Jakov 3 - Библия - Пэ Балтитко Романи чиб (Романэс) 2019

Манушы́тко Чиб

¹ Пшала́лэ мирэ́! Мэк тумэ́ тэ на сарэ́ гинэн пэс сыклякирибнаскирэнца, пал-дова́ со тэды амэн явэ́на тэ сэндинэ́н барэ́ строгимаса.

² Пал-дова́ со амэ сарэ́ частэс обштавасапэ пир грэ́хо. Ко́ли вари-кон на кэрэ́ла грэ́хо лавэ́са, одова́ ману́ш исын бидошакиро, саво́ могинэ́ла тэ пхандэл сы́рбы цугленца сарэ́ пэ́скирэ маса́.

³ Ѓа́да, амэ чхуваса цугли (удилы) дрэ муя́ грэнгэ, соб (кай) ёнэ тэ кандэ́н амэн, и тэды амэ рикираса зор пэ сарэ́ лэ́нгирэ маса́.

⁴ Адя́кэ-паць и па́рмы (корабли), савэ́ ёнэ тэ на явэ́н барэ́ и сави́ зоралы́ балва́л лэн тэ на традэл, лэн лыджа́ла набарэ́ рулёса (стэроса) пармакиро стэритко (рулитко), карик ёв закамэ́ла.

⁵ Адя́кэ-паць и чиб исын, хай, набари паш амарэ́ масэнгири, нэ бут шарэлапэ. Дыкх, сави́ исын набари яг, нэ сыр баро́ вэш ёй хачкирэ́ла.

⁶ Чиб-дава́ исын сы́рбы доя́-паць яг, савья́тыр могинэ́ла тэ явэ́л бут фуипэ́н; чиб исын машкира́л амарэ́ масэнгирэ паша́, со калякирэла саро́ и могинэ́ла тэ схачкирэл саро́ амаро́ джиибэ́н яга́са, сави́ джа́ла люностыр (адостыр).

⁷ Пал-дова́ со сарэ́н мурдалэ́н и чириклен, сарэ́н джидалэн, савэ́ исын пэ пхув и дро пани́, ману́ш лэ́ла зор пэ лэ́ндэ, соб (кай) ёнэ тэ кандэ́н лэс.

⁸ Нэ чиб нико́н манушэ́ндыр на могинэ́ла тэ пхандэл; дава́ исын чорипэ́н, саво́ нашты́ тэ урикирэс, ёй исын пхэрды́ мэрибнытконэ трутаса (ядоса).

⁹ Чибаса (чибьяса) барьякираса амэ Дэвлэ́с-Дадэ́с, и кошаса манушэ́н, савэ́н Дэвэ́л создыя́ пир Пэ́скиро дыкхибэ́н.

¹⁰ И кадалэ́-паць уштэндыр джа́ла лавэнгири бари паты́в и кошыбэ́н. Пшала́лэ мирэ́, на трэй, соб (кай) адя́кэ тэ явэ́л.

¹¹ Ци могинэ́ла тэ тхадэл екхэ ґанынгатыр гудло́ и кирко пани́.

¹² Пшала́лэ мирэ́, на могинэ́ла инжыритко кашт тэ биянэ́л маслины, ци винаградоскири рандь инжыро? Адя́кэ-паць и екхэ ґанынгатыр на могинэ́ла тэ тхадэл лондо и гудло́ пани́.

Саво́ Годыпэ́н исын Вучипна́стыр

¹³ Кон исын тумэ́ндыр тэ явэ́л годьваро́ и тэ джинэ́л саро́; мэк ёв тэ сыкавэ́л дава́ пэ рэ́ндо пэ́скирэ лачхэ́ джиибнаса и ковлэ́-илытконэ годыпнаса;

¹⁴ нэ ко́ли дро тумаро́ ило́ тумэ́ндэ исын кирко зэвлыныпэ́н и тумэ́ кэрэ́на пир холы́, тэды на шарэнпэ вучэ́с и на хохавэн пэ чачипэ́н.

¹⁵ Дава́ нанэ годыпэ́н, саво́ джа́ла болыбна́стыр, ёв исын пхувья́киро, бидухоскиро и джа́ла налачхэстыр.

¹⁶ А кай исын зэвлэныпэн и холы́, одо́й явэ́ла сыр бу́нто машки́р манушэ́ндэ и саро́ чорипэ́н.

¹⁷ Нэ годыпэ́н, саво́ джа́ла болыбна́стыр, англэды́р сарэ́стыр ёв исын жужо́ грэхостыр, раманёно, штыл (тихо), вырикирэ́ла бут, на пхандэла манушэ́с, исын пхэрдо́ тангипнаса и лачхэ́ рэндэ́нца, сэндинэла шэра́ (ра́внэс) манушэ́н, нанэ дуемитко.

¹⁸ А чачипэ́н дэ́ла аплодо одолэ́ манушэ́нгэ, савэ́ кокорэ́ кэрэ́на рама́нё (миро) и причхувэна зор ваш дава́.