Isúso 23 - Библия - Пэ Балтитко Романи чиб (Романэс) 2019

Ису́со (Ёхошуа́) Розячэлапэ Манушэ́нца

¹ Сыр прогия́ бут часо пало́ дова́, сыр Рай Дэвэ́л штылякирдя Израилё сарэ́ лэ́скирэ вэргэ́ндыр сарэ́ ригэ́ндыр, Ису́со пхурия, загия́ дрэ пхурэ́ бэрша́.

² И кхардя́ кэ пэ Ису́со сарэ́н Израилёскирэ чхавэ́н, лэ́нгирэ пхурыдырэн, лэ́нгирэ барыдырэ́н, лэ́нгирэ сэндарьен и лэ́нгирэ дыкхибнаскирэн, и пхэндя́ лэ́нгэ: “Мэ пхуриём, загиём дрэ пхурэ́ бэрша́.

³ Тумэ́ дыкхнэ́ саро́, со кэрдя́ Рай Дэвэ́л, Дэвэ́л тумаро́, анги́л тумаро́ муй сарэ́нца адалэ́ манушэ́нца, пал-дова́ со Рай Дэвэ́л, Дэвэ́л тумаро́, Кокоро́ мардя́пэ пал тумэ́ндэ.

⁴ Ѓа́да, мэ роскэрдём (роздыём) тумэ́нгэ пир жре́биё адалэ́ манушэ́н, савэ́ ячнэ́пэ дрэ миштыпна́скири ме́ра тумарэ́ родыцэнгэ, сарэ́ мануша́, савэ́н мэ традыём криг, Иорданостыр кэ баро́ мо́рё (дэрья́в), пэ кхамэскиро загиибэ́н.

⁵ Рай Дэвэ́л, Дэвэ́л тумаро́, Кокоро́ традэ́ла криг лэн тумэ́ндыр, и замарэла лэн анги́л тумэ́ндэ, соб (кай) тумэ́ тэ дорэсэн (тэ долэн) дро мэкно́ миштыпэ́н (наследиё) лэ́нгири пхув, сыр ракирдя́ тумэ́нгэ Рай Дэвэ́л, тумаро́ Дэвэ́л.

⁶ Пир саро́ адя́кэ-паць старинэнпэ тэ ракхэ́н и кэрэ́н саро́, со чхиндло́ дрэ Мойза́скирэ-Законоскири лылвари́, на отгии лэ́стыр ни пэ чачо́ (право), ни пэ зэ́рво (ле́во).

⁷ На явэ́н кхэтанэ́ далэ́ манушэ́нца, савэ́ ячнэ́пэ машки́р тумэ́ндэ, на пририпирэн лэ́нгирэ дэвлорэнгиро лав, на совлахан лэ́нца, и на дынаринэ́н лэ́нгэ, и на мангэ́нпэ лэ́нгэ,

⁸ нэ приячэн кэ Рай Дэвэ́л, Дэвэ́л тумаро́, сыр тумэ́ кэрдэ́ кэ дава́ дывэ́с;

⁹ О Рай Дэвэ́л традыя́ криг тумэ́ндыр барэ́ и зоралэ́ манушэ́н, и анги́л тумэ́ндэ нико́н на вытэрдия кэ дава́ дывэ́с;

¹⁰ екх тумэ́ндыр протрадэла тысёнцо, пал-дова́ со Рай Дэвэ́л, тумаро́ Дэвэ́л, Кокоро́ марэлапэ пал тумэ́ндэ, сыр ракирдя́ тумэ́нгэ.

¹¹ Палдава́ кажно мо́ло причхувэ́н тэ рикирэ́н сыр Дро́гима Рас-Дэвлэ́с, Дэвлэ́с тумарэс.

¹² Ко́ли тумэ́ отрисёна и приячэна кэ мануша́, савэ́ ячнэ́пэ адалэ́ манушэ́ндыр, савэ́ ячнэ́пэ машкира́л тумэ́ндэ, и заджа́на дро сэмэнцыпэн лэ́нца, и явэ́на тэ псирэ́н кэ ёнэ и ёнэ кэ тумэ́,

¹³ то тэды джинэ́н, со тумаро́ Рай Дэвэ́л, Дэвэ́л, на явэ́ла буты́р тэ традэл тумэ́ндыр адалэ́ манушэ́н, нэ ёнэ явэ́на ваш тумэ́нгэ фэляса и сеткаса, чупняса ваш тумарэ́ пашварэ и пхусадытконэ хрустоса ваш тумарэ́ якха́, пака тумэ́ явэ́на протрадынэ долэ́ лачхэ́ пхувья́тыр, сави́ дыя́ тумэ́нгэ Рай Дэвэ́л, Дэвэ́л тумаро́.

¹⁴ Ѓа́да, мэ акана́ джа́ва сарэ́са дро дром сарэ́ пхувья́киро. А тумэ́ джинэ́н сарэ́ тумарэ́ илэ́са и сарэ́ тумарэ́ деса, со на яця́пэ ивья́ ни екх лав сарэ́ лачхэ́ лавэ́ндыр, савэ́ ракирдя́ пал тумэ́ндэ Рай Дэвэ́л, Дэвэ́л тумаро́; саро́ кэрдя́пэ чачипна́са ваш тумэ́нгэ, ни екх лав на яця́пэ, саво́ тэ на кэрэ́лпэ.

¹⁵ Нэ сыр кэрдя́пэ чачипна́са пэ тумэ́ндэ кажно (сва́ко) лачхо́ лав, саво́ ракирдя́ тумэ́нгэ Рай Дэвэ́л, Дэвэ́л тумаро́, адя́кэ Рай Дэвэ́л кэрэ́ла пэ тумэ́ндэ кажно (сва́ко) холямо́ лав, пака Ёв традэ́ла криг кэ хасибэ́н тумэн далэ́ лачхэ́ пхувья́тыр, сави́ дыя́ тумэ́нгэ Рай Дэвэ́л, Дэвэ́л тумаро́.

¹⁶ Ко́ли тумэ́ пириджана (кэрэ́на банг) Ра́скирэ-Дэвлэ́скиро, тумарэ́ Дэвлэ́скиро завето, саво́ Ёв чхудя́ тумэ́нца, и джа́на и явэ́на тэ дынаринэ́н явирэ дэвлорэ́нгэ и тэ мангэ́нпэ лэ́нгэ: тэды захачола пэ тумэ́ндэ Ра́скирэ-Дэвлэ́скири холы́, и сыг хасёна тумэ́ далэ́ лачхэ́ пхувья́тыр, сави́ дыя́ тумэ́нгэ Рай Дэвэ́л”.