Jona 3 - Библия - Пэ Балтитко Романи чиб (Романэс) 2019

Ёна Пхэнэ́ла Дэвлэ́скиро Лав Дрэ Ниневия

¹ И, акэ, явдя́ лав Ра́скирэ-Дэвлэ́скиро яви́р мо́ло, пхэни́:

² ‘Ушты́, джа́ кэ Ниневия, древа́н (збит) баро́ фо́ро, и пхэн зоралэ́с Дэвлэ́скиро лав адя́кэ, сыр Мэ припхэнава ту́кэ.”

³ И уштыя́ Ёна, и гия́ кэ Ниневия пир лав Ра́скирэ-Дэвлэ́скиро. Джинэ́н, со Ниневия сыс коптарам баро́ фо́ро Дэвлэ́стэ, трэиндя́ трин дывэса́ тэ обджас лэс.

⁴ И лыя́ Ёна тэ псирэ́л пир фо́ро пэ пэ́рво дывэ́с, и ёв миштопхэнэлас. Ёв дыя́ го́дла и пхэндя́ зоралэ́с: “Ишчо штардэша́ дывэса́, и Ниневия пхагирэна кэ руи́ны!”

Мануша́ Ниневиятыр Рисёна кэ Дэвэ́л

⁵ И э мануша́ Ниневиятыр патяндынэ́ Дэвлэ́скэ, и ёнэ пхэндлэ́ сарэ́нгэ (обзанякирдэ) пал посто, и чхудэ́ пэ пэ́стэ жалобна балытка гонэ́, най барэдырэстыр кэ най тыкнэды́р ману́ш лэ́ндыр.

⁶ Тэ́ньци догия́ лав кэ кра́ли Ниневиякиро, и ёв уштыя́ лэ́скирэ троностыр, и чхудя́ дрэ риг пэ́скиро урибэ́н, чхакирдэ пэс жалобнонэ-балытконэ гонэса и бэсця́ дрэ пра́ска (пепло).

⁷ И о кра́ли кэрдя́ адя́кэ, со дая́ звесь (зан) пхэндлэ́ анги́л сарэ́ндэ и о кра́ли и лэ́скирэ барэ́ рая́ выдынэ припхэныбнытко стату́то, пхэни́: “Мэк ние́кх ни ману́ш, ни мурда́л, ни ґурто, ни стада, тэ на хан ничы́; на домэкэн, соб (кай) ёнэ тэ хан, тэ пьен пани́.

⁸ Нэ мэк мануша́ и мурдала́ тэ учхакирэн пэс жалобнонэ балытконэ гонэса, и тэ прикхарэн зоралэ́с Дэвлэ́с; адя́кэ, соб (кай) кажно лэ́ндыр тэ рисёл пэ́скирэ бибахталэ́ дромэ́стыр и нахратыматыр (насилиёстыр), со кэрдэ́ лэ́скирэ васта́.

⁹ Кон сашты́ тэ пхэнэ́л, ци рисёла кэ Дэвэ́л, и ци пожалинэла (тангинэла), и ци, мо (хай), рискирэ́ла дрэ риг Лэ́скири бари холы́ адя́кэ, соб (кай) амэ́нгэ тэ на хасёвас.”

¹⁰ Тэ́ньци Дэвэ́л дыкхця́ лэ́нгирэ бутя́, со ёнэ рисинэ́ криг лэ́нгирэ бибахталэ́ дромэндыр, и Дэвэ́л потангиндя (пожалиндя) пал бари биба́хт, со Ёв пхэндя́ тэ янэл пэ лэ́ндэ, и ёв на яндя́ пэ лэ́ндэ.