Колосянэнгэ 1 - Библия - Пэ Балтитко Романи чиб (Романэс) 2019

¹ Павли́стыр, Исусо́скирэ Христосо́скирэ Апостолостыр, савэ́с выкэдыя́ Дэвэ́л, и пшалэстыр Химастыр (Тимофеёстыр),

² свэнтонэ́ и патяибнытконэ пшалэ́нгэ пир екхипэ́н дрэ Исусо́стэ Христосо́стэ, савэ́ исын кэ Колосы. Мэк тэ явэ́л бахталыпэ́н и рама́нё (миро) тумэ́нгэ амарэ́ Дэвлэ́стыр-Дадэ́стыр; Ра́стыр-Дэвлэ́стыр, Исусо́стыр Христосостыр.

³ Амэ парикираса Дэвлэ́скэ, амарэ́ Ра́скирэ-Дэвлэ́скирэ, Исусо́скирэ Христосо́скирэ Дадэ́с, кажно мо́ло, ке́ли амэ мангасапэ Дэвлэ́скэ пал тумэ́ндэ,

⁴ амэ шундя́м пал тумаро́ патяибэ́н дрэ Исусо́стэ Христосо́стэ и пал паты́в кэ яви́р мануша́, сави́ тумэ́ндэ исын кэ сарэ́ свэ́нта мануша́,

⁵ ваш наде́я, со ужакирэ́ла тумэн дро Болыбна́скиро Раё, пал со тумэ́ англэды́р шундлэ́ дрэ чачунэ́ лава́ бахталэ́ занятыр (звесятыр),

⁶ сави́ явдя́ и кэ тумэ́ и сави́ розджалапэ пир саро́ свэ́то и янэ́ла бахтякирибэ́н и барьёла, сыр и машки́р тумэ́ндэ, долэ́-паць дывэсэ́стыр, ке́ли тумэ́ шундлэ́ и уджиндлэ́ Дэвлэ́скиро бахталыпэ́н, саво́ исын дро чачипэ́н;

⁷ сыр тумэ́ высыклынэ Епафрасостыр, амарэ́ дрогонэ́ малэстыр-писхаристыр пир буты́, саво́ исын чачуно́ Христосо́скиро дына́ри (служытелё) ваш тумэ́нгэ,

⁸ саво́ и роспхэндя́ амэ́нгэ пал паты́в кэ яви́р мануша́, сави́ Ду́хо (Фа́но) дыя́ тумэ́нгэ.

⁹ Палдава́ и амэ долэ́ дывэсэ́стыр, сыр шундя́м пал дава́, саро́ часо мангасапэ Дэвлэ́скэ пал тумэ́ндэ, и амэ мангаса, соб (кай) Дэвэ́л тэ дэл тумэ́нгэ тэ уджинэл Лэ́скирэ во́ля, годы́ и ґалыибэ́н, со дэ́ла Свэ́нто Ду́хо (Фа́но).

¹⁰ Соб (кай) тумэ́ тэ дживэ́н, сыр исын лачхо́ Дэвлэ́скэ, и дро саро́ тэ кэрэ́н кучэс Лэ́скэ, и тэ кэрэ́н лачхипэ́н дрэ сарэ́ рэ́нды и тэ уджинэс буты́р пал Дэвлэ́стэ,

¹¹ соб (кай) Лэ́скири бари зор тэ дэл тумэ́нгэ и тэ кэрэ́л тумэн зоралэнца, волякирэнца и бахталэнца,

¹² парикири́ Дадэ́скэ, Саво́ кхардя́ тумэн кэ дуд кхэтанэ́ сарэ́ свэнтонэ́ манушэ́нца,

¹³ Саво́ зракхця́ амэн камлыпнаскирэ (цямлыпнаскирэ) зорья́тыр и яндя́ дро Лэ́скирэ-Дрогонэ́ Чхавэ́скиро Кралипэ́н:

¹⁴ Саво́ выкиндя (выракхця) амэн Пэ́скирэ Ратэ́са и отмэкця́ амарэ́ грэ́хи;

Христо́со и Лэ́скири Буты́

¹⁵ Христо́со исын Дэвлэ́скири патри́н (о́бразо). Ёв сыкавэ́ла Пэ́скирэ андратунэ́ чачипна́са набицялэ Дэвлэ́с. Христо́со сыс бияндло англэды́р сарэ́стыр, со сыс создыно́;

¹⁶ пир Лэ́стэ Дэвэ́л создыя́ саро́ пэ болыбэ́н и пэ пхув, саро́, со исын дыцьло (бицяло́) и дова́, со нанэ дыцьло, ци троны, кай кра́лья исын бэштэ́, ци кхенинги, ци барэ́ рая, ци свэтоскиро зоралыпэ́н; саро́ пир Лэ́стэ и ваш Лэ́скэ исын создыно́.

¹⁷ И Ёв Кокоро́ сыс англэды́р сарэ́стыр, сыр саро́, со сыс создыно́, исын дро екхипэ́н Лэ́са и пир Лэ́стэ саро́ рикирэ́лапэ.

¹⁸ Ёв исын Кхангирья́кирэ – Духоскиро Шэро́, Ёв исын Англатуно́, Екх, Саво́ отджидыя́, соб (кай) Лэ́скэ тэ рикирэ́л упралыпэ́н дро саро́:

¹⁹ пал-дова́ со дава́ сыс лачхо́ Дадэ́скэ, соб (кай) дрэ Чхавэ́стэ тэ явэ́л саро́ Дэвлэ́скиро пхэрдыпэн,

²⁰ и соб (кай) пир Лэ́стэ тэ кэрэ́л рама́нё (миро) Пэ́са дро саро́, со исын пэ пхув, и дова́, со исын пэ болыбэ́н, Лэ́скирэ-Чхавэ́скирэ ратэ́са, саво́ Ёв прочхудя пэ трушу́л.

²¹ И тумэн, савэ́ са́нас вари-ке́ли дур Дэвлэ́стыр и вэ́рги Дэвлэ́скэ, ке́ли тырдыя тумэн тэ кэрэ́н бэдытка рэ́нды.

²² Нэ какана́ Дэвэ́л кэрдя́ рама́нё (миро) тумэ́нца, ке́ли Христо́со Пэ́скирэ масэнгирэ лочаса прогия́ пир мэрибэ́н, соб (кай) тэ чхувэ́н тумэн анги́л Лэ́стэ свэнтонэнца, и бибангякирэнца и бидошакирэнца,

²³ ко́ли тумэ́ сан зоралэ́ дро ду́хо (фа́но) тэ дживэ́н пир патяибэ́н и на отджана дрэ наде́я бахталэ́ занятыр (звесятыр), сави́ тумэ́ шундлэ́, и сави́ роспхэнэлапэ пир саро́ джидо́, со сыс создыно́ тэл болыбэ́н, сави́ Мэ, Па́вли, лыём тэ роспхэнав.

Павли́скири Буты́ дрэ Кхангири́

²⁴ Какана́ мэ радынавапэ дрэ мирэ́ мэ́ньки пал тумэ́ндэ, ко́ли Христосо́скирэ мэ́ньки на ухтылдэ́ ма́нгэ, тэды лэн мэ дочхувава мирэ́ лочаса ваш Лэ́скирэ мэ́ньки Лэ́скирэ Масэнгэ, Савэ исын Кхангири́.

²⁵ Мэ яцём Дэвлэ́скирэ-кхангирья́киро дынариса пир Дэвлэ́скиро задыибэн, саво́ Ёв дыя́ ма́нгэ ваш тумэ́нгэ, соб (кай) мэ тэ кэра́в саро́ пир Лэ́скиро лав;

²⁶ дава́ исын гарадо́ чачипэ́н, саво́ сыс наджиндло манушэ́нгэ сарэ́ родэндыр и векэндыр, нэ какана́ Дэвэ́л сыкадя́ Пэ́скирэ манушэ́нгэ;

²⁷ савэ́нгэ камдя́ Дэвэ́л тэ пиридэл джиныбэ́н, саво́ исын славакиро барвалыпэ́н машки́р Наюдэ́ндэ дро кадава́ гарадо́ чачипэ́н, саво́ исын Христо́со дрэ тумэ́ндэ, Ёв исын тумари́ наде́я дрэ сла́ва:

²⁸ Савэскиро лав амэ роспхэнаса, амэ даса годы́ кажнонэ́ манушэ́скэ и сыклякираса кажнонэ́ джиныбнаскэ, соб (кай) амэ тэ чхувас кажнонэ́ сталонэ патяибнаскирэс дро екхипэ́н Христосо́са.

²⁹ Ваш дава́ и мэ адя́кэ-паць кэра́ва буты́ и кэра́ва Лэ́скирэ зорья́са, сави́ исын ма́ндэ Лэ́стыр, и сави́ кэрэ́ла буты́ дрэ ма́ндэ.