Jakov 4 - Библия - Пэ Балтитко Романи чиб (Романэс) 2019

На Дживэ́н Адя́кэ, Сыр Свэ́то Кэрэ́ла

¹ Каты́р явэ́ла марибэ́н пал лава́ и чингарда́ машки́р тумэ́ндэ? Ци дава́ на тумарэ́ масэнгирэ тырдыпнастыр, саво́ марэлапэ андрэ́ тумэ́ндэ?

² Тумэ́ камэ́на вари-со, нэ тумэ́ на дорэсэ́на дава́, и тумэ́ замарэна (мулякирэна) екх екхэ́с пир дова́, со тумэ́ дэ́на якхало и тумэ́ на могинэ́на тэ дорэсэн ни саво́ лачхипэ́н, тумэ́ чингардэнапэ и марэнапэ пал лава́ и ничы́ тумэ́ндэ нанэ, пал-дова́ со тумэ́ на мангэна Дэвлэ́с.

³ Мангэна и на дорэсэ́на, пал-дова́ со тумэ́ мангэна на пэ лачхэ́ рэ́нды, нэ ваш дова́, соб (кай) тэ розмэкэн ваш пэ́скирэ маса́.

⁴ Напатяибнытка мурша́ и джувля́! Ци на джинэ́на тумэ́, со малыпэн (дружба) грэхитконэ́ манушэ́нца свэто́стыр исын проти Дэвлэ́стэ? И адя́кэ, кон выкэдэ́ла пэ́скэ малэ́с (друго́с) адалэ́ свэто́стыр, одова́ явэ́ла проти Дэвлэ́стэ.

⁵ Со тумэ́ думинэ́на, хай, Свэ́нто Чхиныбэ́н ракирэ́ла ивья́ лава́: “Ду́хо (Фа́но), Саво́ дживэ́ла дрэ амэ́ндэ, кэрэ́ла пэ́скэ, соб (кай) амэ фэ́ни тэ явас Лэ́скирэ?”

⁶ Нэ Дэвэ́л дэ́ла барэды́р бахтякирибэ́н. Пал-дова́ со и исын пхэндло́: “Дэвлэ́скэ исын на дро́га пхутькирдэ́, а Ёв бахтякирэ́ла напхутькирдэ манушэ́н.”

⁷ И палдава́ отдэ́н пэс Дэвлэ́скэ, явэ́н проти налачхэстэ и Ёв нашэла криг тумэ́ндыр.

⁸ Явэ́н пашылэды́р кэ Дэвэ́л, и Ёв явэ́ла пашылэды́р кэ тумэ́. Выжужакирэн грэхи́тка, тумарэ́ васта́. Выжужакирэн тумаро́ джиибэ́н, тумэ́ сан дуемитка.

⁹ Пиридживэн кэ хасибэ́н, тугинэн зоралэ́с и ровэ́н, мэк тумаро́ сабэн тэ рисёл кэ тумэ́ дрэ ясва, тумари́ ра́дыма дрэ туча.

¹⁰ Чхувэ́н пэс тэлэды́р анги́л Дэвлэ́стэ, и Ёв ґаздэ́ла вучэ́с тумэн.

На́ Сэндякирэ́н Пэ́скирэ Пшалэ́с

¹¹ Пшала́лэ, на ракирэ́н чорипэ́н екх пэ екхэ́стэ. Ману́ш, саво́ ракирэ́ла чорипэ́н пэ пэ́скирэ пшалэ́стэ, ци сэндинэла пэ́скирэ пшалэ́с, одова́ ману́ш ракирэ́ла чорипэ́н пэ Зако́но и сэндинэла Зако́но. Нэ ко́ли ту сэндинэса Зако́но, тэды ту на кэрэ́са пир Зако́но, а ту сан сэнда́ри.

¹² Исын Екх, Кон дыя́ Зако́но и исын Сэнда́ри, Саво́ могинэ́ла тэ зракхэ́л и тэ хасякирэ́л: нэ кон жа ту сан адасаво́, соб (кай) тэ сэндинэс пхарэ́с явирэ манушэ́с?

Приракхибэ́н, Соб (кай) тэ на́ Шарэ́нпэ

¹³ Какана́ шунэ́н тумэ́, савэ́ ракирэ́на: “Ададывэ́с ци атася́ традаса кэ дасаво фо́ро, и ява́са тэ джива́с одо́й екх бэрш, и ява́са тэ кофаринас и явэ́ла амэ́ндэ саро́;

¹⁴ а тумэ́ ж на джинэ́на, со явэ́ла атася́, и со дава́ исын тумаро́ джиибэ́н? Ёв исын сы́рбы тхув, саво́ явэ́ла пэ набаро́ часо, нэ коригэды́р (позжэ) хасёла;

¹⁵ заме́ст дова́, соб (кай) тэ пхэнэ́н тумэ́нгэ: “Ко́ли тэ явэ́л пэ дава́ Дэвлэ́скири во́ля, и, ко́ли амэ ява́са джидэ́, тэды кэра́са дава́ и яви́р.”

¹⁶ А тумэ́ шарэнапэ пэ́скирэ пхутькирибнастыр: саро́ дасаво шарибэ́н исын фуипэ́н.

¹⁷ И палдава́, кон джинэ́ла тэ кэрэ́л лачхипэ́н и на кэрэ́ла, одолэ́ манушэ́скэ явэ́ла грэ́хо.