Isúso 19 - Библия - Пэ Балтитко Романи чиб (Романэс) 2019

Симеоноскиро Миштыпэ́н Кхэтанэ́ Юдаса

¹ Яви́р жре́биё выгия́ Симеоноскэ, Симеоноскирэ-чхавэ́нгирэ родыцо́скэ, пир лэ́нгирэ кхэри́тка ро́ды (пле́ми); и сыс лэ́нгири миштыпна́скири ме́ра машки́р Юда́скирэ-чхавэнгири миштыпна́скири ме́ра.

² Дрэ лэ́нгири миштыпна́скири ме́ра сыс: Вирса́вия ци Шэва, Молада,

³ Хацар-Шуало, Бала́ и Ацэмо,

⁴ Елтоладо, Вефуло и Хорма,

⁵ Цыклаго, Беф-Маркавофо и Хацар-Суса,

⁶ Беф-Леваофо и Шарухено: трия́нда фо́рья лэ́нгирэ гавэнца.

⁷ Аино, Римоно, Еферо и Ашано: штар фо́рья лэ́нгирэ гавэнца,

⁸ и сарэ́ гава́, савэ́ сыс пашы́л далэ́ фо́рья аж кэ Ваалаф-Беера, ци кэ паш-дывэсы́тко (южно) Ра́ма. Ѓа́да, сыс Симеоноскирэ-чхавэ́нгирэ родыцоскири миштыпна́скири ме́ра, пир лэ́нгирэ кхэри́тка ро́ды (пле́ми).

⁹ Юда́скирэ-чхавэ́нгирэ роздыибнастыр (участкостыр) дыны́ сыс ме́ра Симеоноскирэ-чхавэ́нгирэ родыцо́скэ. Адя́кэ сыр Юда́скирэ-чхавэ́нгиро роздыибэн (участко) сыс древа́н баро́ ваш лэ́нгэ, то Симеоноскирэ чхавэ́ и дорэснэ́ миштыпна́скири ме́ра машки́р лэ́нгири миштыпна́скири ме́ра.

¹⁰ Три́то жре́биё выпыя Завулоноскирэ чхавэ́нгэ пир лэ́нгирэ кхэри́тка ро́ды, и тырдыяпэ лэ́нгирэ-миштыпнаскирэ меракири риг кэ Саридо;

¹¹ И лэ́нгири исын межакири риг лэ́нгири джа́ла кэ мо́рё (дэрья́в) и кэ Марало и кхэтанякирэлапэ Дабешэфоса, и кхэтанакирэлапэ сыгнонэ рэкицаса, сави́ исын анги́л Иокнеамомо.

¹² Саридатыр джа́ла ме́жа палэ кэ васточно риг, кэ кхамэскиро ўзгиибэн, кэ Кислоф-Фавороскири ме́жа; адатхы́р джа́ла кэ Даврафо и ґаздэ́лапэ кэ Иафиё;

¹³ адатхы́р проджа́ла кэ васто́ко дро Геф-Хеферо, дрэ Ита-Кацыно, и джа́ла кэ Римоно, Мифоаро и Нея;

¹⁴ и рискирэ́ла межакири риг паш-ратятыр (северостыр), кэ Ханафоно и ла́киро яго́ро пэ до́ло Ифтах-Эла.

¹⁵ Дурэды́р: Катафо, Нагалало, Шымроно, Идеало и Вифлее́мо: дэшуду́й фо́рья лэ́нгирэ гавэнца.

¹⁶ Ѓа́да, исын Завулоноскирэ-чхавэ́нгиро мэкно́ миштыпэ́н, пир лэ́нгирэ кхэри́тка ро́ды (пле́ми); ґа́да, исын фо́рья и лэ́нгирэ гава́.

¹⁷ Шта́рто жре́биё выгия́ Исахароскэ, чхавэ́нгэ Исахароскирэнгэ, пир лэ́нгирэ кхэри́тка ро́ды (пле́ми);

¹⁸ межакирэ ригаса лэнгирьяса сыс: Изреелё, Кесулофо и Сунемо,

¹⁹ Хафараимо, Шыоно и Анахарафо,

²⁰ Равифо, Кишыоно и Авецо,

²¹ Ремефо, Ен-Ганимо, Эн-Хада и Беф-Пацецо;

²² и кхэтанякирэлапэ риг Фавороса и Шагацымоса и Вефсамисоса, и лэ́нгирэ ригакиро яго́ро пашы́л Иорда́но: дэшушов фо́рья лэ́нгирэ гавэнца.

²³ Ѓа́да, исын Исахароскирэ чхавэ́нгиро родыцоскиро мэкно́ миштыпэ́н, пир лэ́нгирэ кхэри́тка ро́ды; ґа́да, исын фо́рья и лэ́нгирэ гава́.

²⁴ Па́нджто жре́биё выгия́ Асироскирэ чхавэ́нгирэ родыцо́скэ, пир лэ́нгирэ кхэри́тка ро́ды;

²⁵ межаса лэнгирьяса сыс: Хелкафо, Хали, Ветено и Ахсафо,

²⁶ Аламелехо, Амадо и Мишало. И кхэтанякирэлапэ межакири риг Кармилоса палатунэ́ рига́тыр и Шихоро-Ливнафоса;

²⁷ тэ́ньчи (потом) джа́ла палэ кэ кхамэскиро ўзгиибэн дрэ Веф-Дагоно, и кхэтанякирэлапэ Завулоноса и долоса Ифтах-Эласа паш-дывэсэ́стыр, дро Беф-Емеко и Неиело, и джа́ла пашы́л Кавуло, зэрвонэ (левонэ) рига́тыр;

²⁸ дурыдыр: Евроно, Рехово, Хамоно и Кана́, кэ Сидоно баро́;

²⁹ тэ́ньчи (потом) ме́жа рисёла кэ Ра́ма кэ Ти́ро фо́ро зоралэ́ тыноса, и рискирэ́ла межакири риг кэ Хоса, и яго́ро ла́киро пашы́л мо́рё (дэрья́в) дро штэ́то Ахзива.

³⁰ Дурэды́р: Ума, Афеко и Рехово: биш тэ дуй фо́рья лэ́нгирэ гавэнца.

³¹ Ѓа́да, исын Асироскирэ-чхавэ́нгиро родыцоскиро мэкно́ миштыпэ́н, пир лэ́нгирэ кхэри́тка ро́ды (пле́ми); ґа́да, сыс фо́рья и лэ́нгирэ гава́.

³² Шо́вто жре́биё выгия́ Нефалимоскирэ чхавэ́нгэ, Нефалимоскирэ чхавэ́нгэ пир лэ́нгирэ кхэри́тка ро́ды;

³³ межакири риг лэ́нгири гия́ Хелефостыр и дубравэндыр, со сыс дрэ Цананима, кэ Адами-Некево и кэ Иавнеило, кэ Лакумо, и ла́киро яго́ро (краё) сыс пашы́л Иорда́но;

³⁴ адатхы́р рисёла ме́жа пэ западо кэ Азноф-Фаворо и джа́ла одотхы́р кэ Хукоко, и кхэтанякирэлапэ Завулоноса паш-дывэсэ́стыр (югостыр), и Асироса кхэтанякирэлапэ западостыр, и Юдаса пашы́л Иорда́но, кхамэскирэ ўзгиибнастыр.

³⁵ Фо́рья зоралэ́ тынэ́нца исын: Цыдимо, Цэро, Хамафо, Ракафо и Хинерефо,

³⁶ Адамо, Ра́ма и Асоро,

³⁷ Кедесо, Едрея и Эн-Гацоро,

³⁸ Иреоно, Мигдал-Ело, Хоремо, Беф-Анафо и Вефсамисо: дэшуеня фо́рья лэ́нгирэ гавэнца.

³⁹ Ѓа́да, сыс Нефалимоскирэ-чхавэ́нгирэ родыцоскири ме́ра дро мэкно́ миштыпэ́н пир лэ́нгирэ кхэри́тка ро́ды (пле́ми); ґа́да, сыс фо́рья и гава́ лэ́нгирэ.

Даноскири Пхув

⁴⁰ Дано́скирэ чхавэ́нгирэ родыцо́скэ, пир лэ́нгирэ кхэри́тка ро́ды, выгия́ эфта́то жре́биё;

⁴¹ лэ́нгирэ миштыпнаскирэ меракирэ ригаса сыс: Цора, Ештаоло и Ир-Шэмешо,

⁴² Шаалавино, Аиалоно и Иола,

⁴³ Елоно, Фимнафа и Екроно,

⁴⁴ Елтеке, Гиввефоно и Ваалафо,

⁴⁵ Игудо, Бене-Верако и Гаф-Римоно,

⁴⁶ Ме-Иарконо и Раконо межаса на́дур Иопиятыр. И выгия́ Дано́скирэ чхавэнгири риг тыкны ваш лэ́нгэ.

⁴⁷ И Дано́скирэ чхавэ́ гинэ́ марибна́са пэ Ласемо, и лынэ́ лэс, и домардэ́ лэс куртала́са, и дорэснэ́ лэс дро миштыпэ́н пэ́скэ, и лынэ́ тэ дживэ́н дрэ лэ́стэ, и кхардэ́ Ласемо Даноса пир пэ́скирэ дадэ́скиро лав Дано.

⁴⁸ Ѓа́да, исын Дано́скирэ чхавэ́нгирэ родыцоскирэ миштыпна́скири ме́ра, пир лэ́нгирэ кхэри́тка ро́ды; ґа́да, фо́рья и гава́ лэ́нгирэ.

⁴⁹ Ке́ли мэкнэ́ ёнэ пхув тэ роздэн, пир ла́кирэ ме́жы, тэды Израилёскирэ чхавэ́ дынэ́ машки́р пэ́стэ миштыпна́скири ме́ра Исусо́скэ, Навиноскирэ чхавэ́скэ:

⁵⁰ пир Ра́скиро-Дэвлэ́скиро упхэныбэ́н дынэ́ ёнэ лэ́скэ фо́ро Фамнаф-Сараи, саво́ ёв мангдя́, пэ бэ́рга Ефремо́скири; и кэрдя́ ёв фо́ро и дживдя́ дрэ лэ́стэ.

⁵¹ Ѓа́да, сыс миштыпнаскирэ меры, савэ́ раша́й о Елиза́ро, Ису́со, Навиноскиро чхаво́, и барыдыра́ пэ стрэ́чы роздынэ Израилёскирэ-чхавэ́нгирэ родыцэнгэ, пир жре́биё, дрэ Сило́мо, анги́л Ра́скирэ-Дэвлэ́скиро муй, пашы́л скэдыибнаскирэ скиниякиро загиибэ́н. И мэкнэ́ тэ роздэн (тэ роскэрэн) пхув.