Колосянэнгэ 2 - Библия - Пэ Балтитко Романи чиб (Романэс) 2019

¹ Мэ кама́м, соб (кай) тумэ́ тэ джинэ́н, сыр мэ маравпэ пал тумэ́ндэ и пал одолэ́ндэ, савэ́ дживэ́на кэ Лаодикия и пал сарэ́ндэ, савэ́ на дыкхнэ́ ман, саво́ мэ сом,

² соб (кай) лэ́нгирэ илэ тэ явэ́н подрикирдэ, соб (кай) ёнэ тэ явэ́н кхэтанэ́ дрэ паты́в кэ яви́р мануша́ ваш кажно барвалыпэ́н, тэ уджинэ́н пхэрдэ́с Дэвлэ́скиро гарадо́ чачипэ́н пал Христосо́стэ,

³ дрэ Савэ́стэ исын гарадо́ саро́ кучипэ́н пир годьварипэн и пир джиныбэ́н.

⁴ И мэ пхэна́ва дава́ ваш дова́, соб (кай) нико́н тэ на хохавэ́л тумэн пэ́скирэ хоханэ́ лавэ́нца.

⁵ Мэк мэ на сом тумэ́нца какана́, нэ мэ сом тумэ́нца мирэ́ духо́са.

Джиибна́скиро Пхэрдыпэ́н лро Екхипэ́н Христосо́са

⁶ Палдава́, сыр тумэ́ уджиндлэ́ Исусо́с Христосо́с сыр Рас-Дэвлэ́с, адя́кэ тумэ́ и дживэ́н дро екхипэ́н Лэ́са,

⁷ Явэ́н би кунипнаскирэ (тварда) дрэ Лэ́стэ и барьён пир патяибэ́н дрэ Лэ́стэ, сыр тумэн сыклякирдэ́, ячэ́нпэ дрэ патяибэ́н парикирибнаса.

⁸ Дыкхэ́н кучэс, соб (кай) ние́кх тэ на злыджал тумэн патяибнастыр философияса и хохаибнаса, савэ́ придуминдлэ мануша́, и савэ́ счхудэ пэ свэто́скирэ ду́мы, а на пэ Христосо́скиро сыклякирибэ́н.

⁹ Пал-дова́ со дрэ Лэ́стэ дживэ́ла Дэвлы́тко пхэрдыпэн дрэ манушы́тка маса́ пир ду́хо (фа́но),

¹⁰ и тумэ́ндэ исын пхэрдо́ джиибэ́н дро екхипэ́н Лэ́са, Саво́ исын Шэрало́ пэ сарэ́ барэ́ рандэ и свэтоскиро зоралыпэ́н,

¹¹ дро екхипэ́н Лэ́са тумэ́ са́нас обчхиндлэ́ на манушытконэ́ вастэ́нца, ке́ли лэнапэ криг грэхоскирэ лочакирэ маса́ обчхиныбнаса, а Христосо́скирэ-духо́скирэ обчхиныбнаса;

¹² ке́ли тумэ́ болдэпэ, то тумэ́ сы́рбы мынэ́ кхэтанэ́ Лэ́са, дрэ Лэ́стэ тумэ́ и отджидынэ пир патяибэ́н дрэ Дэвлэ́скири зор, Саво́ отджидякирдя́ Христосо́с мулэ́ндыр.

¹³ И тумэн, савэ́ сыс мулэ́ дрэ тумарэ́ грэ́хи и дрэ тумарэ́-лочакиро обчхиныбэн, Дэвэ́л отджидякирдя́ кхэтанэ́ Лэ́са и отмэкця́ амарэ́ сарэ́ грэ́хи;

¹⁴ Ёв отпарудя сыкляибнаса сарэ́ припхэныбэна́ Законо́стыр, со сыс чхиндлэ́ вастэ́са, савэ́ сыс проти амэ́ндэ, и Ёв укэдыя дава́ саро́, и примардя лэс кэ трушу́л;

¹⁵ Христо́со откэдыя зор барэ́ рандыр и свэто́скирэ зоралыпнастыр и отдыя́ лэн пэ манушы́тко ладж, и трушулэскирэ зорья́са лыя́ зор пэ лэ́ндэ.

¹⁶ Мэк нико́н тэ на сэндинэл тумэн пал хабэ́н ци пал пибэ́н, ци пал вари-саво́ свэ́нко, ци са́вато (субо́та),

¹⁷ Саро́ дава́ исын сы́рбы зэр (тенё) долэ́стыр, со явэ́ла анги́л, нэ чачипэ́н исын дрэ Христосо́скирэ Маса́.

¹⁸ Мэк ние́кх тэ на злыджал тумэн пэ́скирэ хоханэ́ кандыпнаса и мангипнаса Янголэнгэ, и саво́ патя́ла дро дова́, со ёв на дыкхця́, – дасавэ́ мануша́ пхутёна ивья́ (дармэс) пэ́скирэ манушытконэ́ годьварипнаса,

¹⁹ и ёнэ на рикирэнапэ пал Христосо́стэ, Саво́ исын Шэро́ сарэ́нгэ, Саво́ рикирлапэ и чалякирэлапэ Пэ́скирэ джидэ́ спхандыпнаса и пашэнца, и, Саво́ барьёла адя́кэ, сыр трэй Дэвлэ́скэ.

Мэрибэ́н и Джиибэ́н Христосо́са

²⁰ Ко́ли тумэ́ мынэ́ кхэтанэ́ Христосо́са ваш далэ́ свэто́скирэ-джиибнытка присыкляибэна, тэды со́скэ тумэ́ усае́кх адя́кэ-паць спхандэна пэс манушытконэ́ припхэныбнэнца?

²¹ “На кэр, на ха, на лэ”,

²² саро́ дава́ кокоро́ пэ́стыр хасякирэ́ла зор: пал-дова́ со саро́ дава́ исын пир манушы́тко припхэныбэ́н и сыклякирибэ́н,

²³ Дава́ лэ́ндэ исын екх дыцьло годьварипэн дро манушэ́нгиро выдуминдло дынарибэ́н, дро хохано́ кандыпэн и пэ́скирэ-масэнгирэ мэ́ньки, нэ ёнэ исын ничы́ на мол тэ обрикирэн лэ́нгирэ-лочакиро выкэдыибэн.