Isúso 16 - Библия - Пэ Балтитко Романи чиб (Романэс) 2019

Ефре́мо и Мана́сия

¹ Тэ́ньци (потом) выпыя жре́биё Иосифо́скирэ (Ёза́скирэ) чхавэ́нгэ: Иорданостыр пашы́л Ерихо́но, пашы́л Ерихоноскиро пани́ пэ васто́ко, кэ чхучи́ пхув, сави́ тырдэлапэ Ерихоностыр кэ Вефилёскири бэ́рга;

² Вефилёстыр джа́ла межакири риг кэ Луза, и пириджала кэ Архакири ме́жа кэ Атарофо,

³ и змэкэлапэ кэ мо́рё (дэрья́в), кэ Иафлетоскири риг, пэ Тэлатуны риг Беф-Ороноскири и кэ Газеро, и яго́ро исын пашы́л мо́рё (дэрья́в).

⁴ Дава́ дорэснэ́ (долынэ) дрэ миштыпна́скири ме́ра Иосифо́скирэ (Ёза́скирэ) чхавэ́: Мана́сия и Ефре́мо.

⁵ Риг пир ме́жа Ефремо́скирэ чхавэ́нгиро пир лэ́нгирэ кхэри́тка ро́ды сыс дасави́: вастоко́стыр лэ́нгирэ миштыпнаскирэ меракирэ ригаса сыс Атарофо-Адаро кэ Беф-Ороно упратуно;

⁶ Тэ́ньци (потом) джа́ла межакири риг кэ мо́рё (дэрья́в) севернонэ Михмефафоскирэ ригаса и рискирэ́ла кэ васточно риг пэ Фаанаф-Сило́мо, и обджала лэс васточнонэ Ианохоскирэ рига́тыр;

⁷ Ианохостыр, ме́жа джа́ла тэлэ́ кэ Атарофо и Наарафо, приячэла кэ Ерихо́но и доджа́ла кэ Иорда́но.

⁸ Тапуахостыр джа́ла межакири риг кэ мо́рё (дэрья́в), кэ сы́гно рэ́кица (лэнори́) Кана́, и ла́киро яго́ро заджа́ла дрэ мо́рё (дэрья́в). Ѓа́да, исын миштыпна́скири ме́ра Ефремо́скирэ чхавэ́нгирэ пир ро́дыцы, пир кхэри́тка ро́ды (пле́ми).

⁹ И фо́рья отгинэ́ Ефремо́скирэ чхавэ́нгэ дрэ Манасия́скирэ-чхавэнгири миштыпна́скири ме́ра, сарэ́ фо́рья лэ́нгирэ гавэнца.

¹⁰ Нэ Ефремляни на вытрадынэ́ Хананеен, савэ́ дживдэ́ кэ Газеро; палдава́ Хананеи дживдэ́ машкира́л Ефремлянэндэ кэ дава́-паць дывэ́с, плэскири лэ́нгэ дань.