Isúso 20 - Библия - Пэ Балтитко Романи чиб (Романэс) 2019

Знашыбнаскирэ Фо́рья

¹ И пхэндя́ Рай Дэвэ́л Исусо́скэ:

² “Пхэн Израилёскирэ чхавэ́нгэ: кэрэ́н пэ́стэ знашыбнаскирэ фо́рья, пал савэ́ Мэ ракирдём тумэ́нгэ пирда́л Мойзастэ,

³ соб (кай) могиндя́ тэ нашэ́л одори́к умарибнари, саво́ домардя́ манушэ́с, со дыяпэ дукха́, накамишы; мэк далэ́ фо́рья тэ явэ́н тумэ́ндэ зракхибнаса манушэ́стыр, саво́ отхала палэ пал рат,

⁴ И кон нашэла дрэ екх далэ́ форье́ндыр, мэк тэ тэрдёл пашы́л форо́скирэ вудара́ и тэ роспхэнэл дро саро́ шуныбэ́н далэ́ форо́скирэ пхурыдырэнгэ пэ́скиро рэ́ндо; и ёнэ лэс прилэ́на кэ пэ дро фо́ро, и дэ́на лэ́скэ штэ́то, соб (кай) ёв тэ дживэ́л лэ́ндэ;

⁵ и ке́ли традэлапэ пал лэ́стэ ману́ш, саво́ отхала палэ пал рат, тэды лэ́нгэ нашты́ тэ выдэн дрэ лэ́скирэ васта́ умарибнарис, пал-дова́ со ёв на камишы замардя́ пэ́скирэ пашатунэс, лэ́стэ на сыс кэ ёв накамибэн ни тася́, ни пэ три́то дывэ́с;

⁶ мэк ёв тэ дживэ́л дрэ дава́ фо́ро, пака явэ́ла анги́л манушэ́ндэ пэ сэ́ндо, пака на мэрэ́ла баро́ раша́й, саво́ явэ́ла дрэ долэ́ дывэса́. А коригэды́р (позже) мэк тэ рисёл умарибнари и тэ джал дрэ пэ́скиро фо́ро и дрэ пэ́скиро кхэр, дрэ фо́ро, савэ́стыр ёв настя́.

⁷ И выкэдынэ́ Кедесо дрэ Галиле́я пэ Нефалимоскири бэ́рга, Сихемо пэ Ефремо́скири бэ́рга, и Кири́аф-Арба, явирэ́с Хевро́но, пэ Юдаскири бэ́рга;

⁸ пал Иорда́но, проти Ерихо́но кэ васто́ко выкэдынэ́: Бецэро пэ чхучи́ пхув, пэ лошчы́на, Рувимо́скирэ родыцо́стыр, и Рамо́фо дро Галаа́до Гадо́скирэ родыцо́стыр, и Голано дро Васа́но Манасия́скирэ родыцо́стыр.

⁹ Далэ́ фо́рья сыс дынэ́ ваш сарэ́ Израилёскирэ чхавэ́нгэ и ваш манушэ́нгэ, савэ́ явнэ́ явирэ рига́тыр, савэ́ дживэ́на дрэ лэ́ндэ, соб (кай) тэ нашэ́л одори́к кажно (сва́ко), кон замардя́ манушэ́с пир дош, соб (кай) тэ на мэрэ́л ёв манушэ́скирэ вастэ́стыр, саво́ отхала палэ пал рат, пака явэ́ла анги́л манушэ́ндэ пэ сэ́ндо.