Isúso 7 - Библия - Пэ Балтитко Романи чиб (Романэс) 2019

Аханоскири Банг

¹ Нэ Израилёскирэ чхавэ́ кэрдэ́ чорипэ́н и лынэ́ совлахадэстыр (прокошнэстыр): Ахано Хармияскиро чхаво́, Завдияскирэ-чхавэ́скиро, Заракирэ чхавэ́скиро, Юда́скирэ родыцо́стыр, лыя́ совлахадэстыр, и холы́ Ра́скирэ-Дэвлэ́скири захачи́я пэ Израилёскирэ чхавэ́ндэ.

² Ису́со (Ёхошуа́) Ерихоностыр бичхадя́ манушэ́н дро Гаё, со исын пашы́л Беф-Авено, васточнонэ Вефилёскирэ рига́тыр, и пхэндя́ лэ́нгэ: “Джа́н, обдыкхэн пхув”. Ёнэ гинэ́ и обдыкхнэ Гаё.

³ И рисинэ́ кэ Ису́со, и пхэндлэ́ лэ́скэ: “На сарэ́ мануша́ мэк тэ джа́н, а мэк тэ джа́н пашы́л дуй тысёнцы ци пашы́л трин тысёнцы манушэ́н, и тумэ́ домарэн Гаё; сарэ́ манушэ́н на лы́джа одори́к, пал-дова́ со лэн на́бут одо́й”.

⁴ И адя́кэ гинэ́ одори́к пашы́л трин тысёнцы манушэ́н народо́стыр; нэ ёнэ мэкнэпэ дро нашыбэн Гаёскирэ манушэ́ндыр.

⁵ Мануша́ Гаёскирэ замардэ́ лэ́ндыр кэ трия́нда шов манушэ́н, и традынэ лэн вударэндыр кэ / жы́ко Севаримо, и домардэ́ лэн пэ змэкибэн бэрга́тыр; со́стыр ило́ манушэ́нгиро розбиладя и яця́, сыр пани́.

⁶ Ису́со роскустя и́ди пэ́скирэ, и пыя́ пэ́скирэ мо́са пэ пхув анги́л Ра́скиро-Дэвлэ́скиро ковчэго, и пасия́ кэ бэльвэ́ль, ёв и Израилёскирэ пхурыдыра́, и обчхувэнас прахоса пэ́скирэ шэрэ́.

⁷ И пхэндя́ Ису́со: “Нэ, Раё Дэ́вла, Хула́ё! Ваш со Ту пирилыджиян адалэ́ манушэ́н пир Иорда́но, соб (кай) тэ отдэс амэн дрэ Аморее́нгирэ васта́, и тэ хасякирэс амэн? Нэ, ко́ли бы амэ тэ ячаспэ и тэ джива́с пал Иорда́но!

⁸ О, Раё Дэ́вла! Со ма́нгэ тэ пхэна́в пало́ дава́, сыр Израилё рисия́ думэса кэ пэ́скирэ вэ́рги?

⁹ Хананеи и сарэ́ пхувья́кирэ мануша́ ушунэна, и обджана сарэ́ ригэ́ндыр амэн, и хасякирэна лав амаро́ пхувья́тыр. И со скэрэса тэды лавэ́скэ Тырэ́скэ барэскэ?”

¹⁰ Рай Дэвэ́л пхэндя́ Исусо́скэ: “Ушты́, ваш со ту пыян пэ муй тыро́?

¹¹ Израилё кэрдя́ грэ́хо, и пиригинэ́ ёнэ Миро завето, саво́ Мэ дыём лав лэ́нгэ; и лынэ́ совлахадэстыр, и чордэ, и схачкирдэ́, и чхудэ́ машки́р пэ́скирэ вешчы (вешча).

¹² Палдава́ Израилёскирэ чхавэ́ на могиндлэ́ тэ вытэрдён анги́л пэ́скирэ вэргэ́ндэ, и сыкадэ палуй (тыло) пэ́скирэ вэргэ́нгэ, пал-дова́ со ёнэ попынэ тэл совэ́л (прокошыбэ́н); Мэ на ява́ва буты́р тумэ́нца, ко́ли на хасякирэна пэ́стыр засовлахадэс.

¹³ Ушты́, обсвэнцын манушэ́н и пхэн: обсвэнцынэнпэ кэ зло́ко (ра́нко); пал-дова́ со адя́кэ ракирэ́ла Рай Дэвэ́л, Дэвэ́л Израилёскиро: совлахадо исын машки́р ту́тэ, Израилё: палдава́ ту на могинэ́са тэ затэрдёс анги́л вэргэ́ндэ тырэндэ, пака протрадэса пэ́стыр засовлахадэс.

¹⁴ Атася́ подджан сарэ́ пир тумаро́ ро́дыцо, саво́ упхэнэла Рай Дэвэ́л, мэк тэ подджа́л пир кхэри́тко ро́до (племё); кхэри́тко ро́до, саво́ упхэнэла Рай Дэвэ́л, мэк тэ подджа́л пир чэ́карь (семейство), сави́ упхэнэла Рай Дэвэ́л, мэк тэ подджа́л пир екхэ манушэ́стэ.

¹⁵ И манушэ́с угалёна, кон чордя совлахадэстыр, мэк лэс тэ схачкирэн яга́са, лэс и саро́, со лэ́стэ, пал-дова́ со ёв пиригия Ра́скирэ-Дэвлэ́скиро завето и кэрдя́ проти зако́но машки́р Израилё.

¹⁶ Ису́со, уштыя́ тася́рлэс (ра́нэс) ранкоса, и пхэндя́ тэ подджа́л Израилёскэ пир лэ́скиро ро́дыцо; и сыс упхэндло́ ро́дыцо Юда́скиро.

¹⁷ Коригэды́р (позжэ) пхэндя́ тэ подджа́л Юда́скирэ кхэритконэ́ родо́скэ; и упхэндло́ кхэри́тко ро́до Заракиро. Пхэндя тэ подджа́л Зариноскиро родо́скэ пир чэ́карь, и сыс упхэндлы сыс чэ́карь (семейство) Завдиёскири.

¹⁸ Пхэндя тэ подджа́л лэ́скирэ чэкарьякэ пир екхэ манушэ́стэ, и сыс упхэндло́ Ахано, Хармиёскиро чхаво́, Завдиёскиро чхаво́, Заракиро чхаво́, Юда́скирэ родыцо́стыр.

¹⁹ Тэды Ису́со пхэндя́ Аханоскэ: “Миро чхава! Воздэ Ра́скэ-Дэвлэ́скэ, Израилёскирэ Дэвлэ́скэ сла́ва, и приґалёвпэ анги́л Лэ́стэ, и дэ тэ джина́в ма́нгэ, со ту кэрдя́н; на счхакир ма́ндыр”.

²⁰ Дрэ отпхэныбэ́н Исусо́скэ Ахано пхэндя́: “Чачунэ́с, мэ кэрдём грэ́хо анги́л Растэ-Дэвлэ́стэ, Дэвлэ́стэ Израилёскирэстэ и кэрдём дова́ и дова́.

²¹ Машкира́л дорэсыбэ́н (добыча) екх шука́р Сенаароскири и́дя, и дуй шэла́ шэ́кели руп, и котэ́р (куско) сувнака́й вагаса дрэ пандждэша́ шэ́кели; дава́ ма́нгэ покамдяпэ, и мэ лыём дава́; и гада, ёв исын гарадо́ дрэ пхув машкира́л мири́ ша́тра, и руп тэл ла́тэ”.

²² Ису́со бичхадя́ манушэ́н, и ёнэ праста́ндынэ дрэ ша́тра; и ґа́да, саро́ дава́ сыс гарадо́ дрэ лэ́скири ша́тра, и руп тэл ла́тэ.

²³ Ёнэ лынэ́ дава́ шатратыр, и яндлэ́ кэ Ису́со и кэ сарэ́ Израилёскирэ чхавэ́, и чхудэ́ анги́л Растэ-Дэвлэ́стэ.

²⁴ Ису́со и сарэ́ Израильтя́ни лэ́са лынэ́ Аханос, Зариёскирэ чхавэ́с, и руп, и и́дя, и котэ́р сувнака́й, и лэ́скирэ чхавэ́н, и лэ́скирэ чхае́н, и лэ́скирэ гурувэ́н, и лэ́скирэ ослэн, и лэ́скирэ бакрэ́н, и лэ́скири ша́тра, и саро́, со лэ́стэ сыс, и вылыджинэ́ лэн пэ до́ло Ахороскиро.

²⁵ И пхэндя́ Ису́со: “Пал дова́, со ту яндян пэ амэ́ндэ би́да, Рай Дэвэ́л пэ ту́тэ янэ́ла би́да дрэ дава́ дывэ́с”. И мардэ́ лэс сарэ́ Израильтя́ни барэ́нца, и схачкирдэ́ лэн яга́са, и чхурдынэ́ пэ лэ́ндэ бара́.

²⁶ И чхурдынэ́ пэ лэ́стэ бари куча бара́, сави́ исын и кэ дава́ дывэ́с. Пало́ дава́ штылыя Раскири-Дэвлэ́скири холы́. Палдава́ дова́ штэ́то сыс кхардо долоса Ахор адя́кэ-паць кэ дава́ дывэ́с.