Jona 1 - Библия - Пэ Балтитко Романи чиб (Романэс) 2019

¹ И, акэ, явдя́ лав Ра́скирэ-Дэвлэ́скиро Ёнаскэ (Ионаскэ), чхавэ́скэ Амафиёскирэскэ, пхэни́:

² “Ушты́, джа́ кэ Ниневия, дава́ баро́ фо́ро, и ра́кир зоралэ́с проти лэ́стэ: пал-дова́ со далэ́ форо́скирэ-манушэ́нгирэ злыднитка рэ́нды (фуй де́лы) явнэ́ анги́л Ма́ндэ.”

³ И Ёна уштыя́, соб (кай) тэ нашэ́л кэ Фарсисо Ра́стыр-Дэвлэ́стыр (сыр Лэ́скиро проро́ко). Ёна гия́ тэлэ́ кэ Иопия, плэскирдя ловэ́ пал па́рма (кораблё), бэсця́ пэ ла́тэ, и традыя́ лэ́нца кэ Фарсисо, соб (кай) тэ нашэ́л Ра́скирэ-Дэвлэ́скирэ якхэ́ндыр.

Штормо пэ Мо́рё (дэрья́в)

⁴ Нэ о Рай Дэвэ́л бичхадя́ бари балва́л пэ мо́рё (дэрья́в), и одо́й яця́ зорало́ штормо пир мо́рё (дэрья́в) адя́кэ, со сыс бицяло́, со па́рма пхадёла.

⁵ И матросы дара́ндынэ, и кажно (сва́ко) ману́ш дыя́ го́дла кэ пэ́скиро дэвлоро. И ёнэ чхурдынэ́ гпхарипэ́н (грузо), со сыс пэ па́рма, дро мо́рё (дэрья́в), соб (кай) тэ явэ́л локхэды́р па́рма. Нэ о Ёна (Иона) гия́ тэлэ́ дро тэлатуно штэ́то пэ па́рма, пасия́ и сыг сыс суто́.

⁶ И о барыдыро́ подги́я кэ ёв, и пхэндя́ лэ́скэ: “Со дава́ значынэ́ла, соибнаскиро? Ушты́, кхар тырэ́ Дэвлэ́с; хай Тыро́ Дэвэ́л пририпирэла пал амэ́ндэ, соб (кай) амэ́нгэ тэ на хасёвас.”

⁷ И пхэндлэ́ ёнэ екх екхэ́скэ: “Явэ́н, чхурдаса жре́биё, соб (кай) амэ сашты́ тэ джинас, пир конэ́стэ дава́ пхарипэ́н пыя́ пэ амэ́ндэ?” И ґа́да, ёнэ чхурдынэ́ жре́биё, и кокалко сыкадя́ пэ Ёнастэ.

⁸ Тэ́ньци ёнэ пхэндлэ́ лэ́скэ: “Амэ мангаса тут, пхэн амэ́нгэ! Пир конэ́стэ дава́ пхарипэ́н пыя́ пэ амэ́ндэ? Саво́ исын рэ́ндо ту́тэ? Каты́р ту сан? Савэ тхэмэстыр ту сан? Савэ манушэ́ндыр ту сан?”

⁹ И отпхэндя́ ёв лэ́нгэ: “Мэ сом Юдо; и мэ дарава Ра́стыр-Дэвлэ́стыр; Дэвлэ́стыр болыбнаскирэстыр, Кон создыя́ мо́рё (дэрья́в) и пхув шуки́.”

Ёнас Чхурдэна дро Мо́рё (дэрья́в)

¹⁰ Тэ́ньци мануша́ страха́дынэ барэ́ трашаса, и пхэндлэ́ лэ́скэ: “Со́скэ дава́ ту кэрдя́н?” Пал-дова́ со адалэ́ мануша́ джиндлэ́, со ёв насця Ра́скирэ-Дэвлэ́скирэ якхэ́ндыр, сыр ёв ужэ роспхэндя́ лэ́нгэ.

¹¹ Тэ́ньци ёнэ пхэндлэ́ лэ́скэ: “Со трэй тэ кэра́с амэ́нгэ ту́са, соб (кай) мо́рё (дэрья́в) тэ штылёл ваш амэ́нгэ?”, – пал-дова́ со мо́рё (дэрья́в) уса́ ґаздэласпэ вучэды́р штормостыр.

¹² И ёв пхэндя́ лэ́нгэ: “Лэн тэ ґаздэ́н ман упрэ́, и чхурдэ́н ман дро мо́рё (дэрья́в); тэды мо́рё (дэрья́в) явэ́ла штыл ваш тумэ́нгэ. Пал-дова́ со, мэ джино́м, со дава́ штормо яця́ пир ма́ндэ.”

¹³ На дыкхи́ пэ дова́, со мануша́ ґребиндлэ зоралэ́с, соб (кай) тэ янэл па́рма кэ пхув, нэ ёнэ на дынэ́ ра́да, пал-дава́ со мо́рё (дэрья́в) дурэды́р ґаздэ́лапэ штормоса пэ лэ́ндэ.

¹⁴ Палдава́ ёнэ дынэ́ го́дла тэ помогинэл кэ Рай Дэвэ́л, и пхэндлэ́: “Амэ мангасапэ, о Раё Дэ́вла, амэ мангаса древа́н, соб (кай) тэ на хасёвас пал дава́ манушэ́скиро джиибэ́н, и соб (кай) тэ на загинэн банг амэ́нгэ пал дава́ рат бибангипнаскиро: пал-дова́ со Ту, Рай Дэвэ́л, кэрдя́н адя́кэ, сыр Ту́кэ исын куч”

¹⁵ И ёнэ ґаздынэ́ Ёнас и чхурдынэ́ лэс дро мо́рё (дэрья́в), и мо́рё (дэрья́в) яця́ штыл Лэ́скирэ барэ́ холя́тыр.

¹⁶ Тэ́ньци мануша́ страха́дынэ Ра́стыр-Дэвлэ́стыр барэ́ дара́са, и ёнэ яндлэ́ свэ́нто дыибэ́н Ра́скэ-Дэвлэ́скэ и ёнэ совлахадэ.