Колосянэнгэ 4 - Библия - Пэ Балтитко Романи чиб (Романэс) 2019

¹ Раялэ, явэ́н чачунэ́ кэ писха́рья (рабы), рипирэ́н пал дова́, со и тумэ́ндэ исын Хула́й дро Болыбна́скиро Раё.

Упхэныбэна́

² Мангэ́нпэ Дэвлэ́скэ саро́ часо, явэ́н пэ стрэ́га парикирибнаса;

³ мангэ́нпэ Дэвлэ́скэ кхэтанэ́ адя́кэ-паць пал амэ́ндэ, соб (кай) Дэвэ́л тэ псиравэл (тэ отпхандэл) амэ́нгэ вуда́р ваш лав тэ роспхэнас Христосо́скиро гарадо́ чачипэ́н, пал саво́ мэ сом бэшто́ дро штарибэ́н,

⁴ соб (кай) мэ тэ могинав тэ ракира́в манушэ́нгэ, адя́кэ сыр трэй.

⁵ Дживэ́н и лыджа́н пэс годьварэс напатяибнаскирэнца, причхувэ́н ило́ кэ кажно ваканцыя (случаё).

⁶ Мэк тэ явэ́л тумаро́ лав саро́ часо бахталыпнаса и причхудэ лондэса, соб (кай) тумэ́ тэ джинэ́н, сыр кажнонэ́ манушэ́скэ тэ отпхэнэн.

Палатунэ́ (После́дня) Лава́ тэ Пиридэ́н “Рамане”

⁷ Пал ма́ндэ саро́ роспхэнэ́ла тумэ́нгэ Тихико, дро́го пшал и патяибны́тко кхангирья́киро дына́ри и дру́го (мал) пир буты́ дрэ Растэ-Дэвлэ́стэ,

⁸ савэ́с мэ бичхадём кэ тумэ́ ваш дова́, соб (кай) ёв тэ уджинэл пал тумарэ́ рэ́нды (де́лы) и, соб (кай) тэ подрикирэ́л тумарэ́ илэ,

⁹ ёв явэ́ла кэ тумэ́ кхэтанэ́ Анисимоса, амарэ́ патяибнытконэ и дрогонэ́ пшалэса, саво́ исын тумэ́ндыр: ёнэ роспхэнэна тумэ́нгэ пал саро́, сыр амэ ада́й сам.

¹⁰ Пиридэла “рамане” тумэ́нгэ Аристархо, саво́ исын бэшто́ кхэтанэ́ ма́нца, и Марко Варнаваскиро плименико (бано), пал савэ́стэ мэ тумэ́нгэ чхиндём; ко́ли ёв явэ́ла кэ тумэ́, прилэ́н лэс,

¹¹ и Ису́со, савэ́с прокхардэ Иусто, ёнэ тринджинэ исын Юдэндыр машки́р бутэндэ малэндэ пир буты́, савэ́ кэрдэ́ буты́ ваш Дэвлэ́скиро Кралипэ́н, и савэ́ подрикирэнас ман.

¹² Пиридэла “рама́нё” тумэ́нгэ тумаро́ Епафрасо, Исусо́скирэ-Христосо́скиро писха́ри, саво́ саро́ часо мангэлапэ Дэвлэ́скэ зоралэ́с пал тумэ́ндэ, соб (кай) тумэ́ тэ явэ́н тварда и зоралэ́ дро патяибэ́н и тэ кэрэ́н саро́ пир Дэвлэ́скири во́ля.

¹³ Палдава́ мэ допхэнава пал лэ́стэ, со ёв кэрэ́ла древа́н пхари́ буты́ пал тумэ́ндэ и пал одолэ́ндэ, савэ́ дживэ́на кэ Лаодикия и кэ Иераполё,

¹⁴ пиридэла “рама́нё” тумэ́нгэ Лука, амаро́ дро́го састыпнари (врачо), и адя́кэ-паць Димасо.

¹⁵ Пиридэ́н “рама́нё” и мирэ́ пшалэ́нгэ дрэ Лаодикия, и Нимфаноскэ, и лэ́скирэ кхэритконэ́ кхангирьякэ,

¹⁶ ке́ли явэ́на тэ гинэн дава́ лыл тумэ́ндэ, мэк тэ прогинэн лэс и дрэ кхангири́ Лаодикийцэнгэ, а дова́ лыл, саво́ Лаодикиятыр, прогинэн и тумэ́.

¹⁷ И пхэнэ́н Архипоскэ, мэк ёв тэ кэрэ́л сыр трэй дынарибэ́н, саво́ ёв прилыя́ дрэ Растэ-Дэвлэ́стэ.

¹⁸ Дава́ пиридыибэн “рама́нё” исын чхиндло́ мирэ́, Павлискирэ вастэ́са. Рипирэн, со мэ сом бэшто́ дро штарибэ́н. Мэк тэ явэ́л бахталыпэ́н сарэ́нца тумэ́нца. Ами́нь.