Joannostir 16 - Библия - Пэ Балтитко Романи чиб (Романэс) 2019

Сыр Явэ́на тэ Традэ́н Дэвлытконэ́н

¹ Мэ пхэндём дава́ тумэ́нгэ, соб (кай) тумэ́ тэ на отпэрэн.

² Тумэн традэ́на яври́ кхангирьендыр; и явэ́ла дасаво часо (цы́ро), ке́ли одова́ ману́ш, саво́ замарэла тумэн, явэ́ла тэ думинэл, со ёв далэ́са дынаринэла Дэвлэ́скэ.

³ Ёнэ явэ́на тэ кэрэ́н адя́кэ, пал-дова́ со адалэ́ мануша́ на джиндлэ́ ни Дадэ́с, ни Ман.

⁴ Нэ Мэ пхэндём тумэ́нгэ дава́ ваш дова́, соб (кай) тумэ́, ке́ли явэ́ла одова́ часо, тэ рипирэ́н, со Мэ ракирдём тумэ́нгэ пал дава́; Мэ англэды́р на ракирдём тумэ́нгэ пал дава́, пал-дова́ со Мэ со́мас тумэ́нца.

Свэнтонэ́-Духо́скири Буты́

⁵ Нэ какана́ Мэ джа́ва кэ Одова́, Кон бичхадя́ Ман, нэ нико́н тумэ́ндыр на пхучэла Ма́ндыр: ‘Карик Ту джа́са?’

⁶ Нэ долэ́стыр, со Мэ пхэндём дова́ тумэ́нгэ, тумаро́ ило́ яця́ тэ пиридживэл.

⁷ Нэ Мэ, чачэс, ракира́ва тумэ́нгэ: фэды́р ваш тумэ́нгэ, соб (кай) Мэ тэ джав; ко́ли Мэ на джа́ва, тэды Обрадыпнаскиро на явэ́ла кэ тумэ́, нэ ко́ли Мэ джа́ва, тэды Мэ бичхава́ва Лэс кэ тумэ́.

⁸ И, ке́ли Ёв явэ́ла, бангякирэла свэ́то пал грэ́хо, и пал чачипэ́н, и пал сэ́ндо:

⁹ пал грэ́хо, саво́ исын дрэ дова́, со мануша́ на патя́на дрэ Ма́ндэ;

¹⁰ пал чачипэ́н, со Мэ джа́ва кэ Миро Дад, и тумэ́ буты́р на дыкхэ́на Ман;

¹¹ пал сэ́ндо, со кадалэ́ свэтоскиро кра́ли явэ́ла сэндиндло.

¹² Какана́ бут со исын тэ пхэна́в тумэ́нгэ, нэ тумэ́ акана́ на могинэ́на тэ ґалён.

¹³ Ке́ли явэ́ла Ёв, чачипна́скиро Ду́хо (Фа́но), тэды сыкавэ́ла тумэ́нгэ чачуно́ дром дро джиибэ́н; пал-дова́ со Ёв явэ́ла тэ ракирэ́л на Кокоро́ Пэ́стыр, нэ Ёв пхэнэ́ла тумэ́нгэ одова́, со шунэ́ла, и Ёв пхэнэ́ла, со явэ́ла анги́л.

¹⁴ Ёв славинэла Ман, пал-дова́ со саро́, со Ёв пхэнэ́ла, Ёв уджинэла Ма́ндыр и роспхэнэ́ла тумэ́нгэ.

¹⁵ Саро́, со исын Дадэ́стэ, исын Миро. Палдава́ Мэ пхэндём тумэ́нгэ, со Ёв Ма́ндыр уджинэла и роспхэнэ́ла тумэ́нгэ.

Смэ́тныма (Печаль) и Ра́дыма

¹⁶ Сыг тумэ́ на дыкхэ́на Ман, нэ сыг тумэ́ нэвэ́стыр явэ́на тэ дыкхэ́н Ман; пал-дова́ со Мэ джа́ва кэ Дад.”

¹⁷ Ада́й вари-савэ́ Лэ́скирэ сыкляибны́тка пхэндлэ́ екх екхэ́скэ: “Со дава́ Ёв ракирэ́ла амэ́нгэ: ‘Сыг тумэ́ на явэ́на тэ дыкхэ́н Ман’, а сыг тумэ́ нэвэ́с дыкхэ́на Ман, и: ‘Мэ джа́ва кэ Дад’?”

¹⁸ И адя́кэ ёнэ ракирдэ́: “Со да дасаво Ёв ракирэ́ла: ‘Сыг?’ Амэ на ґалёваса, со Ёв ракирэ́ла.”

¹⁹ Ису́со ґалыя́, пал со ёнэ камэ́на тэ пхучэ́н Лэ́стыр, и пхэндя́ лэ́нгэ: “Ци пал дова́ тумэ́ пхучэна екх екхэстыр, со Мэ пхэндём: ‘Со сыг тумэ́ на явэ́на тэ дыкхэ́н Ман, нэ нэвэ́стыр сыг тумэ́ дыкхэ́на Ман?’

²⁰ Чачэс, чачэс ракира́ва Мэ тумэ́нгэ: тумэ́ явэ́на тэ ровэ́н и тэ пиридживэн, нэ свэ́то явэ́ла тэ радынэ́лпэ; тумэ́ явэ́на тэ смэнтнинэн (тэ тугинэн), нэ тумари́ смэнтныма ячэ́ла радыма́са.

²¹ Джувлы́, ке́ли биянэ́ла, мэнчынэлапэ, пал-дова́ со явдя́ ла́киро мардо́ (шту́нда); нэ ке́ли ёй биянэ́ла тыкнорэс, бистрэла радыма́тыр пал мэ́ньки, пал-дова́ со бия́ндыя ману́ш пэ свэ́то.

²² Адя́кэ-паць и тумэ́ какана́ сан смэнтна; нэ Мэ ява́ва тэ дыкха́в нэвэ́стыр тумэн, и ило́ тумаро́ явэ́ла пхэрдо́ радыма́са, дая́ ра́дыма тумэ́ндыр нико́н на отлэла.

²³ И дро одова́ дывэ́с тумэ́ на пхучэна Ма́ндыр ни пал со. Чачэс, чачэс Мэ ракира́ва тумэ́нгэ: пал со тумэ́ тэ на мангэ́н Дадэ́с Мирэ́ лавэ́стыр, Ёв дэ́ла тумэ́нгэ.

²⁴ Кэ дава́ часо тумэ́ нисо́ на мангнэ́ Мирэ́ лавэ́са, мангэ́н, и дорэсэ́на, соб (кай) ра́дыма дро тумаро́ ило́ тэ явэ́л пхэрды́.

Упралыпэ́н пэ Дава́ Свэ́то

²⁵ Кэ дава́ часо Мэ ракирдём тумэ́нгэ притчэнца, нэ сыг явэ́ла часо, ке́ли Мэ на ява́ва тэ ракира́в тумэ́нгэ притчы, нэ маму́й (прямэс) Мэ пхэна́ва тумэ́нгэ пал Дадэ́стэ.

²⁶ Дрэ одова́ дывэ́с тумэ́ явэ́на тэ мангэ́н Мирэ́ лавэ́стыр и Мэ на ракира́ва тумэ́нгэ, со Мэ ява́ва тэ мангав пал тумэ́ндэ Дадэ́с:

²⁷ пал-дова́ со Кокорэскэ Дадэ́скэ тумэ́ сан дро́га, пал тумари́ ла́ска кэ Мэ и пал патяибэ́н, со Мэ явдём Дэвлэ́стыр.

²⁸ Мэ явдём Дадэ́стыр дро дава́ свэ́то; и нэвэ́стыр Мэ мэкава свэ́то и джа́ва кэ Дад.”

²⁹ Лэ́скирэ сыкляибны́тка пхэндлэ́ Лэ́скэ: “Ѓа́да, какана́ Ту ракирэ́са маму́й, и Ту на ракирэ́са нисавэ притчы!”

³⁰ Какана́ амэ дыкхаса, со Ту саро́ джинэ́са англэды́р, и на трэй, соб (кай) вари-кон тэ пхучэл Ту́тыр; палдава́ амэ патя́са, со Ту явдя́н Дэвлэ́стыр.”

³¹ Ису́со отпхэндя́ лэ́нгэ: “Какана́ тумэ́ патя́на?

³² Ѓа́да, сыг подджа́ла мардо́ (шту́нда), и подги́я какана́, со тумэ́ роспрастанапэ кажно дрэ пэ́скири риг и Ман тумэ́ ячкирэна Екхэ́с; нэ Мэ на сом Екхджино́, пал-дова́ со Дад исын Ма́нца;

³³ ґа́да, Мэ пхэндём тумэ́нгэ, соб (кай) тумэ́ тэ явэ́н дро рама́нё Ма́нца. Дро свэ́то мэ́ньки тумэн ужакирэ́на; нэ рикирэнпэ муршканэ́с: Мэ збердындём (пиризорьякирдём) дава́ свэ́то”