Левито 18 - Библия - Пэ Балтитко Романи чиб (Романэс) 2019

Зако́но пал Романдыпэн

¹ И пхэндя́ Рай Дэвэ́л Мойза́скэ, ракири́:

² “Ракирэ́н Израилёскирэ чхавэ́нгэ и пхэн лэ́нгэ: ‘Мэ сом Рай Дэвэ́л, тумаро́ Дэвэ́л.

³ На кэрэ́н рэ́нды пир зако́ны Египто́скирэ-пхувья́кирэ, пэ сави́ тумэ́ дживдэ́, на кэрэ́н, и пир Ханаано́скири-пхувья́кирэ зако́ны, пэ сави́ Мэ лыджа́ва тумэн, на кэрэ́н и пир лэ́нгирэ упхэныбэна́ на псирэ́н.

⁴ Нэ тэ кэрэ́н пир Мирэ́ зако́ны и тэ ракхэ́н Мирэ́ упхэныбэна́, кэрэ́н пир лэ́ндэ. Мэ сом Рай Дэвэ́л, тумаро́ Дэвэ́л.

⁵ Ракхэ́н Мирэ́ упхэныбэна́ и Мирэ́ зако́ны, савэ́ трэй тэ кэрэ́н кэ ко́нцо / яго́ро (тэ сполнинэн), и, ко́ли тумэ́ кэрэ́на пир лэ́ндэ, тумэ́ явэ́на джидэ́. Мэ сом Рай Дэвэ́л, тумаро́ Дэвэ́л.

⁶ Нико́н тумэ́ндыр ни кэ сави́ сэмэ́нца пир лоч (плоть) нашты́ тэ подджа́л пашы́л долэса, соб (кай) тэ отчхакирэл нангипэ́н. Мэ сом Рай Дэвэ́л.

⁷ Нангипэ́н тырэ́-дадэ́скиро и нангипэ́н тырэ́-дакири на отчхакир. Ёй исын тыри́ дай, на отчхакир ла́киро нангипэ́н.

⁸ Нангипэ́н тырэ́-дадэ́скирэ ромнякиро на отчхакир: дава́ исын нангипэ́н тырэ́-дадэ́скиро.

⁹ Нангипэ́н тырэ́-пхэнякиро, тырэ́-дадэ́скирэ чхакиро ци тырэ́-да́киро чхакиро, сави́ бия́ндыя дро кхэр ци на кхэрэ́, на отчхакир лэ́нгиро нангипэ́н.

¹⁰ Нангипэ́н тырэ́-чхавэ́скирэ чхакиро ци тырэ́-чхакирэ чхакиро, на отчхакир лэ́нгиро нангипэ́н, пал-дова́ со ёнэ исын тыро́ нангипэ́н.

¹¹ Нангипэ́н тырэ́-дадэ́скирэ ромнякирэ чхакиро, сави́ исын тырэ́ дадэ́стыр, ёй исын тыри́ пхэн пир дадэ́стэ, на отчхакир ла́киро нангипэ́н.

¹² Нангипэ́н тырэ́-дадэскирья пхэня́ на отчхакир, ёй исын дадэ́са екхэ ратэстыр.

¹³ Нангипэ́н тырэ́-да́кирэ пхэня́ на отчхакир, пал-дова́ со ёй исын даса екхэ ратэстыр.

¹⁴ Нангипэ́н тырэ́-дадэ́скирэ пшалэскиро на отчхакир и на подджа кэ лэ́скири ромны́, пал-дова́ со её исын тыри́ биби.

¹⁵ Нангипэ́н тырэ́-борьякиро на отчхакир, пал-дова́ со её исын ромны́ тырэ́ чхавэ́скэ, на отчхакир ла́киро нангипэ́н.

¹⁶ Нангипэ́н тырэ́-пшалэ́скирэ ромнякиро на отчхакир, пал-дова́ со дава́ исын тырэ́-пшалэ́скирэ нангипэ́н.

¹⁷ Нангипэ́н джувля́киро и ла́кирэ-чхакиро на отчхакир, ла́кирэ-чхавэ́скиро чха и ла́кирэ-чхакирэ чха на лэ палоро́м, соб (кай) тэ отчхакирэл лэ́нгиро нангипэ́н. Ёнэ исын екхэ ратэстыр ла́са, дава́ исын злыднима.

¹⁸ На лэ палоро́м пэ́скирэ джувля́ кхэтанэ́ ла́кирэ пхэняса, соб (кай) ёй тэ на зэвлынэл, и соб (кай) тэ отчхакирэл ла́киро нангипэ́н, пака тыри́ ромны́ исын джиды.

¹⁹ И кэ ромны́ дро часо, ке́ли ла́тэ исын джувликаны дукх, на чилав ла, соб (кай) тэ отчхакирэс ла́киро нангипэ́н.

²⁰ И ромня́са тырэ́ пашатунэскирэса на пасёв, соб (кай) тэ вычхувэс семё (сал) и тэ магирэспэ ла́са.

²¹ Тырэ́ чхавэ́ндыр на отдэ́ тэ дынаринэ́н Молохоскэ, и на ладжакир тырэ́ Дэвлэ́скиро лав. Мэ сом Рай Дэвэ́л.

²² На пасёв муршэса, сыр джувля́са, дава́ исын магирипэ́н.

²³ И нисавэ кхэритконэ́ мурдалэса (скотоса) на пасёв, соб (кай) тэ вычхувэс семё (сал) и тэ магирэспэ лэ́стыр: и джувлы́ нашты́ тэ тэрдёл анги́л кхэритконэ́ мурдалэ́стэ (анги́л ското) ваш на́лачхо рэ́ндо, дава́ исын джунгалыпэ́н (гидота).

²⁴ На магирэ́н пэс ни со́са далэ́са, пал-дова́ со сарэ́са далэ́са магирдэ́ пэс мануша́, савэ́н Мэ традава тумэ́ндыр.

²⁵ И магирдяпэ пхув, и Мэ дыкхцём ла́киро фуипэ́н, и чхурдыя́ криг пэ́стыр пхув манушэ́н сы́рбы чадыя, савэ́ дживдэ́ пэ ла́тэ.

²⁶ А тумэ́ ракхэ́н Мирэ́ упхэныбэна́ и Мирэ́ зако́ны, и на кэрэ́н сарэ́ далэ́ магирипэна, ни пэ́скиро ману́ш, ни ману́ш, саво́ явдя́ явирэ рига́тыр, саво́ и дживэ́ла машки́р тумэ́ндэ.

²⁷ Пал-дова́ со сарэ́ далэ́ магирибэна кэрдэ́ далэ́-пхувья́кирэ мануша́, савэ́ дживдэ́ анги́л тумэ́ндэ, и магирдяпэ пхув.

²⁸ Нэ, соб (кай) пхув тэ на отрискирэл тумэн пэ́стыр, сыр тумэ́ явэ́на тэ магирэ́н ла, адя́кэ-паць сыр ёй уже отрискирдя пэ́стыр манушы́тка на́цыи, савэ́ сыс вагэдыр (англэды́р) тумэ́ндыр.

²⁹ Пал-дова́ со, ко́ли вари-кон явэ́ла тэ кэрэ́л далэ́ джунгалэ́ (стэтка) рэ́нды, то одолэнгирэ дия́, савэ́ кэрдэ́ адя́кэ, явэ́на чхурдынэ́ тэ хасён лэ́нгирэ манушэ́ндыр.

³⁰ Палдава́ ракхэ́н Мирэ́ упхэныбэна́, соб (кай) тумэ́ тэ на кэрэ́н пир джунгалэ́ присыкляибэна, пир савэ́ кэрдэ́ мануша́, савэ́ сыс вагэдыр тумэ́ндыр, и соб (кай) тумэ́нгэ тэ на магирэнпэ. Мэ сом Рай Дэвэ́л, Дэвэ́л тумаро́.’”