Joannostir 9 - Библия - Пэ Балтитко Романи чиб (Романэс) 2019

Ису́со Састякирэ́ла Манушэ́с, Саво́ сыс Короро́ Бияныпна́стыр

¹ Ке́ли Ису́со гия́ пиро́ дром, Ёв дыкхця́ манушэ́с, саво́ сыс короро́ бияныпнастыр.

² Лэ́скирэ сыкляибны́тка пхучнэ́ Лэ́стыр: “Равви! Кон лэ́ндыр кэрдя́ грэ́хо, ёв кокоро́, ци дада́ лэ́скирэ, со ёв бия́ндыя короро́?”

³ Ису́со отпхэндя́: “Ни ёв, ни лэ́скирэ дада́ на кэрдэ́ грэ́хо, нэ дава́ исын ваш дова́, соб (кай) тэ явэ́л пэ лэ́стэ бицялы (дыцьлы) Дэвлэ́скири зор.

⁴ Пака на прогия́ дывэ́с, Ма́нгэ трэй тэ кэра́в Одолэскирэ рэ́нды, Кон бичхадя́ Ман; сыг явэ́ла рат, ке́ли нико́н нашты́ нисо́ тэ кэрэ́л.

⁵ Дро дава́ часо, сыр Мэ сом дро свэ́то, Мэ сом дуд (свэ́то) далэ́ свэтоскэ”

⁶ Ке́ли Ёв пхэндя́ дава́, чунгардыя пэ пхув, кэрдя́ салятыр (слинатыр) макхибэн и макця якха́ корорэскэ,

⁷ И пхэндя́ лэ́скэ: “Джа́, обморпэ дрэ Силоамоскири вэндэри́н (прудо)” /со значинэла “бичхадо́!”/. Ёв гия́, обмордяпэ и яця́ тэ дыкхэ́л.

⁸ Лэ́скирэ пашатунэ́ и яви́р мануша́, савэ́ дыкхнэ́, со ёв англэды́р сыс короро́ бэшто́ и мангдя́ дыибэ́н, пхэндлэ́: “Ци да исын на одова́ ману́ш, саво́ сыс бэшто́ и мангдя́ дыибэ́н?”

⁹ Вари-савэ́ ракирдэ́: “Дава́ ёв исын.” Нэ яви́р ракирдэ́: “Над, ёв здэла (подджа́ла) пэ лэ́стэ.” Ёв ж ракирдя́: “Чачэс, мэ сом.”

¹⁰ Тэды пхучнэ́ лэ́стыр: “Сыр ту яця́н тэ дыкхэ́с?”

¹¹ Ёв отпхэндя́ лэ́нгэ: “Екх Ману́ш, Савэс кхарэ́на Ису́со, кэрдя́ макхибэн, макця мирэ́ якха́ и пхэндя́ ма́нгэ: ‘Джа́ дро Силоамоскиро компинытко и обморпэ’. Мэ гиём, обмордёмпэ и яцём тэ дыкха́в.”

¹² Тэды пхучнэ́ лэ́стыр: “Кай Ёв исын?” Ёв отпхэндя́: “На джино́м (на джина́в).”

Фарисе́и Допхучэ́на Высастякирдэ́ Манушэ́стыр

¹³ Адалэс манушэ́с, саво́ сыс ґарэдыр короро́, лыджинэ́ кэ Фарисе́и.

¹⁴ Дава́ сыс са́вато, дывэ́с, дро саво́ Ису́со кэрдя́ помакхибэн и высастякирдя́ лэс корорипнастыр.

¹⁵ Адя́кэ-паць и Фарисе́и лынэ́ тэ пхучэ́н Лэ́стыр, сыр ёв яця́ тэ дыкхэ́л. Ёв пхэндя́ лэ́нгэ: “Ёв чхудя́ макхибэн ма́нгэ пэ мирэ́ якха́ и мэ обмордёмпэ, и мэ какана́ дыкха́ва.”

¹⁶ Тэды вари-савэ́ Фарисеендыр ракирдэ́: “Адава́ ману́ш на могинэ́ла тэ явэ́л Дэвлэ́стыр, пал-дова́ со Ёв на ракхэ́ла са́вато.” Яви́р ракирдэ́: “Сыр могинэ́ла грэхи́тко ману́ш тэ кэрэ́л дасавэ́ ди́вы?” – И яця́ кошыбэ́н машки́р лэ́ндэ.

¹⁷ Ёнэ нэвэ́стыр ракирэ́на корорэскэ: “Со ту пхэнэ́са пал Лэ́стэ, пал-дова́ со Ёв отчхакирдя́ ту́кэ якха́? Кон Ёв исын пир тыро́?” Ёв пхэндя́: “Ёв исын проро́ко.”

¹⁸ Юды усае́кх на патяндынэ́, со ману́ш сыс короро́ и яця́ тэ дыкхэ́л, анги́л дова́, сыр ёнэ кхардэ́ лэ́скирэ дадэн.

¹⁹ И пхучнэ́ лэ́ндыр: “Ци дава́ исын тумаро́ чхаво́, пал савэ́стэ тумэ́ ракирэ́на, со ёв бия́ндыя короро́? Сыр ёв какана́ яця́ тэ дыкхэ́л?”

²⁰ Э дада́ лэ́скирэ отпхэндлэ́ лэ́нгэ: “Амэ джина́са, со ёв исын амаро́ чхаво́ и ёв бия́ндыя короро́;

²¹ а сыр дава́ ёв какана́ дыкхэ́ла и, кон отчхакирдя́ лэ́скэ якха́, дава́ амэ на джина́са; ёв кокоро́ исын дрэ стала бэрша́, пхучэ́н лэ́стыр кокорэстыр, мэк ёв кокоро́ тэ роспхэнэл пал пэ́стэ.”

²² Лэ́скирэ дада́ адя́кэ отпхэндлэ́, пал-дова́ со ёнэ дара́ндынэ Юдэндыр, со ёнэ ужэ зракирдэпэ, со ко́ли вари-кон приґалёла Лэс пал Христосо́стэ, одолэ́с тэ традэ́н криг Кхангирья́тыр.

²³ Палдава́ лэ́скирэ дада́ и пхэндлэ́: “Ёв исын дрэ стала бэрша́, пхучэ́н лэ́стыр кокорэстыр.”

²⁴ И ґа́да, яви́р мо́ло ёнэ кхардэ́ манушэ́с, саво́ сыс короро́, и пхэндлэ́ лэ́скэ: “Дэ лав анги́л Дэвлэ́стэ, со ту пхэнэ́са чачипэ́н: амэ джина́са, со Одова́ Ману́ш исын грэхи́тко.”

²⁵ Ёв отпхэндя́ лэ́нгэ: “Ци грэхи́тко Ёв исын, дава́ мэ на джино́м; екх мэ джино́м (джина́в), со мэ со́мас короро́, нэ какана́ мэ яцём тэ дыкха́в.”

²⁶ Ёнэ нэвэ́стыр пхучнэ́ лэ́стыр: “Со кэрдя́ Ёв ту́са? Сыр ту яця́н тэ дыкхэ́с?”

²⁷ Ёв отпхэнэ́лас лэ́нгэ: “Мэ ракирдём ужэ тумэ́нгэ, тумэ́ на шундлэ́: со тумэ́ камэ́на нэвэ́стыр тэ шунэ́н? Ци тумэ́ камэ́на тэ ячэн Лэ́скирэ сыкляибнытконэ́нца?”

²⁸ Ёнэ задынэ го́дла пэ лэ́стэ и пхэндлэ́: “Ту сан Лэ́скиро сыкляибны́тко, нэ амэ сам Мойза́скирэ сыкляибны́тка.

²⁹ Амэ джина́са, со Дэвэ́л ракирдя́ Мойзаса, нэ пал адалэ́ манушэ́стэ амэ на джина́са, каты́р Ёв исын?”

³⁰ Ману́ш, саво́ яця́ тэ дыкхэ́л, пхэндя́ лэ́нгэ: “Дава́ исын баро́ ди́во, со тумэ́ на джинэ́на, каты́р Ёв исын, нэ Ёв отчхакирдя́ якха́ ма́нгэ.

³¹ Нэ амэ джина́са, со, кон кэрэ́ла грэ́хо, кодолэ́н Дэвэ́л на шунэ́ла, нэ екхэ кодолэ́н, савэ́ славинэна Дэвлэ́с и кэрэ́на, со Лэ́скэ исын лачхо́, кодолэ́с Ёв шунэ́ла.

³² Ние́кхвар дро джиибэ́н на сыс шундло, соб (кай) вари-кон манушэ́скэ, саво́ бия́ндыя короро́, тэ отчхакирэл якха́.

³³ Ко́ли Ёв тэ на явэ́л Дэвлэ́стыр, Ёв нисо́ на могинэлас тэ кэрэ́л.”

³⁴ Ёнэ задынэ го́дла пэ лэ́стэ: “Ту саро́ бияндыян дрэ грэ́хи, и ци на ту сыклякирэса амэн?” И традынэ лэс яври́.

Корорипэ́н дро Пэ́скиро Ду́хо (Фа́но)

³⁵ Ису́со уджиндя́ пал дава́, со лэс традынэ яври́, и латхя́ лэс и пхуця́ лэ́стыр: “Ци патя́са ту дрэ Дэвлэ́скирэ Чхавэ́стэ?”

³⁶ Ёв отпхэндя́ и пхуця́: “Нэ кон Ёв исын, миро Рай Дэвэ́л, пхэн ма́нгэ, соб (кай) мэ тэ упатяв дрэ Лэ́стэ?”

³⁷ Ису́со пхэндя́ лэ́скэ: “Ту дыкхця́н Лэс, Ёв исын Одова́, Кон ракирэ́ла ту́са.”

³⁸ Тэды ману́ш пхэндя́: “Мэ патя́ва, Раё Дэ́вла!” И ёв дыя́ паты́в Лэ́скэ.

³⁹ И пхэндя́ Ису́со: “Мэ явдём пэ сэ́ндо дрэ дава́ свэ́то, соб (кай) одолэ́, савэ́ на дыкхэ́на, тэ дыкхэ́н, нэ савэ́ дыкхэ́на, соб (кай) тэ ячэн корорэ́.”

⁴⁰ Вари-савэ́ Фарисе́и, савэ́ сыс тэрдэ́ пашы́л Исусо́стэ, сыр шундлэ́ дава́, пхэндлэ́ Лэ́скэ: “Нау́што и амэ сам корорэ́?”

⁴¹ Ису́со пхэндя́ лэ́нгэ: “Ко́ли тумэ́ тэ явэ́н, чачэс, корорэ́, тэды тумэ́нгэ на явэ́ла грэ́хо; нэ ко́ли тумэ́ ракирэ́на, со тумэ́ дыкхэ́на, тэды грэ́хо ячэ́лапэ пэ тумэ́ндэ.”