Jakov 5 - Библия - Пэ Балтитко Романи чиб (Романэс) 2019

Приракхибэн Барвалэнгэ

¹ Какана́ шунэ́н тумэ́, барвалэ́ мануша́лэ, ровэ́н и годлэн зоралэ́с анги́л хасибэ́н, саво́ явэ́ла пэ тумэ́ндэ.

² Барвалыпэ́н тумаро́ кирныя, и урибэ́н хая мэль (моль)

³ Пэ тумаро́ сувнака́й и руп иржа лыя́ упралыпэ́н, дая́ иржа явэ́ла сыр допхэныбэ́н пэ тумэ́ндэ, и схала тумарэ́ маса́ сыр яг. Тумэ́ скэдынэ́ пэ́скэ кучипэ́н пэ палатунэ́ дывэса́.

⁴ Ѓа́да, исын мазу́ри (награда), сави́ тумэ́ на доплэскирдэ бутярнэнгэ, савэ́ укэдэнас маро́ тумарэ́ фэлдатыр, далэ́ ловэ́ дэ́на ґодла ясвэ́нца и лэ́нгири го́дла догия́ кэ болыбна́скирэ-янголэ́нгиро Рай Дэвэ́л.

⁵ Тумэ́ дживдэ́ дро барвалыпэ́н пэ пхув ваш пэ́скирэ-масэ́нгиро камибэн; тумэ́ чалякирдэ тумаро́ пэр пэ хасякирибэн;

⁶ тумэ́ сэндиндлэ и мулякирдэ манушэ́н, савоэ сыс чачуноэ; ёнэ на сыс проти тумэ́ндэ.

Вырикирэ́н и Мангэ́нпэ Дэвлэ́скэ

⁷ Пшала́лэ, вырикирэн ґара́ (длу́гэс), пака явэ́ла Рай Дэвэ́л. Ѓа́да, ґавитко ману́ш ужакирэ́ла аплодо пхувья́тыр и ваш лэскэ ёв ужакирэ́ла ґара́ (длу́гэс), пака явэ́ла тасярлуно (раннё) и коригуно (позднё) брышы́нд.

⁸ Тумэ́ адя́кэ-паць вырикирэн ґара́ (длу́гэс): явэ́н зоралэды́р пэ́скирэ илэнца дро патяибэ́н, пал-дова́ со Дэвэ́л явэ́ла сыг пашылэды́р.

⁹ Пшала́лэ, на дэн ґондя́ (на уздыхинэн) холя́са екх пэ екхэ́стэ, соб (кай) тумэ́ тэ на явэ́н сэндиндлэ. Ѓа́да, исын тэрдо́ Сэнда́ри пашы́л вуда́р.

¹⁰ Пшала́лэ мирэ́, сыклён пророкэндыр, сыр ёнэ страдындлэ и сыр ґара́ ёнэ ужакирдэ, савэ́ ракирдэ́ Дэвлэ́скирэ лавэ́стыр.

¹¹ Ѓа́да, амэ гинаса бахталэнца одолэ́ манушэ́н, савэ́ сыс зоралэ́с тэрдэ́ дрэ мэ́ньки. Тумэ́ шундлэ́ пал Иоваскири тва́рдыма дрэ мэ́ньки и дыкхнэ́, со ёв дорэсця́ дро ко́нцо (дро яго́ро) Дэвлэ́стыр, пал-дова́ со Дэвэ́л древа́н тангинэла и жалинэла манушэ́н.

¹² Анги́л сарэ́стыр, мирэ́ пшала́лэ, на совлахан ни болыбнаса, ни пхувья́са, и нисавэ явирэ совлахаса; нэ мэк тэ явэ́л тумаро́ лав “ны, аи”, сыр “ны, аи”, а тумаро́ лав “над” сыр “над”, и тумэ́ на явэ́на тэл сэ́ндо.

¹³ Ци вари-кон тумэ́ндыр мэнчынэлапэ? Мэк ёв тэ мангэ́лпэ Дэвлэ́скэ. Ци исын вари-кон радо тумэ́ндыр? Мэк ёв тэ багал псалмы.

¹⁴ Ци исын вари-кон насвало́ тумэ́ндыр? Мэк ёв тэ кхарэл кэ пэ годэпхурэн Кхангирья́тыр, и мэк ёнэ тэ мангэ́нпэ Дэвлэ́скэ пэ лэ́стэ, и мэк ёнэ тэ макхэн лэс оливитконэ дзэтэса ваш Дэвлэ́скиро лав;

¹⁵ и мангипэ́н Дэвлэ́скэ патяибна́са высастякирэла насвалэс и Дэвэ́л кэрэ́ла зоралэса лэс; а ко́ли ёв кэрдя́ грэ́хи, тэды саро́ явэ́ла отмэкно лэ́скэ.

¹⁶ Приджинэн пэ́скирэ грэ́хи екх анги́л екхэ́стэ, соб (кай) тумэ́ тэ высастён: чачунэ́ манушэ́скиро мангипэ́н кэрэ́ла бари буты́.

¹⁷ Проро́ко Или́я сыс адасаво́-паць ману́ш, сыр и амэ сам, нэ ёв сарэ́ илэ́стыр мангдя́пэ Дэвлэ́скэ, соб (кай) тэ на явэ́л брышы́нд; и на сыс брышы́нд пэ пхув трин бэрш и шов чхона́,

¹⁸ и нэвэ́стыр мангдя́пэ Дэвлэ́скэ ёв, и болыбэ́н дыя́ брышы́нд, и пхув нэвэ́стыр лыя́ тэ дэл аплодо.

¹⁹ Пшала́лэ мирэ́, ко́ли вари-кон тумэ́ндыр змарэлапэ чачунэ́ дромэ́стыр, нэ яви́р ману́ш рискирэ́ла лэс палэ кэ Дэвэ́л,

²⁰ мэк тэ джинэ́л одова́ ману́ш, со кодова́ ману́ш, кон рискирэлас палэ кэ Дэвэ́л грэхитконэ́ манушэ́с, ёв зракхэ́ла лэс мэрибна́стыр, и бут лэ́скирэ грэ́хи явэ́на гарадэ́.