Isúso 24 - Библия - Пэ Балтитко Романи чиб (Романэс) 2019

Завето дро Сихемо

¹ И скэдыя́ Ису́со сарэ́ Израилёскиро ро́дыцы дро Сихемо, и кхардя́ Израилёскирэ пхурыдырэн, и лэ́скирэ барыдырэ́н, и лэ́скирэ сэндарьен, и лэ́скирэ дыкхибнаскирэн, и тэрдинэ́ ёнэ анги́л Растэ-Дэвлэ́стэ, Дэвлэ́стэ.

² И пхэндя́ Ису́со сарэ́ манушэ́нгэ: “Адя́кэ ракирэ́ла Рай Дэвэ́л, Дэвэ́л Израилёскиро: ‘Пал рэка (лэнь) ґара́ дживдэ́ тумарэ́ дада́, Фара, Авраамо́скиро дад и Нахороскиро дад, и дынариндлэ́ явирэ дэвлорэ́нгэ.

³ Нэ Мэ лыём тумарэ́ дадэ́с Авраамос пирда́л рэка (лэнь), и лыджиём лэс пир сари́ Ханаано́скири пхув, и создыём баро́ лэ́скиро ро́до, и дыём лэ́скэ Исаакос.

⁴ Исаако́скэ дыём Яково́с и Исавос. Исавоскэ дыём Мэ бэ́рга Сеиро дрэ мэкно́ миштыпэ́н (наследиё); Яково и лэ́скирэ чхавэ́ пиригинэ́ дро Еги́пто.

⁵ И бичхадём Мэ Мойза́с и Аароно́с и Мэ домардём Еги́пто язвэнца (франсэнца), савэ́ кэрдём Мэ машки́р лэ́стэ, и коригэды́р (позже) вылыджиём тумэн.

⁶ Мэ вылыджиём тумарэ́ дадэн Египто́стыр, и тумэ́ явнэ́ кэ Лоло́ мо́рё (дэрья́в). Тэды Египтя́ни традынэпэ пал тумарэ́ дадэндэ пэ марибны́тка вурдэна́ вурдэнэнца и манушэ́нца, савэ́ сыс бэштэ́ уклистэ́ пэ грэ́ндэ кэ Лоло́ мо́рё (дэрья́в);

⁷ Нэ ёнэ лынэ́ тэ дэн го́дла кэ Рай Дэвэ́л, и Ёв чхудя́ калыпэ́н машки́р тумэ́ндэ и Египтянэндэ, и Ёв яндя́ пэ лэ́ндэ мо́рё (дэрья́в), саво́ лэн и зачхакирдя. Тумарэ́ якха́ дыкхнэ́, со Мэ кэрдём дро Еги́пто. Коригэды́р (позже) бут дывэса́ тумэ́ са́нас пэ чхучи́ пхув.

⁸ И яндём Мэ тумэн пэ Амореенгири пхув, савэ́ дживдэ́ пал Иорда́но; ёнэ мардэ́пэ тумэ́нца, нэ Мэ отдыём лэн дрэ тумарэ́ васта́, и тумэ́ дорэснэ́ (долынэ) дро мэкно́ миштыпэ́н (наследиё) лэ́нгири пхув, и Мэ традыём криг лэн анги́л тумэ́ндэ.

⁹ Газдыяпэ о Вала́ко, Сепфороскиро чхаво́ Моавоскиро кра́ли, и гия́ марибна́са пэ Израилё, и бичхадя́ и кхардя́ Валаамос, Веоровоскирэ чхавэ́с, соб (кай) ёв тэ прокошэл тумэн;

¹⁰ нэ Мэ на камдём тэ кандав Валаамос, и ёв бахтякирдя́ тумэн, и Мэ зракхцём тумэн лэ́скирэ вастэ́ндыр.

¹¹ Тумэ́ пиригинэ́ Иорда́но и явнэ́ кэ Ерихо́но. И лынэ́ тэ марэ́нпэ тумэ́нца Ерихоноскирэ мануша́, Амореи, и Ферезеи, и Хананеи, и Хетеи, и Гергесеи, нэ Мэ отдыём лэн дрэ тумарэ́ васта́.

¹² Мэ бичхадём анги́л тумэ́ндэ шершнен, савэ́ традынэ криг лэн тумэ́ндыр, дуе́н Аморее́нгирэ кралье́н; на тырэ́ куртала́са и на тырэ́ лукоса дава́ сыс кэрдо́.

¹³ И дыём Мэ тумэ́нгэ пхув, пэ сави́ ту на кэрдя́н буты́, и фо́рья, савэ́ тумэ́ на кэрдэ́, и тумэ́ дживэ́на дрэ лэ́ндэ; винаградытконэ и инжыритконэ унтэндыр (садэндыр), савэ́ тумэ́ на чхудэ́ дрэ пхув, тумэ́ ха́на барьякирдэ́ (пло́ды).

¹⁴ И адя́кэ, дарэ́н Ра́стыр-Дэвлэ́стыр, и дынаринэ́н Лэ́скэ дрэ жужыма и дро чачипэ́н: отчхурдэн дэвлорэ́, савэ́нгэ дынариндлэ́ тумарэ́ дада́ пал рэка (лэнь) дро Еги́пто, а дынаринэ́н Ра́скэ-Дэвлэ́скэ.

¹⁵ Ко́ли тумэ́нгэ нанэ пир ило́ тэ дынаринэ́н Ра́скэ-Дэвлэ́скэ, то тэды выкэдэн пэ́скэ акана́, конэ́скэ тэ дынаринэс, ци дэвлорэ́нгэ, савэ́нгэ дынариндлэ́ тумарэ́ дада́, савэ́ сыс пал рэка (лэнь), ци Аморее́нгирэ дэвлорэ́нгэ, пэ пхув савэнгири тумэ́ дживэ́на; а мэ и миро кхэр ява́са тэ дынарина́с Ра́скэ-Дэвлэ́скэ”.

¹⁶ И отпхэндлэ́ мануша́ и пхэндлэ́: “Над, на явэ́ла дова́, соб амэ тэ ячкирас Рас-Дэвлэ́с и яця́м тэ дынарина́с явирэ дэвлорэ́нгэ!

¹⁷ Палдава́ со Рай Дэвэ́л, Дэвэ́л амаро́, Ёв вылыджия́ амэн и амарэ́ дадэн Египто́скирэ пхувья́тыр, дынарибнаскирэ кхэрэ́стыр, и кэрдя́ анги́л амарэ́ якха́ барэ́ знаме́нии (ґертыка́), и ракхця́ амэн пэ саро́ дром, пир саво́ амэ гиям, и машки́р сарэ́ манушэ́ндэ, пирда́л савэ́ндэ амэ прогиям.

¹⁸ О Рай Дэвэ́л традыя́ криг амэ́ндыр сарэ́ манушэ́н и Амореен, савэ́ дживдэ́ пэ дая́ пхув, пал-дова́ и амэ ява́са тэ дынарина́с Ра́скэ-Дэвлэ́скэ, пал-дова́ со Ёв исын амаро́ Дэвэ́л”.

¹⁹ Ису́со пхэндя́ манушэ́нгэ: “Тумэ́нгэ нашты́ тэ дынаринэ́н Ра́скэ-Дэвлэ́скэ, пал-дова́ со Ёв, Дэвэ́л, исын свэ́нто, исын Дэвэ́л зэвлыныпнытко (ревнителё), Ёв на явэ́ла тэ вырикирэл тумаро́ проштавибэн (беззакониё) и тумарэ́ грэ́хи.

²⁰ Ко́ли тумэ́ ячкирэна Рас-Дэвлэ́с и явэ́на тэ дынаринэ́н явирэ дэвлорэ́нгэ, тэды Ёв янэ́ла пэ тумэ́ндэ хась и протрадэла тумэн, пало́ дава́, сыр Ёв кэрдя́ лачхипэ́н тумэ́нгэ”.

²¹ И пхэндлэ́ мануша́ Исусо́скэ: “Над, амэ ява́са тэ дынарина́с Ра́скэ-Дэвлэ́скэ”.

²² Ису́со пхэндя́ манушэ́нгэ: “Тумэ́ сан якхи́тка пал пэ́стэ, со тумэ́ выкэдынэ́ пэ́скэ Рас-Дэвлэ́с – тэ дынаринэ́н Лэ́скэ?” Ёнэ отпхэндэ: “Якхи́тка сам амэ”.

²³ “И адя́кэ, отчхурдэн на пэ́скирэ дэвлорэ́, савэ́ исын тумэ́ндэ, и рискирэ́н пэ́скиро ило́ кэ Рай Дэвэ́л, Дэвэ́л Израилёскиро”.

²⁴ Мануша́ пхэндлэ́ Исусо́скэ: “Амарэ́ Ра́скэ-Дэвлэ́скэ, Дэвлэ́скэ, амэ ява́са тэ дынарина́с, и Лэ́скири зан (глос) ява́са тэ шунас”.

²⁵ И кэрдя́ Ису́со манушэ́нца завето дро дова́-паць дывэ́с, и дыя́ лэ́нгэ упхэныбэ́н и Зако́но дро Сихемо.

²⁶ И дочхиндя Ису́со далэ́ лава́ дрэ Дэвлэ́скирэ-Законоскири лылвари́, и лыя́ баро́ бар, и чхудя́ лэс одо́й тэл дэмбо, саво́ сыс пашы́л Ра́скирэ-Дэвлэ́скиро свэ́нто штэ́то.

²⁷ И пхэндя́ Ису́со сарэ́ манушэ́нгэ: “Ѓа́да, дава́ бар явэ́ла тумэ́нгэ якхитконэса, пал-дова́ со ёв шундя́ сарэ́ Ра́скирэ-Дэвлэ́скирэ лава́, савэ́ Ёв ракирдя́ амэ́нца; мэк ёв тэ явэ́л якхитконэса проти тумэ́ндэ, соб (кай) тумэ́ тэ на хохавэн анги́л тумарэ́ Дэвлэ́стэ”.

²⁸ И отмэкхця Ису́со манушэ́н, кажнонэс (сваконэс) дрэ пэ́скири миштыпна́скири ме́ра.

²⁹ Пало́ дава́ мыя́ о Ису́со (Ёхошуа́), Навиноскиро чхаво́, Ра́скиро-Дэвлэ́скиро писха́ри, сыс шэл еня́ бэрш лэ́скэ.

³⁰ И гарадэ́ лэс пэ лэ́скири миштыпна́скири меракири риг дрэ Фамнаф-Сараи, со исын пэ Ефремо́скири бэ́рга [Сэрах-ю.о.], пэ паш-рат (северо) бэрга́тыр Гаашатыр.

³¹ И дынариндя́ Израилё Ра́скэ-Дэвлэ́скэ дрэ сарэ́ дывэса́ Исусо́скирэ и дрэ пхурыдырэнгирэ дывэса́, дживдэ́ пал Исусо́стэ и, савэ́ дыкхнэ́ сарэ́ Дэвлэ́скирэ рэ́нды, савэ́ Ёв кэрдя́ Израилёскэ.

³² И кокалы́ Иосифо́скирэ (Ёза́скирэ), савэ́ вылыджинэ́ Израилёскирэ чхавэ́ Египто́стыр, гарадэ́ дро Сихемо, дрэ фэ́лда, сави́ киндя Яково Емороскирэ чхавэ́ндыр, Сихемоскирэ дадэ́стыр, пал шэл рупувэ́ ґасталя, и саво́ яця́пэ дрэ миштыпна́скири ме́ра Иосифо́скирэ чхавэ́нгэ.

³³ Пало́ саро́ мыя́ и Елеазаро, Аароноскиро чхаво́, и гарадэ́ лэс пэ Финеесоскири бэ́рга, лэ́скирэ чхавэскири, сави́ сыс дыны́ лэ́скэ пэ Ефремо́скири бэ́рга.

³⁴ [Дро дова́ дывэ́с чхавэ́ Израилёскирэ, лынэ́ Дэвлэ́скиро ковчэго и ёнэ лыджинэ́ лэс пэ́са, и о Финеесо сыс раша́й пэ штэ́то Елеазароскиро, саво́ сыс лэ́скиро дад; сыр ёв мыя́, то гарадэ́ лэс дро лэ́скиро фо́ро Гаваофо.

³⁵ И чхавэ́ Израилёскирэ гинэ́ кажно (сва́ко) пэ пэ́скиро штэ́то и дро пэ́скиро фо́ро.

³⁶ И чхавэ́ Израилёскирэ лынэ́ тэ дынаринэ́н (тэ служынэн) Астартакэ и Астарофоскэ, и Дэвлорэ́нгэ, савэ́нгэ дэ́нас паты́в нации, савэ́ дживдэ́ пашл лэ́ндэ. И огдыя Рай Дэвэ́л лэн дрэ васта́ Еглоноскирэ, кон сыс Моавитэнгиро кра́ли, и ёв рикирдя зор пэ лэ́ндэ дэшуохто бэрш.-р.с.]