Isúso 17 - Библия - Пэ Балтитко Романи чиб (Романэс) 2019

Яви́р Ро́дыцо Манасия́скиро

¹ И выпыя жре́биё Манасия́скирэ родыцо́скэ, адя́кэ сыр ёв сыс Иосифоскиро англатуно́ чхаво́. Махироскэ, Манасия́скирэ англатунэ́ чхавэ́скэ, Галаадо́скирэ дадэ́скэ, саво́ сыс муршари пэ марибэ́н, яця́пэ Галаа́до и Васа́но.

² Яця́пэ миштыпна́скири ме́ра и явирэ́нгэ Манасия́скирэ чхавэ́нгэ, пир лэ́нгирэ кхэри́тка ро́ды, и Авиезэроскирэ чхавэ́нгэ, и Хелекоскирэ чхавэ́нгэ, и Асриилоскирэ чхавэ́нгэ, и Хефераскирэ чхавэ́нгэ, и Шемидаскирэ чхавэ́нгэ. Ѓа́да, сыс чхавэ́ Манасия́скирэ, Иосифо́скирэ-чхавэ́скирэ мурша́, пир лэ́нгирэ кхэри́тка ро́ды (пле́ми).

³ Салпаадостэ, Хефероскирэ чхавэ́стэ, Галаадо́скирэ чхавэ́стэ, Махироскирэ чхавэ́стэ, Манасия́скирэ чхавэ́стэ, на сыс чхавэ́н, а сыс екх чхая́. Ѓа́да, исын лэ́нгирэ чхаенгирэ лава́: Махла, Ноа, Хогла, Милка и Фирца.

⁴ Ёнэ явнэ́ кэ раша́й Елиза́ро и кэ Ису́со, Навиноскиро чхаво́, и кэ барыдыра́, и пхэндлэ́: “Рай Дэвэ́л пхэндя́ Мойза́скэ тэ дэл амэ́нгэ миштыпна́скири ме́ра машки́р амарэ́ пшалэ́ндэ”. И дынэ́ лэ́нгэ миштыпна́скири ме́ра, пир Ра́скирэ-Дэвлэ́скиро упхэныбэ́н, машки́р лэ́нгирэ дадэ́скирэ пшалэ́ндэ.

⁵ И выгия́ Манасияскэ дэш роздыибэна (участки), апри́ч Галаадо́скирэ и Васаноскири пхув, сави́ сыс пал Иорда́но;

⁶ пал-дова́ со Манасия́скирэ чхая́ дорэснэ́ (долынэ) миштыпна́скири ме́ра машкира́л лэ́скирэ чхавэ́ндэ, а Галаадоскири пхув яця́пэ явирэ Манасия́скирэ чхавэ́нгэ.

⁷ Межакири риг Манасияскири джа́ла Асиростыр кэ Михмефафо, саво́ исын проти Сихема; адатхы́р джа́ла ме́жа пэ чачи́ (право) риг кэ Эн-Тапуахоскирэ мануша́.

⁸ Пхув Тапуахо яця́пэ Манасияскэ, а фо́ро Тапуахоскиро пашы́л межакири риг яця́пэ Манасиияскирэ-Ефремо́скирэ чхавэ́нгэ.

⁹ Адатхы́р межакири риг джа́ла тэлэ́ кэ сы́гно рэ́кица (лэнори́) Кано, паш-дывэсытконэ́ (южнонэ) панескирэ рига́тыр. Фо́рья далэ́ исын Ефремо́скирэ, усае́кх со ёнэ исын тэрдэ́ машки́р Манасия́скирэ фо́рья. Ме́жа Манасияскири – пэ севернонэ рэкицакири (лэньрьякири) риг, и кончынэлапэ дро мо́рё (дэрья́в).

¹⁰ Дова́, со исын кэ паш-дывэ́с, дова́ исын Ефремоскиро, а со исын кэ паш-рат, дова́ исын Манасия́скиро; мо́рё (дэрья́в) сыс лэ́нгирэ межаса; кэ Асиро ёнэ приячэна паш-дывэсытконэ́ рига́тыр, и кэ Исахаро васточнонэ рига́тыр.

¹¹ Исахаростэ и Асиростэ исын и Манасияскэ Беф-Сан и штэ́ты, савэ́ исын тэл лэ́скири зор, Ивлеамо и лэ́скирэ штэ́ты, и мануша́ Доракирэ и штэ́ты, савэ́ сыс тэл лэ́скири зор, мануша́ Эн-Доракирэ и штэ́ты, савэ́ сыс тэл лэ́скири зор, мануша́ Фаанахоскирэ и штэ́ты, савэ́ сыс тэл лэ́скири зор, мануша́ Мегидоноскирэ и штэ́ты, савэ́ сыс тэл лэ́скири зор, и три́то округакирэ паша́ Нафефоскиро.

¹² Манасия́скирэ чхавэ́ на могиндлэ́ тэ вытрадэн далэ́-форьенгирэ манушэ́н, и Хананеи ячнэ́пэ тэ дживэ́н пэ дая́ пхув.

¹³ Ке́ли Израилёскирэ чхавэ́ явнэ́ дрэ зор, тэды ёнэ кэрдэ́ Хананеен андынаршчыкэнца (даникэнца), нэ тэ вытрадэн лэн на вытрадынэ́.

¹⁴ Иосифо́скирэ (Ёза́скирэ) чхавэ́ ракирдэ́ Исусо́скэ и пхэндлэ́: “Со́скэ ту дыя́н ма́нгэ дрэ миштыпна́скири ме́ра екх жре́биё и екх участко, тэды сыр амэн бут мануша́, пал-дова́ со адя́кэ бахтякирдя́ ман Рай Дэвэ́л?

¹⁵ Ису́со пхэндя́ лэ́нгэ: “Ко́ли ту́тэ исын бут мануша́, тэды джа́ дро вэш и одо́й, пэ пхув Ферезеенгири и Рефаимэнгири, роскэр пэ́скэ штэ́то, ко́ли Ефремо́скири бэ́рга ваш ту́кэ исын тясно (танго).

¹⁶ Иосифо́скирэ чхавэ́ пхэндлэ́: “На ячэ́лапэ пал амэ́ндэ бэ́рга, пал-дова́ со саструнэ́ марибны́тка вурдына́ сарэ́ Хананеендэ, савэ́ дживэ́на пэ до́ло, сыр одолэ́ндэ, савэ́ исын дрэ Беф-Сана и дрэ штэ́ты, савэ́ исын тэл лэ́скири зор, адя́кэ и одолэ́ндэ, савэ́ исын пэ Израилёскиро до́ло.”

¹⁷ Нэ Ису́со пхэндя́ Иосифо́скирэ, Ефремо́скирэ и Манасия́скирэ кхэрэ́скэ: “Ту́тэ исын бут мануша́ и зор ту́тэ исын бари; на екх жре́биё явэ́ла ту́тэ:

¹⁸ и бэ́рга явэ́ла тыри́, и дава́ вэш, ту роскэрэса чашча и ёй явэ́ла кэ кокоро́ ла́киро яго́ро; пал-дова́ со ту вытрадэса Хананеен, мэк и исын лэ́ндэ марибны́тка вурдына́ саструнэ́, и мэк исын ёнэ зоралэ́.”