Левито 1 - Библия - Пэ Балтитко Романи чиб (Романэс) 2019

Пал Цэ́ла Схачкирибэна

¹ И кхардя́ Рай Дэвэ́л Мойза́с, и пхэндя́ лэ́скэ скэдыибнаскирэ шатратыр, пхэни́:

² “Пхэн Израилёскирэ чхавэ́нгэ и пхэн лэ́нгэ: ке́ли вари-кон тумэ́ндыр камэ́ла тэ янэл свэ́нто дыибэ́н (жэ́ртва) Ра́скэ-Дэвлэ́скэ, тэды, ко́ли кхэритконэ́ мурдалэ́ндыр (ското́стыр), то соб (кай) тэ янэ́н тумэ́ тумаро́ свэ́нто дыибэ́н ґуртостыр ци стадатыр:

³ ко́ли лэ́скиро свэ́нто дыибэ́н исын цэ́ло схачкирибнаскиро дыибэ́н барэ́ кхэритконэ́ мурдалэ́ндыр, мэк тэ янэл лэс муршканэ́ родо́стыр, тэ явэ́л ёв бидошэ́нгиро; мэк тэ янэл лэс кэ вудара́ скэдыибна́скири ша́тра, соб (кай) лэ́скэ тэ латхэл ла́ска анги́л Растэ-Дэвлэ́стэ;

⁴ и чхувэ́ла пэ́скиро васт пэ шэро́ ваш цэ́ло схачкирибнаскиро свэ́нто дыибэ́н, и латхэ́ла ёв ла́ска, тэ жужакирэл ёв пэс грэхэ́ндыр;

⁵ и зачхинэла гуруво́рэс (тельцос) анги́л Растэ-Дэвлэ́стэ. Аароно́скирэ чхавэ́, рашая́, мэк тэ янэ́н рат, и мэк тэ брызгинэн ратэ́са сарэ́ ригэ́ндыр пэ алта́рё, саво́ исын пашы́л загиибэ́н дрэ скэдыибна́скири ша́тра;

⁶ и злэла цы́па цэлонэ́-хачкирибнаскирэ свэнтонэ́ дыибна́стыр, и росчингирэла лэс пэ паша́;

⁷ Аароно́скирэ чхавэ́, рашая́, чхувэ́на пэ алта́рё яг, и пэ яг росчхувэна кашта́;

⁸ и росчхувэна Аароно́скирэ чхавэ́, рашая́, паша́, шэро́ и ту́ко (чэкэ́н) пэ кашта́, савэ́ исын пэ яг пэ алта́рё;

⁹ а свэнтонэ́ дыибнаскирэ паша́ андрыпнастыр (букорэ) и ла́кирэ ґэра́ выморэла ёв пане́са, и схачкирэ́ла раша́й саро́ пэ алта́рё: дава́ исын цэ́ло схачкирибэ́н, свэ́нто дыибэ́н, гудло́ тхув Ра́скэ-Дэвлэ́скэ.

¹⁰ Ко́ли лэ́скиро цэлонэ́-хачкирибнаскиро свэ́нто дыибэ́н тыкнэ́ кхэритконэ́ мурдалэстыр, бакрэ́ндыр ци бузнендыр, мэк тэ янэл ёв муршканэ́ родо́стыр, тэ явэ́л ёв бидошэ́нгиро,

¹¹ и зачхинэла лэс анги́л Растэ-Дэвлэ́стэ пэ паш-рати́тко (северно) алтарёскири риг, и Аароно́скирэ чхавэ́, рашая́, мэк тэ брызгинэн далэ́ ратэ́са пэ алта́рё сарэ́ ригэ́ндыр;

¹² и росчингирэна лэс пэ паша́, отдэна дава́ шэро́ и дава́ ту́ко (чэкэ́н), и росчхувэла лэн раша́й пэ кашта́, савэ́ исын пэ яг, пэ алта́рё,

¹³ а паша́ андрыпнастыр (букорэ) и ґэра́ выморэла пане́са, и саро́ янэ́ла раша́й, и пэ алта́рё схачкирэ́ла, дава́ исын цэ́ло схачкирибэ́н, свэ́нто дыибэ́н (жэ́ртва), гудло́ тхув, Ра́скэ-Дэвлэ́скэ.

¹⁴ Ко́ли ёв янэ́ла Ра́скэ-Дэвлэ́скэ чириклендыр цэ́ло схачкирибэ́н, мэк тэ янэл пэ́скиро свэ́нто дыибэ́н горлицэндыр ци тэрнэ́ голумбэндыр;

¹⁵ раша́й лэс янэ́ла кэ алта́рё, и пхагирэ́ла лэ́скэ шэро́, и схачкирэ́ла пэ алта́рё, а рат вытасавэла кэ алтарёскири ва́нта;

¹⁶ лэ́скиро валё ла́кирэ порэнца отлэла и чхурдэ́ла ла пашы́л алта́рё пэ вастокоскири риг, кай исын пепло (пра́ска);

¹⁷ и пхагирэ́ла ла (чирикля́) дрэ ла́кирэ пхака́ (крылы), на отлыи лэн, и схачкирэ́ла ла раша́й пэ алта́рё, пэ кашта́, савэ́ исын пэ яг: дава́ исын цэ́ло схачкирибэ́н, свэ́нто дыибэ́н, гудло́ тхув, Ра́скэ-Дэвлэ́скэ.