Joannostir 5 - Библия - Пэ Балтитко Романи чиб (Романэс) 2019

Ису́со Састякирэ́ла пашы́л Компины́тко Штэ́то

¹ Пало́ саро́ дава́ сыс Юды́тко свэ́нко, и Ису́со гия́ дро Ерусалимо.

² Дро Ерусалимо, на́дур Бакритконэ портатыр, сыс вэндэри (прудо), саво́ пир Юды́тко чиб кхарэ́лапэ “Вифезда”, паш сави́ сыс трэ́мо (коридоро) панджинэ прогиибнэнца.

³ Одо́й сыс паштэ́ бут насвалэ: корорэ́, лангалэ, шукэ́, /ёнэ ужакирэнас панескиро кунипэн/.

⁴ Пал-дова́ со Дэвлэ́скиро Янго́ло пир дова́-паць часо джа́лас тэлэ́ и кунякирэлас пани́, и кон англэды́р заджалас дрэ вэндэри́н (прудо), одова́ высастёла, савья́са дукхаса ёв тэ на явэ́л.

⁵ Одо́й сыс екх ману́ш, саво́ сыс насвало́ трияндаохто бэрш.

⁶ Ису́со дыкхця́ лэс, со ёв сыс пашто́ и джины́, со ёв исын насвало́ адя́кэ ґара́ (длу́гэс), пхуця́ лэ́стыр: “Ци камэ́са ту тэ высастёс?”

⁷ Насвало ману́ш отпхэнэ́лас Лэ́скэ: “Раё! Ма́ндэ нанэ ману́ш, саво́ чхувэлас ман дрэ вэндэри́н, сыр пани́ кунякирэлапэ; а ке́ли мэ ява́ва пашылэды́р, тэды вари-кон яви́р змэкэлапэ англэды́р ма́ндыр.”

⁸ Ису́со ракирэ́ла лэ́скэ: “Ушты́, лэ пэ́скиро чхуибэ́н и псир.”

⁹ Кадава́ ману́ш дрэ дава́-паць моменто высастия, лыя́ пэ́скиро чхуибэ́н и гия́. Адава́ дывэ́с сыс са́вато (субо́та).

¹⁰ Палдава́ Юды ракирдэ́ высастякирдэскэ: “Ададывэ́с исын са́вато; ту́кэ нашты́ тэ лэс чхуибэ́н.”

¹¹ Ёв отпхэнэ́лас лэ́нгэ: “Одова́, Кон ман высастякирдя́, пхэндя́ ма́нгэ: ‘Лэ пэ́скиро чхуибэ́н и псир’”

¹² Ёнэ пхучнэ́ Лэ́стыр палдава́: “Кон исын Одова́ Ману́ш, Саво́ пхэндя́ ту́кэ: ‘Лэ пэ́скиро чхуибэ́н и псир?’”

¹³ Нэ ману́ш, саво́ высастия, на джиндя́ кокоро́, кон Ёв адасаво́ сыс, пал-дова́ со Ису́со сыг гарадыя дро манушэ́нгиро скэдыибэ́н, саво́ сыс пэ дова́ штэ́то.

¹⁴ Коригэды́р (позжэ) Ису́со стрэниндя лэс дрэ Кхангири́ и пхэндя́ лэ́скэ: “Ѓа́да, ту какана́ сан састо́: на грешын буты́р, соб (кай) тэ на кэрэ́лпэ ту́са вари-со фуеды́р.”

¹⁵ Кадава́ ману́ш гия́ кэ Юды и роспхэндя́ лэ́нгэ, со ману́ш, Саво́ высастякирдя́ лэс, исын Ису́со.

¹⁶ И палдава́ Юды ячнэ́ тэ традэ́н Исусо́с пал дова́, ками́ тэ замарэ́н Лэс, со Ёв кэрдя́ дасавэ́ рэ́нды (де́лы) дро са́вато.

¹⁷ Нэ Ису́со отпхэндя́ лэ́нгэ: “Миро Дад кэ какана́ кэрэ́ла лачхэ́ рэ́нды и Мэ адя́кэ-паць кэра́ва.”

¹⁸ Тэды Юды ишчо (инкэ́) бутэды́р лынэ́ тэ родэ́н Лэс, соб (кай) тэ замарэ́н Лэс, пал-дова́, со Ёв фэ́ни на свэнкиндя са́вато, нэ и кхардя́ Дэвлэ́с Пэ́скирэ Дадэ́са, сы́рбы Ёв гиндя Пэс адя́кэ-паць Дэвлэ́са.

Чхавэ́скиро Пра́во

¹⁹ Нэ Ису́со пхэндя́ лэ́нгэ: “Чачэс, чачэс, Мэ ракира́ва тумэ́нгэ: Чхаво́ нисо́ нашты́ тэ кэрэ́л Кокоро́ Пэ́стыр, ко́ли Ёв тэ на дыкхэ́л, со кэрэ́ла Дад, пал-дова́ со дова́, со Дад кэрэ́ла, дова́-паць кэрэ́ла и Чхаво́.

²⁰ Пал-дова́ со Дадэ́скэ исын дро́го Лэ́скиро Чхаво́ и Ёв сыкавэ́ла Лэ́скэ саро́, со кэрэ́ла Кокоро́; Ёв сыкавэ́ла Лэ́скэ най буты́р рэ́нды далэндыр, со тумэ́ явэ́на тэ дивинэнпэ.

²¹ Пал-дова́ со, сыр Болыбна́скиро Дад ґаздэ́ла мулэн и отджидякирэла лэн, адя́кэ-паць и Чхаво́ отджидякирэла одолэ́н, конэ́с исын Лэ́скэ пир ило́.

²² Дад никонэ́с на сэндинэла, нэ Ёв допатяндыя саро́ сэ́ндо Чхавэ́скэ;

²³ соб (кай) сарэ́ тэ кутякирэн Чхавэ́с, сыр кутякирэна Дадэ́с. Кон на кутякирэла Чхавэ́с, одова́ на кутякирэла и Дадэ́с, Саво́ бичхадя́ Лэс.

²⁴ Чачэс, чачэс Мэ ракира́ва тумэ́нгэ: одова́, кон шунэ́ла Миро Лав и патя́ла Кодолэ́скэ, Кон бичхадя́ Ман, лэ́стэ исын ве́чно джиибэ́н и ёв пэ сэ́ндо на явэ́ла, ёв какана́ пиригия мэрибна́стыр дро джиибэ́н.

²⁵ Чачэс, чачэс Мэ ракира́ва тумэ́нгэ: явэ́ла часо и ёв акана́ явдя́, ко́ли мулэ́ явэ́на тэ шунэ́н Дэвлэ́скирэ-Чхавэскири зан (глос), и, кон шунэ́ла, отджидёла.

²⁶ Пал-дова́ со, сыр Дад рикирэ́ла джиибэ́н Кокоро́ дрэ Пэ́стэ, пал-дова́ со Ёв сыс Кокоро́ джиибна́скири ґаны́нг, адя́кэ-паць и Чхавэ́скэ Ёв дыя́ зор тэ рикирэ́л джиибэ́н дрэ Кокорэстэ Пэ́стэ;

²⁷ и Ёв дыя́ Чхавэ́скэ право тэ сэндинэл, пал-дова́ со Ёв исын Манушэ́скиро Чхаво́.

²⁸ На дивинэнпэ пэ дава́, пал-дова́ со явэ́ла дасаво часо, дрэ саво́ сарэ́ мулэ́, явэ́на тэ шунэ́н Дэвлэ́скирэ-Чхавэскири зан;

²⁹ и джа́на яври́ маґилэндыр (кулэ́ндыр): одолэ́, савэ́ кэрдэ́ лачхипэ́н, отджидёна-ваш джиибнытко Кралипэ́н; а одолэ́, савэ́ кэрдэ́ налачхипэн, отджидёна ваш дова́, соб (кай) тэ явэ́н сэндиндлэ.

Ису́со Ракирэ́ла пал Пэ́стэ и пал Иано́стэ

³⁰ Мэ нашты́ (на могина́ва) нисо́ тэ кэра́в Кокоро́ Пэ́стыр, Мэ сэндинава адя́кэ, сыр Ма́нгэ исын пхэндло́ тэ сэндинав, и Миро сэ́ндо исын чачуно́, пал-дова́ со Мэ на кэра́ва пир Пэ́скири во́ля, а пир Мирэ́-Дадэ́скири во́ля, Саво́ Ман бичхадя́.

³¹ Ко́ли Мэ допхэнава Кокоро́ пал Пэ́стэ, то допхэныбэ́н Миро исын на чачуно́.

³² Исын Ма́ндэ яви́р якхи́тко (свидетелё), саво́ допхэнэ́ла пал Ма́ндэ, и Мэ джино́м, со саро́, со Ёв ракирэ́ла пал Ма́ндэ, исын чачипэ́н.

³³ Тумэ́ бичхавэнас манушэ́н кэ Иа́но и лэ́скиро допхэныбэ́н исын чачуно́.

³⁴ Ма́нгэ на трэй манушэ́нгиро допхэныбэ́н, а Мэ ракира́ва ваш дова́, соб (кай) тумэ́ тэ зракхэнпэ.

³⁵ Иа́но сыс момолы́тко (свети́льнико), саво́ хачолас и дэ́лас яг и тумэ́ вари-саво́ часо радындлэпэ паш лэ́скири яг.

³⁶ А Ма́ндэ исын допхэныбэ́н барэды́р Ианоскирэстыр; одолэ́ рэ́нды, савэ́ Дад дыя́ Ма́нгэ тэ кэра́в, и савэ́ Мэ кэра́ва, дава́ исын допхэныбэ́н, со бичхадя́ Ман Миро Дад.

³⁷ Пал Ма́ндэ допхэнэ́ла Кокоро́ Миро Дад, Саво́ бичхадя́ Ман, тумэ́ ние́кхвар на шундлэ́ Лэ́скири зан, и на дыкхнэ́ Лэс

³⁸ И тумэ́ на ракхэна Лэ́скиро лав дрэ пэ́скирэ илэ, палдова́ со тумэ́ на патя́на Одолэ́скэ, Савэс Ёв бичхадя́.

³⁹ Тумэ́ сыклякирэ́на миштэ́с Свэ́нто Чхиныбэ́н, пал-дова́ со тумэ́ дэна годы пэскэ думинэ́на, со пир лэ́стэ тумэ́ндэ явэ́ла ве́чно джиибэ́н; а Свэ́нто Чхиныбэ́н допхэнэ́ла пал Ма́ндэ,

⁴⁰ нэ тумэ́ усае́кх на камэ́на тэ явэ́н кэ Мэ, соб (кай) тэ явэ́л тумэ́ндэ ве́чно джиибэ́н.

⁴¹ Ма́нгэ на трэй, соб (кай) мануша́ тэ шарэ́н Ман.

⁴² Мэ джино́м (джина́в) миштэ́с тумэн, тумэ́ на рикирэ́н сыр Дро́гима Дэвлэ́с дро тумаро́ ило́.

⁴³ Мэ явдём кэ тумэ́ ваш Мирэ́-Дадэ́скиро лав, и тумэ́ Ман на приґалёна, нэ ке́ли вари-кон яви́р явэ́ла кэ тумэ́ кокоро́ пэ́стыр, тумэ́ приґалёнас лэс.

⁴⁴ Сыр тумэ́ могинэ́на тэ упатян, ке́ли тумэ́ прилэ́на манушы́тко шарибэ́н екх екхэстыр, а на родэ́на шарибэ́н екхэ Дэвлэ́стыр?

⁴⁵ На́ дэн годы́ пэ́скэ (на́ думинэн), со Мэ ява́ва тэ бангякирав тумэн анги́л Дадэ́стэ: Мо́йза явэ́ла тэ бангякирэл тумэн, пэ савэ́стэ тумэ́ розгинэна.

⁴⁶ Ко́ли тумэ́ патянас Мойза́скэ, тумэ́ и Ма́нгэ патянас, пал-дова́ со ёв чхиндя́ пал Ма́ндэ.

⁴⁷ Нэ сыр тумэ́ на патя́на долэ́скэ, со чхиндя́ Мо́йза, сыр явэ́на тэ патя́н долэ́скэ, со Мэ ракира́ва тумэ́нгэ?”