Joannostir 20 - Библия - Пэ Балтитко Романи чиб (Романэс) 2019

Чхучи́ Копли́ца. Исусо́скиро Отджидыибэ́н

¹ Дро пэ́рво куркэскиро дывэ́с, пэ зло́ко, ке́ли сыс ишчо (инкэ́) кало́ (цёмно), Мари́я Магдалина явдя́ кэ копли́ца, и дыкхэ́ла, со бар сыс рискирдо загиибнастыр дрэ копли́ца.

² Ёй ада́й жэ прастындой явдя́ кэ Си́моно Пэ́три и кэ яви́р Лэ́скиро сыкляибны́тко, саво́ сыс дро́го Исусо́скэ, и ракирэ́ла лэ́нгэ: “Ёнэ лыджинэ́ Рас-Дэвлэ́с коплицатыр криг, и амэ на джина́са, карик ёнэ чхудэ́ Лэс.”

³ Пэ́три и яви́р сыкляибны́тко гинэ́ кэ копли́ца.

⁴ Ёнэ праста́ндынэ дуйджинэ́; нэ яви́р сыкляибны́тко праста́ндыя сыгэды́р Пэтристыр и ёв англэды́р явдя́ кэ копли́ца.

⁵ И ёв бандия и дыкхця́ паштэ́ похтана, нэ ёв на загия́ андрэ́ дрэ копли́ца.

⁶ Пала́л пал лэ́стэ припрастандыя Си́моно Пэ́три, и загия́ дрэ копли́ца, и дыкхэ́ла, со похтана сыс паштэ́,

⁷ и гараибнытко дыкхло, савэ́са сыс обпхандло Лэ́скиро шэро́, и саво́ на сыс кхэтанэ́ пашто́ гараибнытконэ похтанэса, нэ сыс скрэнцындло пэ яви́р штэ́то.

⁸ Тэды и яви́р сыкляибны́тко загия́, саво́ анги́л припрастандыя кэ копли́ца, ёв дыкхця́, и упатяндыя;

⁹ пал-дова́ со ёнэ ешчэ на джиндлэ́ Свэнтонэ́ Чхиныбна́стыр, со Лэ́скэ трэиндя́ тэ отджидёл мулэ́ндыр.

¹⁰ Тэды Лэ́скирэ сыкляибны́тка рисинэ́ кхэрэ́.

Ису́со Сыкадёла Мария́кэ Магдалина́кэ

¹¹ Нэ Мари́я сыс тэрды пашы́л копли́ца и рондя́. И ке́ли ёй рондя́, ёй бандия и задыкхця дрэ копли́ца,

¹² и ёй дыкхця́ дуе́н Янголэн, савэ́ сыс бэштэ́ дрэ парны и́дя пэ дова́ штэ́то, кай сыс пашто́ Исусо́скиро тру́по, екх дрэ шэро́, яви́р пашы́л ґэра́.

¹³ И ёнэ ракирэ́на ла́кэ: “Джувлие! Со́скэ ту ровэса?” Ёй ракирэ́ла лэ́нгэ: “Ёнэ лыджинэ́ криг мирэ́ Рас-Дэвлэ́с, и мэ на джино́м, карик ёнэ чхудэ́ Лэс.”

¹⁴ Сыр ёй пхэндя́ дава́, ёй обрисия палэ и дыкхця́ Исусо́с, Саво́ сыс тэрдо́ анги́л ла́тэ; нэ ёй на ґалыя́, со дава́ сыс Ису́со.

¹⁵ Ису́со ракирэ́ла ла́кэ: “Джувлие! Со́скэ ту ровэса? Конэ́с ту родэса?” Ёй думиндя, со дава́ исын бутярно, саво́ кэрэ́ла буты́ дрэ бар, и ракирэ́ла Лэ́скэ: “Хула́ё! Ко́ли (со) ту вылыджиян Лэс, пхэн ма́нгэ, кай ту чхудя́н Лэс, и мэ ла́ва Лэс.”

¹⁶ Ису́со ракирэ́ла ла́кэ: “Марие!” Ёй обрисия и пхэндя́ Лэ́скэ юдыткэс: “Раввуни!” (со значынэ́ла “Сыклякирибна́скиро!”)

¹⁷ Ису́со ракирэ́ла: “На чилав Ман, пал-дова́ со Мэ на рисиём кэ Миро Дад; джа́ кэ Мирэ́ пша́ла и пхэн лэ́нгэ: “Мэ рисёва́ва кэ Миро Дад и тумаро́ Дад и кэ Миро Дэвэ́л и кэ тумаро́ Дэвэ́л”.”

¹⁸ Мари́я Магдалина гия́ кэ сыкляибны́тка и пхэндя́ лэ́нгэ, со ёй дыкхця́ Рас-Дэвлэ́с и ёй роспхэндя́ лэ́нгэ дова́, со Ису́со пхэндя́ ла́кэ.

Ису́со Сыкадёла Лэ́скирэ Сыкляибнытконэ́нгэ би Фама́скиро

¹⁹ Дрэ доя́ пэ́рво куркэскири бэльвэ́ль, кай Лэ́скирэ сыкляибны́тка сыс кхэтанэ́ бэштэ́ палэ запхандлэ вудара́ дара́тыр Юдэндыр, явдя́ Ису́со, и тэрдия́ машкира́л, и ракирэ́ла лэ́нгэ: “Рама́нё (миро) тумэ́нгэ!”

²⁰ Ке́ли Ёв пхэндя́ дава́, Ёв сыкадя́ лэ́нгэ васта́ и Пэ́скирэ пашварэ. Сыкляибны́тка древа́н обрадындлэпэ, ке́ли дыкхнэ́ Рас-Дэвлэ́с.

²¹ Ису́со пхэндя́ лэ́нгэ яви́р мо́ло: “Рама́нё тумэ́нгэ! Сыр Дад бичхадя́ Ман, адя́кэ и Мэ бичхава́ва тумэн.”

²² Ке́ли Ёв пхэндя́ дава́, Ёв пхурдыя пэ лэ́ндэ и пхэндя́ лэ́нгэ: “Прилэ́н Свэ́нто Ду́хо (Фа́но):

²³ конэ́скэ тумэ́ явэ́на тэ примангэн грэ́хи, одолэ́нгэ явэ́на приманглэ, нэ пэ конэ́стэ тумэ́ ячкирэна, пэ одолэ́ндэ ёнэ ячэ́напэ.”

Ису́со и Фома́

²⁴ О Фама́, екх дэшэдуендыр сыкляибнытконэндыр, савэ́с кхардэ́ “Близняко”, на сыс лэ́нца, ке́ли Ису́со явдя́.

²⁵ Яви́р сыкляибны́тка пхэндлэ́ лэ́скэ: “Амэ дыкхцям Рас-Дэвлэ́с.” Нэ ёв отпхэндя́ лэ́нгэ: “Ко́ли (со) мэ на дыкха́ва шпэ́ра гвоздэндыр (карфинэндыр) пэ Лэ́скирэ васта́, и мэ на чхува́ва миро ангу́шт дро штэ́то, кай сыс гвозды (карфина), и мэ на чхува́ва миро васт дрэ Лэ́скирэ пашварэ, Мэ на упатява.”

²⁶ Пир охто́ (бидуе́нгиро дэш) дывэса́ Лэ́скирэ сыкляибны́тка нэвэ́стыр сарэ́ кхэтанэ́ скэдынэ́пэ дро кхэр, и Фама сыс лэ́нца. Явдя́ Ису́со, ке́ли вудара́ сыс запхандлэ, тэрдия́ машки́р лэ́ндэ, и пхэндя́: “Рама́нё тумэ́нгэ!”

²⁷ Тэ́ньци ёв ракирэ́ла Фамаскэ: “Дэ ангу́шт (пальцо) тыро́ адари́к и подыкх Мирэ́ васта́; дэ васт тыро́ и чхув дрэ Мирэ́ пашварэ; и пирияч тэ кунинэспэ, а патя.”

²⁸ Фама пхэндя́ Лэ́скэ дро отпхэныбэ́н: “Раё Дэ́вла миро и Дэвэ́л миро!”

²⁹ Ису́со ракирэ́ла лэ́скэ: “Ту патяндыян, пал-дова́ со ту дыкхця́н Ман: нэ бахталэ́ исын кодолэ́, савэ́ на дыкхнэ́ Ман, а ёнэ упатя́ндынэ.”

Ваш со Дая́ Лылвари́

³⁰ Бут яви́р знаме́нии (ґертыка́) кэрдя́ Ису́со анги́л Пэ́скирэ сыкляибнытконэндэ, пал савэ́ нанэ чхиндло́ дрэ дая́ лылвари́;

³¹ нэ саро́, со сыс чхиндло́ дрэ дая́ лылвари́, исын ваш тумэ́нгэ, соб (кай) тумэ́ тэ патя́н, со Ису́со исын Христо́со, Дэвлэ́скиро Чхаво́, и пир патяибэ́н дрэ Лэ́стэ, тумэ́ тэ дживэ́н Лэ́скирэ лавэ́стыр.