Joannostir 17 - Библия - Пэ Балтитко Романи чиб (Романэс) 2019

Ису́со Мангэ́лапэ пал Пэ́скирэ Сыкляибнытконэ́ндэ

¹ Пало́ далэ́ лава́ Ису́со ґаздыя́ пэ́скирэ якха́ пэ болыбэ́н и пхэндя́: “Да́до! Миро мардо́ (часо) явдя́: славин Пэ́скирэ Чхавэ́с, соб (кай) Чхаво́ тэ славинэл Тут,

² адя́кэ-паць, сыр Ту дыя́н Лэ́скэ право пэ кажно лоч (плоть), адя́кэ-паць и Ёв дэ́ла ве́чно джиибэ́н одолэ́нгэ, конэ́с Ту дыя́н Лэ́скэ.

³ А ве́чно джиибэ́н исын дро дова́, соб (кай) тэ джинэ́н Тут, Екхэ́с Чачипнаскирэ Дэвлэ́с, и Исусо́с Христосо́с, Савэс Ту бичхадян.

⁴ Мэ славиндём Тут пэ пхув, кэрдём буты́, сави́ Ту допатяндыян Ма́нгэ тэ кэра́в.

⁵ И какана́, Да́до, славин Ман слава́са, сави́ сыс Ма́ндэ, ке́ли Мэ со́мас Ту́тэ анги́л, сыр свэ́то сыс создыно́.

⁶ Мэ отчхакирдём лав Тыро́ манушэ́нгэ, савэ́н Ту дыя́н Ма́нгэ свэто́стыр. Адалэ́ мануша́ сыс Тырэ́, и Ту Ма́нгэ дыя́н лэн, и ёнэ ракхнэ Тыро́ лав.

⁷ Какана́ ёнэ ґалынэ́, со саро́, со Ту дыя́н Ма́нгэ, исын Ту́тыр;

⁸ пал-дова́ со лав, саво́ Ту Ма́нгэ дыя́н, Мэ дыём лэ́нгэ, и ёнэ прилынэ́ лэс и чачунэ́с ґалынэ́, со Мэ явдём Ту́тыр, и ёнэ патя́на, со Ту бичхадян Ман.

⁹ Акэ, Мэ манга́ва пал лэ́ндэ: На пал саро́ свэ́то манга́ва, а пал одолэ́ндэ, савэ́н Ту дыя́н Ма́нгэ, пал-дова́ со ёнэ исын Тырэ́.

¹⁰ Пал-дова́ со саро́, со исын Ма́ндэ-Тыро́, и Миро саро́, со исын Ту́тэ, и дрэ лэ́ндэ Мэ прославиндёмпэ.

¹¹ Мэ на сом буты́р дро свэ́то, а ёнэ исын дро свэ́то. Мэ джа́ва кэ Ту, нэ ёнэ ячэ́напэ дро свэ́то. Свэ́нто Да́до! Зра́кх лэн Тырэ́ лавэ́са, одолэ́н, савэ́н Ту дыя́н Ма́нгэ, соб (кай) ёнэ тэ явэ́н пал екх, сыр и Амэ сам Ту́са.

¹² Ке́ли Мэ со́мас лэ́нца дро свэ́то, Мэ приракхавас лэн Тырэ́ лавэ́са; одолэ́н, савэ́н Ту дыя́н Ма́нгэ, Мэ приракхцём, и нико́н лэ́ндыр на хасия́ апри́ч чхавэ́стэ, савэ́скэ трэй тэ хасёл, мэк тэ сполнинэ́лпэ Свэ́нто Чхиныбэ́н.

¹³ Какана́ Мэ джа́ва кэ Ту, и дава́ Мэ ракира́ва, пака Мэ сом дро свэ́то, соб (кай) лэ́ндэ тэ явэ́л Мири́ пхэрды́ ра́дыма дрэ пэ́стэ.

¹⁴ Мэ пиридыём лав Тыро́ лэ́нгэ, и свэтоскэ сыс древа́н на пир ило́, пал-дава́ со ёнэ нанэ далэ́ свэто́стыр, сыр и Мэ на сом далэ́ свэто́стыр.

¹⁵ Мэ на манга́ва, соб (кай) Ту тэ лэс лэн свэто́стыр, нэ соб (кай) Ту тэ приракхэс лэн чорипна́стыр;

¹⁶ ёнэ исын на далэ́ свэто́стыр, сыр и Мэ на сом далэ́ свэто́стыр.

¹⁷ Кэр лэн свэнтонэнца Тырэ́ чачипна́са. Тыро́ лав исын чачипэ́н.

¹⁸ Сыр Ту бичхадян Ман дрэ свэ́то, адя́кэ-паць и Мэ бичхадём лэн дро дава́ свэ́то.

¹⁹ Мэ отдыём пэс Ту́кэ пал лэ́ндэ, соб (кай) и ёнэ тэ отдэ́н пэс Ту́кэ пир чачипэ́н.

²⁰ Нэ Мэ манга́ва на пал екхэндэ лэ́ндэ, нэ и пал одолэ́ндэ, савэ́ патя́на дрэ Ма́ндэ пир лэ́нгиро лав;

²¹ соб (кай) ёнэ тэ явэ́н сарэ́ сыр екх, сыр Ту, Да́до, сан дрэ Ма́ндэ, и Мэ сом дрэ Ту́тэ, адя́кэ-паць Мэ и ёнэ тэ явэ́н дрэ Амэ́ндэ, мэк тэ упатял свэ́то, со Ту бичхадян Ман.

²² И бари паты́в, сави́ Ту дыя́н Ма́нгэ, Мэ дыём лэ́нгэ: мэк тэ явэ́н ёнэ пал екх, сыр Амэ сам Ту́са екх.

²³ Мэ сом дрэ лэ́ндэ, и Ту сан дрэ Ма́ндэ; мэк ёнэ тэ явэ́н скэдынэ́ дро екх, и мэк свэ́то тэ джинэ́л, со Ту бичхадян Ман, и со Ту́кэ ёнэ исын дро́га, адя́кэ-паць, сыр и ёнэ ячнэ́ дро́га Ма́нгэ.

²⁴ Да́до! Савэ́н Ту дыя́н Ма́нгэ, ёнэ ячнэ́ дро́га Ма́нгэ, соб (кай) ёнэ тэ явэ́н одо́й кхэтанэ́ Ма́нца, кай и Мэ; мэк ёнэ тэ дыкхэ́н Мири́ бари паты́в, сави́ Ту дыя́н Ма́нгэ, пал-дова́ со Ту́кэ Мэ яцём дро́го анги́л, сыр свэ́то сыс создыно́.

²⁵ Чачуно́ Миро Да́до! И свэ́то на уджиндя́ Тут: а Мэ уджиндём Тут, и ёнэ уджиндлэ́, со Ту бичхадян Ман;

²⁶ и Мэ сыкадём лэ́нгэ Тыро́ лав и Мэ ява́ва тэ сыкавав, соб (кай) доя́ ла́ска, сави́ исын Ту́тэ кэ Мэ, тэ явэ́л дрэ лэ́ндэ, сыр и Мэ сом дрэ лэ́ндэ.”