Isúso 18 - Библия - Пэ Балтитко Романи чиб (Романэс) 2019

Пхувья́киро Роскэрибэн, Сави́ Ячяпэ

¹ Саро́ Израилёскирэ чхавэ́нгиро скэдыибэ́н скэдыяпэ дро Сило́мо, и чхудэ́ одо́й скэдыибна́скири ша́тра (ски́ния), пал-дова́ со пхув сыс залыны лэ́нца.

² Израилёскирэ чхавэ́ндыр яця́пэ эфта́ ро́дыцы (чанга́), савэ́ на дорэснэ́ (на долынэ) пэ́скири миштыпна́скири ме́ра.

³ И пхэндя́ Ису́со Израилёскирэ чхавэ́нгэ: “Ци ґара́ (длу́гэс) тумэ́ явэ́на тэ кунинэнпэ (тэ на радинэн) пал дова́, соб (кай) тэ джас и тэ лэс дрэ мэкно́ миштыпэ́н (наследиё) пхув, сави́ дыя́ тумэ́нгэ Рай Дэвэ́л, Дэвэ́л, тумарэ́-дадэ́нгиро?

⁴ Дэн пэ́стыр пир трин мануша́ родыцо́стыр, мэ бичхава́ва лэн, и ёнэ, уштыи, проджа́на пир пхув и обчхинэна ла, сыр трэй тэ роздэс лэ́нгэ пэ миштыпна́скири ме́ра, и явэ́на кэ мэ;

⁵ мэк тэ роздэн ла пэ эфта́ миштыпнаскирэ меры (паша́); Юда мэк тэ ячэ́лпэ пэ пэ́скири риг пэ паш-дывэ́с (юго), а Иосифоскиро кхэр мэк тэ ячэ́лпэ пэ пэ́скири риг пэ паш-рат (северно);

⁶ а тумэ́ росчхинэн пхув пэ эфта́ миштыпнаскирэ меры (паша́) и янэ́н ма́нгэ адари́к: мэ чхурдава тумэ́нгэ жре́биё ада́й анги́л Ра́скирэ-Дэвлэ́скиро, тумарэ́ Дэвлэ́скиро муй;

⁷ а Левитэ́нгэ нанэ паш машки́р тумэ́ндэ, пал-дова́ со свэнтыма Ра́скирэ-Дэвлэ́скири исын лэ́нгири миштыпна́скири ме́ра; Гадо, Рувимо и паш Манасия́скирэ родыцо́стыр дорэснэ́ (долынэ) пэ́скири миштыпна́скири ме́ра пал Иорда́но кэ васто́ко, сави́ дыя́ лэ́нгэ Мо́йза, Ра́скиро-Дэвлэ́скиро писха́ри.

⁸ Адалэ́ мануша́ уштынэ́ и гинэ́. Ису́со дыя́ манушэ́нгэ, савэ́ гинэ́ тэ росчхинэн пхув дасаво упхэныбэ́н: “Джа́н, обджан пхув, обчхинэн ла и рисён кэ мэ; а мэ ада́й чхурдава тумэ́нгэ жре́биё анги́л Ра́скирэ-Дэвлэ́скиро муй, дро Сило́мо”.

⁹ Ёнэ гинэ́, прогинэ́ пир пхув и обчхиндлэ́ ла, пир ла́кирэ фо́рья, пэ эфта́-миштыпнаскирэ меры (паша́), дрэ лылвари́, и явнэ́ кэ Ису́со дро ста́но, дро Сило́мо.

¹⁰ Ису́со чхурдыя́ лэ́нгэ жре́биё дро Сило́мо анги́л Растэ-Дэвлэ́стэ, и роздыя одо́й Ису́со пхув Израилёскирэ чхавэ́нгэ пир лэ́нгирэ участки (роздыибэна).

¹¹ Пэ́рво жре́биё выгия́ Вениамино́скирэ-чхавэ́нгирэ родыцо́скэ, пир лэ́нгирэ кхэри́тка ро́ды (пле́ми). Риг межакири лэ́нгири пир жре́биё гия́ машки́р Юда́скирэ чхавэ́ндэ и машки́р Иосифо́скирэ чхавэ́ндэ;

¹² ме́жа лэ́нгири пэ паш-рати́тко риг лэ́лапэ пашы́л Иорда́но, и проджа́ла дая́ ме́жа пашы́л Ерихо́но паш-дывэсэ́стыр (северостыр), и джа́ла упрэ́ пэ бэ́рга кэ западо, и ла́киро яго́ро исын пэ чхучи́ пхув Бефывено.

¹³ Одотхы́р межакири риг джа́ла кэ Луза, кэ паш-дывэсы́тко (южно) Лузакири риг, явирэ́с Вефи́лё, и на джа́ла тэлэ́ риг кэ Атароф-Адаро, кэ бэ́рга, сави́ исын пэ паш-дывэсы́тко (югоскири) риг Беф-Ороноскири тэлатуны;

¹⁴ тэ́ньчи (потом) ме́жа рискирэ́ла и змэкэлапэ кэ морёскири риг пэ паш-дывэ́с (юго) бэрга́тыр, сави́ исын пэ паш-дывэ́с анги́л Беф-Ороно, и ла́киро яго́ро исын пашы́л Кири́аф-Ваало, явирэ́с кхарлапэ Кири́аф-Иаримо, Юда́скирэ чхавэ́нгирэ фо́рья. Дая́ исын за́падно риг.

¹⁵ Паш-дывэсытконэ́ ригаса Кири́аф-Иаримостыр джа́ла ме́жа кэ мо́рё (дэрья́в) и доджа́ла кэ штэ́то, каты́р джа́ла пани́ Нефтоахостыр;

¹⁶ тэ́ньчи (потом) ме́жа джа́ла тэлэ́ кэ бэрга́киро яго́ро, саво́ исын анги́л Еномоскирэ чхавэ́скиро до́ло, пэ Рефаимоскиро до́ло, кэ паш-рат (северо), и джа́ла тэлэ́ Еномаскирэ долоса кэ паш-дывэсы́тко Евусоскири риг, и джа́ла кэ Эн-Рогело;

¹⁷ Тэ́ньци (потом) рискирэ́ла паш-ратятыр и джа́ла кэ Эн-Шемешо, и джа́ла кэ Гелилофо, саво́ исын проти Адумимоскиро вучипэ́н, и джа́ла тэлэ́ кэ Боганоскиро бар, Рувимо́скирэ чхавэ́скиро;

¹⁸ тэ́ньчи (потом) джа́ла на́дур лошчынатыр (Аравиятыр) кэ паш-дывэ́с и джа́ла тэлэ́ пэ лошчы́на (Аравия);

¹⁹ адатхы́р джа́ла межакири риг пашы́л Беф-Хогла пэ паш-рат, и ригакиро яго́ро паш дрэ паш-рати́тко (северно) Лондэ морёскиро (дэрьявэ́скиро), пашы́л паш-дывэсы́тко (южно) яго́ро Иорданоскиро. Ѓа́да, исын паш-дывэсы́тко ме́жа. Рига́тыр васточнонатыр межаса сыс Иорда́но.

²⁰ Ѓа́да, сыс Вениамино́скирэ чхавэнгири-миштыпна́скири ме́ра, лэ́скирэ меженца сарэ́ ригэ́ндыр, пир лэ́нгирэ кхэри́тка ро́ды (пле́ми).

²¹ Фо́рья, со сыс Вениамино́скирэ чхавэ́ндэ лэ́нгирэ родыцо́скэ, пир лэ́нгирэ кхэри́тка ро́ды (пле́ми): Ерихо́но, Беф-Хогла и Емек-Кецицо,

²² Беф-Арава, Цэмараимо и Вефи́лё,

²³ Авимо, Фара и Офра,

²⁴ Кефар-Амонаё, Афни и Гева: дэшуду́й фо́рья лэ́нгирэ гавэнца.

²⁵ Гавао́но, Ра́ма и Берофо,

²⁶ Мицфэ, Кефира и Моца,

²⁷ Рекемо, Ирфеилё и Фарала,

²⁸ Цэ́ла, Элефо и Евусо, явирэ́с кхарлапэ Ерусалимо, Гивеафо и Кириафо: дэшуштар фо́рья лэ́нгирэ гавэнца. Ѓа́да, сыс Вениамино́скирэ-чхавэнгири миштыпна́скири ме́ра, пир лэ́нгирэ кхэри́тка ро́ды (пле́ми).