Балтитко Романи чиб (Романэс) 2019

Пирипхэныбэн Дэштунэнгирэ

¹ И пхэндя́ Рай Дэвэ́л Мойза́скэ дасавэ́ лава́:

² “Ра́кир сарэ́ скэдыибнаскэ Израилёскирэ чхавэ́нгирэ и пхэн лэ́нгэ: ‘Явэ́н свэ́нта, пал-дова́ со Мэ сом свэ́нто Рай Дэвэ́л, Дэвэ́л тумаро́.

³ Дар кажно (сва́ко) ману́ш пэ́скирэ датыр и пэ́скирэ дадэ́стыр, и ракхэ́н Мирэ́ са́ваты (суботы). Мэ сом Рай Дэвэ́л, тумаро́ Дэвэ́л.

⁴ На мангэ́нпэ идолэ́нгэ, и на кэрэ́н пэ́скэ вычхудэ́ дэвлорэ́. Мэ сом Рай Дэвэ́л, тумаро́ Дэвэ́л.

⁵ Ке́ли явэ́на тэ янэ́н Ра́скэ-Дэвлэ́скэ ми́рно свэ́нто дыибэ́н, тэды янэ́н лэс, соб (кай) тэ дорэсэн пэ́скэ Дэвлэ́скири ла́ска:

⁶ дро дывэ́с, ке́ли тумэ́ янэ́на свэ́нто дыибэ́н (жэ́ртва) дро дывэ́с и пэ яви́р дывэ́с тумэ́нгэ трэй тэ хан лэс, а со ячэ́лапэ кэ три́то дывэ́с исын бангэ́ тэ схачкирэн пэ яг;

⁷ ко́ли вари-кон лэ́ла лэс тэ хал пэ три́то дывэ́с, дава́ исын джунгало́ (брытко): дава́ на явэ́ла Ра́скэ-Дэвлэ́скэ пир Зако́но;

⁸ кон лэ́ла ла тэ хал, одова́ лыджа́ла пэ пэ́стэ грэ́хо, пал-дова́ со ёв магирдя Ра́скирэ-Дэвлэ́скири свэнтыма, и хасёла дова́ ди пэ́скирэ манушэ́ндыр.

⁹ Ке́ли явэ́на тэ укэдэн, со выбария пэ яго́ро (пэ краё) пэ тыри́ фэ́лда, и со ячэ́лапэ тырэ́ укэдыибнастыр, на подкэдэ,

¹⁰ и тыро́ винаградо (дракх) на обкэдэ кэ жужыпэн, и му́ри, савэ́ пынэ́ дро винагра́днико, на ґа́здэ, ячкир дава́ чорорэскэ и манушэ́скэ, саво́ явдя́ явирэ рига́тыр. Мэ сом Рай Дэвэ́л, Дэвэ́л тумаро́.

¹¹ На чорэн, на ракирэ́н начачипэ́н, на хохавэн екх екхэ́с.

¹² На дэн хоханы совэ́л, причхуви кэ дава́ лав Миро на магирэ́н пэ́скирэ Дэвлэ́скиро. Мэ сом Рай Дэвэ́л.

¹³ На притасав тырэ́ пашатунэс, и на лэ буты́р сыр трэй. Плэскирибэн бутярнэскэ нашты́ тэ ячкирэс кэ ра́нко (кэ зло́ко).

¹⁴ На обракир кашукэс, и на чхув ничи́ анги́л корорэстэ, соб (кай) тэ на пэрэ́л ёв, дар Ра́стыр-Дэвлэ́стыр тырэстыр. Мэ сом Рай Дэвэ́л.

¹⁵ На сэндякирэс хоханэ́с пэ сэ́ндо; на яв проти чорорэстэ и на кэр гудлэс (на ладин) барвалэ́ манушэ́нгэ. Пир чачипэ́н сэндякир тырэ́ пашатунэс.

¹⁶ На псир пиридыибнариса машки́р тырэ́ манушэ́ндэ, и на ґаздэпэ пэ тырэ́-пашатунэскиро джиибэ́н. Мэ сом Рай Дэвэ́л.

¹⁷ На рикир холы́ дрэ тыро́ ило́ пэ тырэ́ пшалэ́стэ; сыка́в банг тырэ́ пашатунэскэ, и на явэ́ла пал лэ́стэ грэ́хо.

¹⁸ На отдэ́ палэ чорипнаса (на отха палэ), и на рикир холы́ пэ тырэ́-манушэ́нгирэ чхавэ́ндэ, а сыка́в паты́в кэ тыро́ пашатуно, сыр пэ́скэ. Мэ сом Рай Дэвэ́л.

¹⁹ Ракхэ́н Мирэ́ упхэныбэна́; тырэ́ кхэритконэ́ мурдалэс (ското) на злыжа явирэ породаса; фэ́лда тыри́ на зачхув дуе разнонэ зяркэнца; на урипэ дрэ ризы (дро урибэ́н) кажнонэ́ тхавэндыр, вылна́тыр и ґандладэстыр (лёностыр).

²⁰ Ко́ли вари-кон пирисовэла джувля́са, а ёй исын писхарица, ангрустякирды (обрэнчындлы) ромэса, нэ ишчо (инкэ́) навыкиндлы, ци вольныма ишчо (инкэ́) нанэ дыны́ ла́кэ: тэды трэй тэ чхувэ́с ка́ра ишчо (инкэ́) пэ лэ́ндэ, нэ на мэрибнаса, пал-дова́ со ёй исын на во́льно.

²¹ Мэк ёв тэ янэл Ра́скэ-Дэвлэ́скэ кэ загиибэ́н дрэ ша́тра скэдыибна́скири бакрэ́с пал исын банг, дро свэ́нто дыибэ́н пал пэ́скири исын банг;

²² и выжужакирэ́ла лэс о раша́й бакрэса пал банг анги́л Растэ-Дэвлэ́стэ грэхостыр, и отмэкно явэ́ла лэ́скэ грэ́хо, саво́ ёв кэрдя́.

²³ Ке́ли тумэ́ явэ́на пэ пхув, сави́ Рай Дэвэ́л дэ́ла тумэ́нгэ, и почхувэна тумэ́ вари-саво́ плодэнгиро вэш, тэды лэ́скирэ барьякирдэ́ (пло́ды) гинэн пал наобчхиндлэ, нашты́ тэ хан лэн;

²⁴ а пэ шта́рто бэрш сарэ́ лэ́скирэ барьякирдэ́ трэй тэ явэ́н свэнциндлэ ваш Ра́скирэ-Дэвлэ́скирэ свэ́нки;

²⁵ а пэ па́нджто бэрш тумэ́ сашты́ тэ хан лэ́скирэ барьякирдэ́ и тэ скэдэ́н пэ́скэ саро́, со лэ́стыр исын. Мэ сом Рай Дэвэ́л, Дэвэ́л тумаро́.

²⁶ На хан ничи́ ратэ́са; на драбакирэн и на човаханякирэн.

²⁷ На обчинэн тумарэ́ шэрэскирэ бала́ сарэ́ ригэ́ндыр, и на подчин тырэ́ чхорэнгиро (бродакиро) яго́ро (краё).

²⁸ Ваш рипирибэ́н пал мулэстэ на кэрэ́н чхиныбэ́н пэ тумарэ́ маса́, и на выпхусавэн пэ тумарэ́ маса́ вари-саво́ зачхиныбэн. Мэ сом Рай Дэвэ́л.

²⁹ На магир тырья чха, домэки ла кэ блэ́ндо, соб (кай) тэ на явэ́л блэ́ндо пэ пхув и тэ на пхэрдёл пхув злыднимаса.

³⁰ Ракхэ́н мирэ́ са́ваты (суботы) и дэн паты́в Мирэ́ свэнтонэ́ штэтоскэ. Мэ сом Рай Дэвэ́л.

³¹ На рискирэ́н годы́ кэ мануша́, савэ́ выкхарэна мулэн, и на псирэ́н кэ човаханэ, и на долыджан пэс кэ магирипэ́н лэ́ндыр. Мэ сом Рай Дэвэ́л, тумаро́ Дэвэ́л.

³² Анги́л пхурэ́ манушэ́стэ ушты́ и кутякир лэ́скиро пхурипэн, и дар тырэ́ Дэвлэ́стыр. Мэ сом Рай Дэвэ́л.

³³ Ке́ли явэ́ла тэ дживэ́л ману́ш явирэ рига́тыр пэ тумари́ пхув, на притасавэн лэс;

³⁴ о ману́ш, саво́ притрадыя явирэ рига́тыр, и яця́ тэ дживэ́л тумэ́ндэ; мэк тэ явэ́л ваш тумэ́нгэ дасаво-паць, сыр тумаро́ ману́ш исын; сыка́в паты́в лэ́скэ, сыр пэ́скэ; пал-дова́ со и тумэ́ са́нас мануша́, савэ́ явнэ́ явирэ рига́тыр пэ Египто́скири пхув. Мэ сом Рай Дэвэ́л, тумаро́ Дэвэ́л.

³⁵ На кэрэ́н хохаибэ́н пэ сэ́ндо, дрэ ме́ра, дрэ вага (весо) и дрэ ме́ра тэ чхувэ́с:

³⁶ мэк тэ явэ́н тумэ́ндэ ублады́тка (весы) чачунэ́, гири чачунэ́, эфа чачуны́ и гино чачуно́. Мэ сом Рай Дэвэ́л, тумаро́ Дэвэ́л, Саво́ вылыджия́ тумэн Египто́скирэ пхувья́тыр.

³⁷ Ракхэ́н сарэ́ Мирэ́ упхэныбэна́ и сарэ́ Мирэ́ Зако́ны и кэрэ́н пир лэ́ндэ. Мэ сом Рай Дэвэ́л.’”