Jakov 2 - Библия - Пэ Балтитко Романи чиб (Романэс) 2019

Приракхибэ́н тэ Сэндинэ́н Шэра́ (Ра́внэс)

¹ Пшала́лэ мирэ́! Ко́ли тумэ́ндэ исын патяибэ́н дрэ Исусо́стэ Христосо́стэ славутнонэ Растэ-Дэвлэ́стэ, сэндинэ́н шэра́ (ра́внэс) сарэ́н:

² пал-дова́ со, ко́ли дрэ тумари́ синагога заджа́ла ману́ш сувнакунэ́ ангрустяса и уридо́ дро зяиндло урибэ́н, и адя́кэ-паць заджа́ла чороро́ ману́ш дро кушно урибэ́н,

³ и тумэ́ дыкхэ́на патыва́са пэ манушэ́стэ, саво́ исын уридо́ дро зяиндло урибэ́н и пхэнэ́на лэ́скэ: “Ту́кэ явэ́ла куч тэ бэшэс ада́й, а чорорэскэ пхэнэ́на “Ту тэрдёв одо́й”, ци “Бэш ада́й пашы́л мирэ́ ґэра́”:

⁴ тэды тумэ́ сы́рбы кокорэ́ сэндинэна манушэ́н, далэ́са-паць тумэ́ ячэ́на налачхэ́ сэндарьенца?

⁵ Шунэ́н, мирэ́ дро́га пшала́лэ: Ци на выкэдыя́ Дэвэ́л одолэ́ манушэ́н, савэ́ исын чорорэ́ дро дава́ свэ́то тэ кэрэ́л барвалэнца лэн дро патяибэ́н и кралипнаскирэ чхавэ́нца, пал саво́ Ёв дыя́ лав сарэ́ манушэ́нгэ, конэ́скэ дро́го исын Ёв?

⁶ А тумэ́ ладжакирдэ́ чорорэс. Ци на сан тумэ́ тэл барвалэнгири зор, и ци на ёнэ тырдэна тумэн тэл сэ́ндо?

⁷ Ци на кошэна ёнэ лачхо́ лав, савэ́са кхарэ́на тумэн?

⁸ Ко́ли тумэ́ сан патяибнытка крали́скирэ Законоскэ, саво́ исын чхиндло́ дро Свэ́нто Чхиныбэ́н: “Рикир сыр дро́гима дро ило́ манушэ́с, саво́ исын пашы́л ту́тэ, сыр кокоро́ пэс, тэды тумэ́ кэрэ́на миштэ́с.”

⁹ Нэ ко́ли тумэ́ сэндинэна манушэ́н на шэра́ (ра́внэс), тэды тумэ́ кэрэ́на грэ́хо и тумэ́ сан бангэ́ анги́л Зако́но.

¹⁰ Пал-дова́ со, ко́ли вари-кон ракхэ́ла саро́ Зако́но и обштавэлапэ дро вари-со екх, со исын на пир Зако́но, одова́ ману́ш явэ́ла банго́ дро саро́.

¹¹ Пал-дова́ со Одова́, Кон пхэндя́: “На кэр биладжаипэ́н”, адя́кэ-паць пхэндя́: “На замар.” Ко́ли ту на кэрэ́са биладжаипэ́н, а замарэса, тэды ту адя́кэ-паць сан банго́ анги́л саро́ Зако́но.

¹² И ракирэ́н и кэрэ́н адя́кэ сы́рбы мануша́, савэ́н могинэ́на тэ сэндинэ́н пир Зако́но, саво́ дэ́ла во́ля;

¹³ пал-дова́ со ваш одолэ́ манушэ́нгэ, кон на сыкадя́ тангипэ́н (жалима) кэ яви́р мануша́, сэ́ндо явэ́ла би тангипнаскиро адя́кэ-паць кэ ёв, нэ тангипэ́н исын вучэды́р сэндостыр.

Кэрэ́н пир Патяибэ́н

¹⁴ Пшала́лэ мирэ́, саво́ исын проко (льго́та) адалэстыр, ко́ли ману́ш ракирэ́ла, со ёв патя́ла, нэ ни савэ́ лачхэ́ рэ́нды ёв на кэрэ́ла? Ци могинэ́ла дасаво патяибэ́н тэ зракхэ́л лэс?

¹⁵ Акэ, ко́ли тумаро́ пшал ци пхэн исын нангэ и бокхалэ́,

¹⁶ а вари-кон тумэ́ндыр пхэнэ́ла лэ́нгэ: “Джа́н раманёса (миро́са) и кокорэ́ урьявэнпэ и чаравэнпэ” и тумэ́ на дэ́на лэ́нгэ ничы́ ваш дова́, со исын трэй ваш лэ́нгэ, тэды саво́ проко явэ́ла кадасавэ́ патяибнастыр?

¹⁷ Адя́кэ-паць исын и патяибэ́н, ко́ли нанэ нисаво́ рэ́ндо лэ́стыр, тэды дасаво патяибэ́н исын муло́ кокоро́ пир пэ́стэ.

¹⁸ Нэ вари-кон пхэнэ́ла тумэ́ндыр: “Ту́тэ исын патяибэ́н, а ма́ндэ исын рэ́нды (де́лы).” Сыка́в ма́нгэ тыро́ патяибэ́н би рэндэнгиро, а мэ сыкава́ва миро патяибэ́н мирэ́ рэндэ́ндыр.

¹⁹ Ту патя́са, со Дэвэ́л исын екх. Ту кэрэ́са миштэ́с. И аж налачхэ́ ду́хи патя́на и издрана.

²⁰ Ци камэ́са ту тэ джинэ́с, нагодо ману́ш, со патяибэ́н би рэндэнгиро исын чхучо́ (пусто)?

²¹ Ци на пир рэ́нды Дэвэ́л приджиндя чачунэса дадэ́с амарэс Авраамос, ке́ли ёв яндя́ сыр свэ́нто дыибэ́н пэ́скирэ чхавэ́с Исаакос пэ алта́рё?

²² Ци дыкхэ́са ту, со патяибэ́н исын кхэтанэ́ лэ́скирэ рэндэ́нца и пир рэ́нды лэ́скиро патяибэ́н яця́ бидошакиро.

²³ И лав, саво́ исын чхиндло́ дро Свэ́нто Чхиныбэ́н, кэрдя́пэ пхэрдэ́с (сполниндяпэ): “Авраа́мо патяндыя Дэвлэ́скэ, пал дава́ Дэвэ́л приджиндя лэс чачунэса”, и ёв сыс кхардо Дэвлэ́скиро Мал.

²⁴ Ци дыкхэ́са ту, со Дэвэ́л приджинэла чачунэса манушэ́с пир рэ́нды, нэ на пир екх патяибэ́н?

²⁵ Адя́кэ-паць и Раха́в, сави́ сыс биладжакуны джувлы́, ци на пал ла́кирэ рэ́нды Дэвэ́л приджиндя чачуняса ла, ке́ли ёй прилыя́ Израилёскирэ поддыкхибнаскирэн и бичхадя́ лэн явирэ дромэ́са.

²⁶ Пал-дова́ со, сыр джидэ́ маса́ би духоскиро исын мулэ́, адя́кэ-паць и патяибэ́н исын муло́ би рэндоскиро.