Joannostir 6 - Библия - Пэ Балтитко Романи чиб (Романэс) 2019

Ису́со Чалякирэ́ла Пандж Тысёнцы Манушэ́н

¹ Пало́ дава́ Ису́со гия́ пэ яви́р Галилеякирэ ци Тивериадаскирэ-морёскири риг.

² И бут мануша́ гинэ́ пал Лэ́стэ, пал-дова́ со ёнэ дыкхнэ́ ди́вы, савэ́ Ёв кэрдя́, ке́ли састякирдя насвалэн.

³ Ису́со гия́ упрэ́ пэ бэ́рга и одо́й бэсця́ Пэ́скирэ сыкляибнытконэ́нца.

⁴ Явэ́лас сы́гэс Юды́тко свэ́нко, Патради́.

⁵ Ису́со ґаздыя́ якха́ и дыкхця́, со бут мануша́ джа́на кэ Ёв, ракирэ́ла Филипоскэ: “Кай амэ́нгэ тэ кинас маро́, соб (кай) тэ чалякирас лэн?”

⁶ Ёв ракирдя́ дава́ ваш дова́, соб (кай) тэ пропатякирэл Филипос: Ёв кокоро́ джиндя́, со Ёв явэ́ла тэ кэрэ́л.

⁷ Филипо отпхэндя́ Лэ́скэ: “Дуй шэла́ динарья на ухты́лла (на́доси) лэ́нгэ пэ маро́, соб (кай) кажнонэ́скэ лэ́ндыр тэ дас пир котэ́р (куско).”

⁸ Екх Лэ́скирэ сыкляибнытконэндыр, ґа́да, сыс Ендри (Андреё), пшал Симоноскирэ Пэтрискиро, ракирэ́ла Исусо́скэ:

⁹ “Ада́й екхэ раклорэстэ исын пандж ґэрстытка (ячменитка) марэ́ и дуй мачхорэ; нэ со дава́ ваш ада́кицы манушэ́нгэ?”

¹⁰ Ису́со пхэндя́: “Пхэнэ́н лэ́нгэ тэ бэшэ́н.” Дрэ дова́ штэ́то сыс ґэнсто чар. И манушэ́н, савэ́ бэшнэ́ пэ чар, сыс пашэ́ пандж тысёнцы.

¹¹ Ису́со лыя́ маро́ и парикирдя дрэ мангипэ́н Дэвлэ́скэ, роздыя сыкляибнытконэ́нгэ и сыкляибны́тка дынэ́ манушэ́нгэ, савэ́ сыс бэштэ́, и дова́-паць Ёв кэрдя́ и мачхэнца и дыя́ кажнонэ́скэ, ци бут, кон камдя́.

¹² Ке́ли сарэ́ мануша́ чалынэ, Ису́со пхэндя́ Пэ́скирэ сыкляибнытконэ́нгэ: “Кэдэн котэра́ (куски), савэ́ ячнэ́пэ, соб (кай) нисо́ тэ на хасёл.”

¹³ Ёнэ кэдынэ дэшуду́й пхэрдэ́ корзи́ны (кхудэ́) котэрэнца, савэ́ ячнэ́пэ пало́ (после) одолэ́ндэ, кон хая панджэндыр ґэрстытконэ марэндыр.

¹⁴ Мануша́ дыкхнэ́, саво́ ди́во Ёв кэрдя́ и ёнэ пхэндлэ́: “Дава́ исын кодова́ чачуно́ Проро́ко, Савэ́скэ Трэй банго́ тэ явэ́л дро свэ́то.”

¹⁵ Ису́со ґалыя́, со ёнэ камэ́на тэ явэ́н и тэ зачхувэн Лэс зорья́са тэ явэ́л крали́са; Ёв нэвэ́стыр гия́ лэ́ндыр екхджино́ пэ бэ́рга.

Ису́со Псирэ́ла пир Пани́

¹⁶ Ке́ли явдя́ бэльвэ́ль, Лэ́скирэ сыкляибны́тка гинэ́ кэ мо́рё (дэрья́в).

¹⁷ И ёнэ бэшнэ́ дрэ ба́рка, и традынэ пэ яви́р морёскири риг, дро Капернаумо. Яця́ кало́ (цёмно), а Ису́со на джа́лас кэ ёнэ.

¹⁸ Пхурдэлас зоралы́ балва́л, и мо́рё (дэрья́в) кунинэласпэ.

¹⁹ Ке́ли ёнэ отплывиндлэ (дынэ пли́ма дурэдыр) пэ трин ци штар вэрсты, тэды ёнэ дыкхнэ́, со Ису́со джа́лас пир мо́рё (дэрья́в) кэ ба́рка, и ёнэ страха́дынэ.

²⁰ Нэ Ёв пхэндя́ лэ́нгэ: “Ѓа́да, Мэ сом, на андыршан”

²¹ Ёнэ камлэ́ тэ лэн Лэс дрэ ба́рка, нэ дрэ дова́-паць моменто ба́рка подтрадыя кэ брэ́го, одори́к, карик ёнэ плывиндлэ.

Мануша́ Родэ́на Исусо́с

²² Пэ яви́р дывэ́с мануша́, савэ́ сыс тэрдэ́ пэ доя́ морёскири риг, дыкхнэ́, со одо́й апри́ч екх ба́рка, дрэ сави́ Лэ́скирэ сыкляибны́тка бэшнэ́, яви́р на сыс, и со Ису́со на традыя́ дрэ доя́ ба́рка Лэ́скирэ сыкляибнытконэ́нца, и со Лэ́скирэ сыкляибны́тка традынэ екхджинэ.

²³ Тэды кэ брэ́го подтрадынэ и яви́р барки Тивериадатыр кэ дова́ штэ́то, кай ёнэ ханэ́ маро́, саво́ Ису́со бахтякирдя́ дро Дэвлэ́скиро мангипэ́н.

²⁴ И ке́ли мануша́ дыкхнэ́, со нанэ ада́й ни Исусо́с, ни Лэ́скирэ сыкляибнытконэ́н, ёнэ бэшнэ́ дрэ барки и традынэ дро Капернаумо тэ родэ́н Лэс.

²⁵ Ёнэ латхнэ́ Лэс пэ яви́р морёскири риг и пхэндлэ́ Лэ́скэ: “Сыклякирибна́скиро! Ке́ли Ту явдя́н адари́к?”

²⁶ Ису́со пхэндя́ лэ́нгэ дро отпхэныбэ́н: “Чачэс, Мэ ракира́ва тумэ́нгэ: тумэ́ родэ́на Ман на палдова́, со дыкхнэ́ ди́вы, а пал-дова́, со тумэ́ ханэ́ маро́ и чалынэ.

²⁷ На кэрэ́н буты́ пал хабэ́н, саво́ пэ екх мо́ло, а родэ́н дова́ хабэ́н, саво́ явэ́ла дрэ ве́чно джиибэ́н; дава́ хабэ́н камэ́ла Манушэ́скиро Чхаво́ тэ дэл тумэ́нгэ, – пал-дова́ со пэ Лэ́стэ чхудя́ Дэвэ́л Дад Пэ́скири чэргэнори́, со Ёв бахтякирэ́ла дава́.”

²⁸ Ёнэ пхучнэ́ Лэ́стыр: “Со амэ́нгэ трэй тэ кэра́с ваш дова́, соб (кай) амарэ́ рэ́нды (де́лы) тэ явэ́н лачхэ́ ваш Дэвлэ́скэ?”

²⁹ Ису́со пхэндя́ лэ́нгэ дро отпхэныбэ́н: “Ѓа́да, исын тумаро́ рэ́ндо ваш Дэвлэ́скэ, соб (кай) тумэ́ тэ патя́н дрэ Одолэ́стэ, Конэ́с Ёв бичхадя́.”

³⁰ Ёнэ пхучнэ́ Лэ́стыр: “Сави́ ґерты́к (знаме́ниё) Ту сыкавэса амэ́нгэ, соб (кай) амэ́нгэ тэ дыкхас ла и тэ патяс Ту́кэ? Со Ту кэрэ́са?

³¹ Амарэ́ дада́ ханэ́ манново кхурми пэ чхучи́ пхув, сыр пал дава́ исын чхиндло́ дро Свэ́нто Чхиныбэ́н: ‘Ёв дыя́ маро́ болыбна́стыр тэ хан.’”

³² Ису́со пхэндя́ лэ́нгэ: “Чачэс, Мэ ракира́ва тумэ́нгэ: дава́ исын на Мо́йза (Моисеё) дыя́ маро́ тумэ́нгэ Болыбна́стыр, а Миро Дад дэ́ла тумэ́нгэ чачуно́ маро́ болыбна́стыр.

³³ Пал-дова́ со Дэвлэ́скиро маро́ исын Одова́, Саво́ явэ́ла (джа́ла тэлэ́) болыбна́стыр и дэ́ла джиибэ́н свэтоскэ.”

³⁴ Тэды ёнэ пхэндлэ́ Лэ́скэ: “Раё Дэ́вла! Дэ амэ́нгэ ўса́ды (сак) дава́ маро́.”

³⁵ Ису́со пхэндя́ лэ́нгэ: “Мэ кокоро́ сом джиибна́скиро маро́; одова́, кон явэ́ла кэ Мэ, на явэ́ла ние́кхвар бокхало, и одова́, кон патя́ла дрэ Ма́ндэ, ние́кхвар на явэ́ла тэ камэл тэ пьел.

³⁶ Нэ сыр Мэ ракирдём, со тумэ́ дыкхнэ́ Ман, и усае́кх тумэ́ на патя́на.

³⁷ Саро́, со дэ́ла Ма́нгэ Дад, явэ́ла кэ Мэ, и одолэ́с, кон кэ Мэ явэ́ла, Мэ на традава яври́.

³⁸ Пал-дова́ со Мэ явдём болыбна́стыр на ваш дава́, соб (кай) тэ кэра́в дова́, со Мэ кокоро́ кама́м, нэ, соб (кай) тэ кэра́в пир Мирэ́-Дадэ́скири во́ля, Саво́ бичхадя́ Ман.

³⁹ А во́ля Мирэ́ Дадэ́скири, Саво́ бичхадя́ Ман, исын дасави́, соб (кай) нисо́ одолэ́стыр, со Ёв дыя́ Ма́нгэ тэ на хасякира́в, нэ саро́ дова́ тэ отджидякирав дро палатуно́ (последнё) дывэ́с.

⁴⁰ А во́ля Мирэ́ Дадэ́скири, Кон бичхадя́ Ман, исын дасави́, соб (кай) кажно, кон дыкхэ́ла Чхавэ́с и патя́ла дрэ Лэ́стэ, тэ явэ́л лэ́стэ ве́чно джиибэ́н; и Мэ лэс отджидякирава дро палатуно́ (последнё) дывэ́с.”

⁴¹ Э Юды ракирдэ́ холямэс пэ Лэ́стэ пал дова́, со Ёв пхэндя́: “Мэ сом маро́, саво́ явдя́ болыбна́стыр.”

⁴² Ёнэ ракирдэ́: “Ци дава́ Ису́со исын чхаво́ Ёзаскиро (Иосифоскиро), Савэскирэс Дадэ́с и Да амэ джина́са? Сыр Ёв могинэ́ла тэ ракирэ́л: “Мэ явдем болыбна́стыр?”

⁴³ Ису́со пхэндя́ лэ́нгэ дро отпхэныбэ́н: “На ракирэ́н холямэс машки́р пэ́стэ.

⁴⁴ Нико́н на могинэ́ла тэ явэ́л кэ Мэ, ко́ли на притэрдэла лэс кэ Пэ Дад, Саво́ бичхадя́ Ман; и Мэ отджидякирава лэс дро палатуно́ дывэ́с.

⁴⁵ Акэ, исын чхиндло́: ‘Явэ́на сарэ́ сыклякирдэ́ Дэвлэ́стыр’. Кажно, кон шундя́ Дадэ́с и сыклыя Лэ́стыр, явэ́ла кэ Мэ;

⁴⁶ нико́н и на дыкхця́ Дадэ́с, апри́ч Одолэ́стэ, Кон явдя́ Дэвлэ́стыр, екх Ёв дыкхця́ Дадэ́с.

⁴⁷ Чачэс, чачэс Мэ ракира́ва тумэ́нгэ: одова́, кон патя́ла дрэ Ма́ндэ, кодолэ́скэ дэ́лапэ ве́чно джиибэ́н’.

⁴⁸ Мэ сом джиибна́скиро маро́.

⁴⁹ Маро, саво́ явэ́ла болыбна́стыр, исын дасаво, со кон ха́ла лэс, одова́ на мэрэ́ла.

⁵⁰ Тумарэ́ дада́ ханэ́ кхурми пэ чхучи́ пхув и мынэ́.

⁵¹ Мэ сом джидо́ маро́, саво́ явдя́ болыбна́стыр; кон явэ́ла тэ хал Миро маро́, одолэ́ манушэ́скэ дэ́лапэ ве́чно джиибэ́н; маро́, саво́ Мэ да́ва, исын Мири́ лоч (маса́), савэ́ Мэ отда́ва, соб (кай) свэ́то тэ дживэ́л.”

⁵² Тэды Юды ячнэ́ тэ чингардэнпэ машки́р пэ́стэ, и ёнэ ракирдэ́: “Сыр да Ёв могинэ́ла тэ дэл тэ хас амэ́нгэ Лэ́скири лоч (плоть)?”

⁵³ Ису́со пхэндя́ лэ́нгэ: “Чачэс, чачэс Мэ ракира́ва тумэ́нгэ: ко́ли тумэ́ на явэ́на тэ хан Манушэ́скирэ-Чхавэскири лоч и на явэ́на тэ пьен Лэ́скиро рат, тэды тумэ́ндэ на явэ́ла джиибэ́н дрэ пэ́стэ.

⁵⁴ Одова́, кон ха́ла Мири́ Лоч и пьела Миро Рат, одолэ́скэ дэ́лапэ ве́чно джиибэ́н, и Мэ отджидякирава лэс дро палатуно́ дывэ́с;

⁵⁵ пал-дова́ со Лоч Мири́ исын чачуно́ хабэ́н, и Рат Миро исын чачуно́ пибэ́н;

⁵⁶ кон ха́ла Мири́ Лоч и пьела Миро Рат, одова́ дживэ́ла дрэ Ма́ндэ, и Мэ ячавапэ дрэ лэ́стэ.

⁵⁷ Адя́кэ-паць, сыр Джидо́ Дэвэ́л Дад бичхадя́ Ман, и Мэ джива́ва пал Дадэ́стэ, адя́кэ-паць и одова́, кон ха́ла Мири́ лоч, явэ́ла тэ дживэ́л пал Ма́ндэ.

⁵⁸ Кадава́ исын маро́, саво́ явдя́ болыбна́стыр, ёв исын на дасаво, сыр маро́, саво́ ханэ́ тумарэ́ дада́ и мынэ́: нэ одова́, кон ха́ла дава́ маро́, явэ́ла тэ дживэ́л ве́чнэс.”

⁵⁹ Дава́ Ёв ракирдя́ дрэ синагога, ке́ли сыклякирдя́ дро Капернаумо.

Лава́ пал Ве́чно Джиибэ́н

⁶⁰ Бут Лэ́скирэ сыкляибнытконэндыр, сыр шундлэ́ Лэс, ракирдэ́: “Саво́ пхаро́ исын сыклякирибэ́н! Кон могинэ́ла дава́ тэ шунэ́л?”

⁶¹ Ису́со джиндя́, со Лэ́скирэ лава́ холякирдэ сыкляибнытконэ́н, и Ёв пхэндя́ лэ́нгэ: “Ци дава́ зачхувэла тумэн тэ мэкэ́н Ман?”

⁶² Нэ со явэ́ла, ке́ли тумэ́ явэ́на тэ дыкхэ́н, сыр Чхаво́ Манушэ́скиро ґаздэ́лапэ одори́к, кай Ёв сыс англэды́р?

⁶³ Ду́хо (Фа́но) дэ́ла джиибэ́н, а дро манушы́тко лоч (плоть) нанэ ни сави́ зор. Лава́, савэ́ Мэ ракира́ва тумэ́нгэ, исын ду́хо (фа́но) и джиибэ́н.

⁶⁴ Нэ исын машки́р тумэ́ндэ и адасавэ́, савэ́ на патя́на.” Пал-дова́ со Ису́со джиндя́ англэды́р, кон дрэ Лэ́стэ на патя́ла и кон бикнэла Лэс.

⁶⁵ И Ёв ракирдя́: “Ваш дава́ и Мэ ракира́ва тумэ́нгэ, со нико́н на явэ́ла кэ Мэ, ко́ли дава́ на явэ́ла дыно́ лэ́скэ Мирэ́ Дадэ́стыр.”

⁶⁶ Пал дава́ бут Лэ́скирэ сыкляибны́тка мэкнэ́ Лэс и ёнэ буты́р на псирдэ́ Лэ́са.

⁶⁷ Тэды Ису́со пхэндя́ дэшудуенгэ: “Ци на камэ́на и тумэ́ тэ джа́н пэ́скэ?”

⁶⁸ Си́моно Пэ́три Лэ́скэ отпхэндя́: “Раё Дэ́вла! Кэ кон амэ́нгэ тэ джас? Ту́тэ исын лава́, савэ́ дэ́на ве́чно джиибэ́н.

⁶⁹ Амэ акана́ джина́са и патя́са, со Ту сан Христо́со, Свэ́нто Дэвлэ́скиро Чхаво́.”

⁷⁰ Ису́со отпхэндя́ лэ́нгэ: “Ци на Мэ выкэдыём дэшудуен тумэн, нэ екх тумэ́ндыр исын на́лачхо.”

⁷¹ Ёв ракирдя́ пал Юдастэ, Симоноскирэ-Искариотоскирэ чхавэ́стэ, саво́ сыс екх дэшудуендыр, пал-дова́, со ёв кэдэласпэ тэ бикнэл Лэс.