Левито 10 - Библия - Пэ Балтитко Романи чиб (Романэс) 2019

Надаво и Авиудо Яндлэ́ Чужо Яг

¹ Надаво и Авиудо (Авигу), Аароно́скирэ чхавэ́, лынэ́ кажно пэ́скири кадила, и чхудэ́ дрэ лэ́ндэ яг, и зачхудэ дрэ ла́тэ дро́га смо́лы тэ тхувлякирэн, и яндлэ́ анги́л Растэ-Дэвлэ́стэ яг чу́жо, пэ сави́ Ёв на дыя́ во́ля лэ́нгэ;

² и выгия́ яг Ра́стыр-Дэвлэ́стыр, и хачкирдя́ лэн, мынэ́ ёнэ анги́л Растэ-Дэвлэ́стэ.

³ И пхэндя́ Мо́йза Аароно́скэ: “Ѓа́да, пал со ракирдя́ Рай Дэвэ́л, ке́ли Ёв пхэндя́: ‘Дрэ одолэ́ндэ, савэ́ явэ́на пашылэды́р кэ Мэ и Мэ высвэнцынавапэ и анги́л сарэ́ манушэ́ндэ прославинавапэ.’” Ааро́но сыс штыл.

⁴ И кхардя́ Мо́йза Мисаилос и Елцафанос, Узиилоскирэ чхавэ́н, Аароно́скирэ какэскирэн, и пхэндя́ лэ́нгэ: “Джа́н, вылыджан тумарэ́ пшалэ́н свэнтонэ́ штэто́стыр пал ста́но.”

⁵ И гинэ́, и вылыджинэ́ лэн дрэ хитоны лэ́нгирэ пал ста́но.

⁶ И пхэндя́ Мо́йза Аароно́скэ и Елизароскэ и Ифамароскэ, лэ́скирэ чхавэ́нгэ: “На злэн кидары тумарэ́ шэрэндыр и и́ди тумарэ́ тэ на кушэн, соб (кай) тумэ́нгэ тэ на мэрэ́н и тэ на выкхарэн холы́ пэ сарэ́ манушэ́ндэ. Нэ тумарэ́ пша́ла, саро́ Израилёскиро кхэр, сашты́ (могинэ́на) тэ ровэ́н пал схачкирдэндэ, савэ́н хачкирдя́ Рай Дэвэ́л,

⁷ и на выджа́н скэдыибнаскирэ скиниякирэ вударэндыр, соб (кай) тумэ́нгэ тэ на мэрэ́н, пал-дова́ со пэ тумэ́ндэ исын Ра́скирэ-Дэвлэ́скиро макхибнаскиро елеё.” И кэрдэ́ ёнэ пир Мойза́скиро лав.

Пал Рашандэ

⁸ И пхэндя́ Рай Дэвэ́л Аароно́скэ, ракири́:

⁹ “На пи, ту и тырэ́ чхавэ́ ту́са, мол (вино) и пибэна зоралэ́, ке́ли заджа́на дрэ скэдыибна́скири ша́тра, соб (кай) тэ на мэрэ́н.” Дава́ явэ́ла ве́чно упхэныбэ́н дрэ тумарэ́ ро́ды,

¹⁰ соб (кай) тумэ́ могиндлэ́ тэ роскэдэн свэ́нто насвэнтонэстыр, и жужо́ нажужэстыр,

¹¹ и тэ сыклякирэ́н Израилёскирэ чхавэ́н сарэ́ упхэныбнэнгэ, савэ́ дыя́ лэ́нгэ Рай Дэвэ́л пир Мойзастэ.

¹² И пхэндя́ Мо́йза Аароно́скэ и Елизароскэ и Ифамароскэ, савэ́ ячнэ́пэ лэ́скирэ чхавэ́ндыр: “Лэн маруно́ яныбэ́н, саво́ яця́пэ Ра́скирэ-Дэвлэ́скирэ свэнтонэ́ дыибнэндыр, и хан лэс преснонэ (бидрожджэнгирэ) пашы́л алта́рё, пал-дова́ со дава́ исын бари свэнтыма;

¹³ и хан лэс пэ свэ́нто штэ́то, пал-дова́ со дава́ исын котэ́р (куско) тыро́, и котэ́р тырэ́ чхавэ́нгиро Ра́скирэ-Дэвлэ́скирэ свэнтонэ́ дыибнэндыр: адя́кэ ма́нгэ пхэндло́ Ра́стыр-Дэвлэ́стыр;

¹⁴ и колы́н тринскирибнаскиро, псико́ ґаздыпнаскиро хан пэ жужо́ штэ́то, ту и тырэ́ чхавэ́, и тырэ́ чхая́ ту́са, пал-дова́ со дава́ дыно́ дро котэ́р ту́кэ и дро котэ́р тырэ́ чхавэ́нгэ Израилёскирэ чхавэ́нгирэ мирнонэ свэнтонэ́ дыибна́стыр;

¹⁵ ґаздыпнаскиро псико́ и тринскирибнаскиро колы́н ёнэ исын бангэ́ тэ янэ́н чэкэнэскирэ (тукоскирэ) свэнтонэ́ дыибнэнца (жэртвэнца), тринскири анги́л Растэ-Дэвлэ́стэ, и, мэк тэ явэ́л дава́ вечнонэ котэрэса ту́кэ и тырэ́ чхавэ́нгэ ту́са, сыр пхэндя́ Рай Дэвэ́л.”

¹⁶ И лыя́ добусовэс (старательнэс) тэ родэ́л Мо́йза бузнэ́с сыр свэ́нто дыибэ́н пал грэ́хо, и ґа́да, ёв схачкирдо. И росхолясыя ёв пэ Елизаростэ и Ифамаростэ, савэ́ ячнэ́пэ Аароно́скирэ чхавэ́ндыр, и пхэндя́:

¹⁷ “Со́скэ тумэ́ на ханэ́ свэ́нта дыибэна́ пал грэ́хо пэ свэ́нто штэ́то? Пал-дова́ со ёй исын бари свэнтыма, и ёй дыны́ тумэ́нгэ, соб (кай) тэ лэн пэ пэ́стэ грэ́хи манушэ́ндыр и тэ жужакирэн лэн анги́л Дэвлэ́стэ;

¹⁸ ґа́да, лэ́скиро рат на залыджино андрэ́ свэ́нто штэ́то, а тумэ́нгэ трэиндя́ сыс тэ хан лэс пэ свэ́нто штэ́то, сыр сыс пхэндло́ ма́нгэ.”

¹⁹ Ааро́но пхэндя́ Мойза́скэ: “Ѓа́да, ададывэ́с яндлэ́ ёнэ пэ́скиро свэ́нто дыибэ́н пал грэ́хо и пэ́скиро цэ́ло схачкирибэ́н анги́л Растэ-Дэвлэ́стэ, и дава́ кэрдя́пэ ма́нца; ко́ли мэ ададывэ́с ява́ва тэ хав свэ́нто дыибэ́н пал грэ́хо, ци явэ́ла дава́ лачхо́ Ра́скэ-Дэвлэ́скэ?”

²⁰ И шундя́ Мо́йза дава́, и шардя.