Колосянэнгэ 3 - Библия - Пэ Балтитко Романи чиб (Романэс) 2019

¹ И адя́кэ, ко́ли тумэ́ отджидынэ мулэ́ндыр Христосо́са, тэды причхувэ́н зор тэ дживэ́н пир чачипэ́н, саво́ исын дро Болыбна́скиро Раё, кай Христо́со исын бэшто́ пир чачо́ (право) васт Дэвлэ́стыр Дадэ́стыр.

² Думинэн (дэн годы́ пэ́скэ) пал дова́, со исын дро Болыбна́скиро Раё, нэ на пал дова́, со исын пэ пхув.

³ Пал-дова́ со тумэ́ мынэ́ ваш дава́ свэтоскиро джиибэ́н и какана́ тумаро́ джиибэ́н исын гарадо́ Христосо́са дрэ Дэвлэ́стэ.

⁴ Ке́ли явэ́ла Христо́со, дрэ Савэ́стэ исын тумаро́ джиибэ́н, тэды и тумэ́ явэ́на кхэтанэ́ Лэ́са дрэ сла́ва.

Пхурано́ и Нэво́ Джиибэ́н

⁵ Мулякирэ́н тумарэ́ налачхэ́ пхувитка рэ́нды: джиибэ́н дро блэ́ндо, магирипэ́н, тырдыпэ́н кэ грэ́хо, налачхэ́ мысли и зэвлыныпэ́н, саро́ дава́ исын дынарибэ́н идолэ́нгэ.

⁶ Палдава́ и явэ́ла Дэвлэ́скири холы́ пэ одолэ́ манушэ́ндэ, савэ́ Лэс на кандэ́на.

⁷ Вари-ке́ли и тумэ́ адя́кэ-паць кэрдэ́, ке́ли тумэ́ дживдэ́ дрэ кадалэ́ грэ́хи.

⁸ Нэ какана́ тумэ́ мэкэ́н саро́: холякирибэ́н, мижэхипэн (ярось), обракирибэн, ладжаипнытка лава́ тэ на пхэнэ́н тумарэ́ ушта́.

⁹ На хохавэн екх екхэ́скэ, пал-дова́ со тумэ́ отпхэндлэпэ пхуранэ́ пэ́скирэ джиибнастыр сарэ́ лэ́скирэ рэндэ́нца.

¹⁰ Тумэ́ пирикэрдэ пэ́скиро пхурано́ джиибэ́н пэ нэво́, саво́ ячэ́лапэ нэво́ пир джиныбэ́н пал Кодолэстэ, Саво́ создыя́ лэс пир Пэ́скири патри́н (о́бразо);

¹¹ палдава́ нанэ буты́р ни Елинос (Баламэс), ни Юдос, ни обчхиныбэн, ни наобчхиныбэн, ни бэдонэ-нацыякирэ манушэ́с, ни Скифос, ни дынари́с, ни вольнонэ манушэ́с, нэ саро́ и дро саро́ исын Христо́со.

¹² И палдава́ пирикэрэн пэс дрэ манушэ́ндэ, савэ́н Дэвэ́л выкэдыя́: явэ́н свэ́нта, дро́га, явэ́н тангипны́тка и лачхэ́-илытка, бишарибнаскирэ, ковлэ́-илы́тка, длугонэ вырикирибнаса;

¹³ явэ́н ковлэ́ екх кэ екх и примангэн екх екхэ́скэ, ко́ли вари-кон пэ вари-конэ́стэ рикирэ́ла холы́; то сыр Христо́со примангдя тумэ́нгэ, адя́кэ-паць и тумэ́ кэрэ́н.

¹⁴ Кэ саро́ дава́ дочхувэн паты́в кэ яви́р мануша́, сави́ исын фунда́менто ваш чачуно́ сарэнгиро кхэтанякирибэн.

¹⁵ И мэк тэ явэ́л дрэ тумарэ́ илэ Дэвлэ́скиро рама́нё (миро), кэ саво́ тумэ́ са́нас кхардэ́ сыр паша́ Екхэ Масэндыр, парикирэ́н пал дава́.

¹⁶ Мэк тэ дживэ́л дрэ тумэ́ндэ сарэ́ барвалыпнаса Христосо́скиро лав, ке́ли тумэ́ сыклякирэ́на и дэ́на годы́ екх екхэ́скэ псалмэнца, лачхэ́ лавэ́нца, дэвлытконэ́ гиленца, бага́н Дэвлэ́скэ парикирибнаса дрэ тумарэ́ илэ.

¹⁷ И саро́, соб (кай) тумэ́ тэ на кэрэ́н, лавэ́са ци рэндоса, саро́ кэрэ́н ваш Ра́скиро-Дэвлэ́скиро, Исусо́скирэ Христосо́скиро лав, парикирэ́н Дэвлэ́скэ Дадэ́скэ пир Лэ́стэ.

Сыр тэ Дживэ́н дро Христианэ́нгиро Кхэр

¹⁸ Джувлялэ, кандэ́н Пэскирэн ромэн, сыр дава́ трэй тэ явэ́л дрэ Растэ – Дэвлэ́стэ.

¹⁹ Мурша́лэ, явэ́н лачхэ́ кэ Пэ́скирэ ромня́, и на явэ́н пхарэ́ лэ́нца.

²⁰ Чхавэ́, кандэ́н пэ́скирэ дадэн дро саро́, пал-дова́ со дава́ трэй Ра́скэ Дэвлэ́скэ.

²¹ Дадолэ, на ґаздэ́н холы́ дрэ пэ́скирэ чхавэ́ндэ, соб (кай) ёнэ тэ на пэрэ́н дро ду́хо (фа́но).

²² Писхарьялэ, кандэ́н дро саро́ пэ́скирэ пхувья́кирэ хулан дрэ лоч, дынаринэ́н (служынэн) лэ́нгэ, на ваш дова́, соб (кай) тэ шарэ́н мануша́, нэ кэрэ́н дава́ сарэ́ илэ́стыр.

²³ И саро́, со тумэ́ кэрэ́на, кэрэ́н сарэ́ илэ́стыр, сыр ваш Ра́скэ-Дэвлэ́скэ, нэ на, сыр ваш манушэ́нгэ,

²⁴ и джинэ́н, со Рай Дэвэ́л отдэ́ла лачхипна́са тумэ́нгэ, со Ёв скэдыя́ ваш Пэ́скирэ манушэ́нгэ; пал-дова́ со тумэ́ дынаринэна Ра́скэ-Дэвлэ́скэ Христосо́скэ.

²⁵ Палдова́ со, кон кэрэ́ла фуипэ́н, дорэсэ́ла ка́ра пал фуипэ́н, со ёв кэрдя́, на дыкхи́ пэ дава́, кон адава́ ману́ш исын.