Isúso 15 - Библия - Пэ Балтитко Романи чиб (Романэс) 2019

Юдаскири Пхув

¹ И сыс жре́биё Юда́скирэ чхавэ́нгирэ родо́скэ, пир лэ́нгирэ кхэри́тка ро́ды, выпыя дасаво: пэ ме́жа Идумеяса сыс чхучи́ пхув Син, кэ паш-дывэ́с (юго), пашы́л Феманоскиро яго́ро (краё);

² паш-дывэсытконэ́ лэ́нгирэ ригаса пир ме́жа сыс Лондэскирэ-морёскиро (дэрьявэ́скиро) яго́ро (краё), саво́ тырдэлапэ кэ паш-дывэ́с заливостыр;

³ пэ паш-дывэ́с ёв джа́ла кэ вучипэ́н Акравимоскиро, джа́ла пашы́л Цино, и, джа́ла упрэ́ паш-дывэсытконэ́ рига́тыр кэ Кадес-Варни, джа́ла пашы́л Хецроно, и, джа́ла упрэ́ кэ Адаро, порискирэла кэ Каркая,

⁴ Пало́ дава́ ёв проджа́ла Ацмоно, джа́ла пашылэды́р кэ Египто́скири рэ́кица (лэнори́) адя́кэ, со яго́ро далэ́ ригакиро исын мо́рё (дэрья́в). Дава́ явэ́ла паш-дывэсы́тко тумари́ риг.

⁵ Ригаса пир ме́жа кэ васто́ко сыс Лондо мо́рё (дэрья́в), кэ яго́ро Иорданоскиро; а риг паш-ратитконэ́ севернонэ рига́тыр лэ́лапэ морёскирэ (дэрьявэ́скирэ) заливостыр, Иорданоскирэ ягоро́стыр;

⁶ адатхы́р риг джа́ла упрэ́ кэ Беф-Хогла и проджа́ла паш-ратитконэ́ рига́тыр кэ Беф-Арава, и джа́ла риг упрэ́ кэ Боганоскиро бар, Рувимо́скирэ чхавэ́скиро;

⁷ Тэ́ньци (потом) джа́ла упрэ́ риг кэ Давиро долостыр Ахоро, и пэ паш-рат (северо) рискирэ́ла кэ Галга́ло, саво́ исын проти Адумимоскиро вучипэ́н, саво́ исын пашто́ паш-дывэсытконэ́ рэкицакирэ рига́тыр; адатхы́р риг проджа́ла кэ Ен-Шэмешоскирэ паня́ и кончынэлапэ пашы́л Ен-Рогело.

⁸ Адатхы́р риг пир ме́жа джа́ла упрэ́ кэ Еномоскирэ-чхавэ́скиро до́ло паш-дывэсытконэ́ Евусоскирэ рига́тыр, саво́ исын Ерусалимо, и ґаздэ́лапэ риг пэ бэрга́киро вучипэ́н, саво́ исын кэ западо проти Рефаимоскиро до́ло кэ паш-рат;

⁹ бэргакирэ вучипна́стыр межакири риг рискирэ́ла кэ Нефтоахоскири панескири ґанынгори (источнико) и джа́ла кэ фо́рья Ефроноскирэ бэргакирэ, и рискирэ́ла межакири риг кэ Ваало, саво́ исын Кири́аф-Яримо;

¹⁰ Тэ́ньци (потом) рискирэ́ла ме́жа Ваалатыр кэ мо́рё (дэрья́в), кэ бэ́рга Сеиро, и джа́ла паш-ратитконэ́ бэргакирэ Иеаримоскирэ ригаса, сави́ исын Кесалоно, и доджа́ла тэлэ́ кэ Вефсамисо, и проджа́ла пирда́л Фимна.

¹¹ Адатхы́р межакири риг джа́ла паш-ратитконэ́ (севернонэ) Екроноскирэ ригаса, и рискирэ́ла риг кэ Шикароно, проджа́ла пирда́л бэ́рга Ваало и доджа́ла кэ Иавнеило, и яго́ро межакиро доджа́ла кэ са́мо мо́рё (дэрья́в). Западнонэ-межакири риг исын пир брэ́го барэ́ морёстыр (дэрьявэстыр).

¹² Ѓа́да, исын межакири риг Юда́скирэ-чхавэ́нгиро пир лэ́нгирэ кхэри́тка ро́ды (пле́ми) сарэ́ ригэ́ндыр.

О Халево Залэла Хевро́но и Давиро

¹³ И Халевоскэ, Ефониёскирэ чхавэ́скэ, Ису́со дыя́ паш машки́р Юда́скирэ чхавэ́ндэ, сыр припхэндя́ Рай Дэвэ́л Исусо́скэ: Кири́аф-Арба, Енакоскирэ дадэ́скиро, явирэ́с дава́ штэ́то кхарэ́лапэ Хевро́но.

¹⁴ И вытрадыя́ одотхы́р Халево тринэн Енакоскирэ чхавэ́н: Шешаёс, Ахиманос и Фалмаёс, Енакоскирэ чхавэ́н.

¹⁵ Адатхы́р гия́ ёв проти Давироскирэ манушэ́ндэ (лав Давироскиро англэды́р сыс Кири́аф-Сеферо).

¹⁶ И пхэндя́ Халево: “Кон джа́ла марибна́са пэ Кири́аф-Сеферо и лэ́ла лэс, одолэ́скэ отда́ва Ахса, чха мирья, палоро́м”.

¹⁷ И лыя́ лэс Гофониило, Кеназоскиро чхаво́, Халевоскирэ-пшалэскиро, и отдыя́ ёв лэ́скэ Ахса, пэскирья́ чха, дрэ ромня́ (ромня́тэ).

¹⁸ Ке́ли явдя́ часо ла́кэ тэ джал, ла высыклякирдэ тэ мангэ́л ла́кирэ дадэ́стыр фэ́лда, и ёй згия ослостыр. Халево пхэндя́ ла́кэ: “Со ту́кэ?”

¹⁹ Ёй пхэндя́: “Дэ ма́нгэ бахтякирибэ́н; ту дыя́н ма́нгэ пхув паш-дывэсы́тко (полудёно), дэ ма́нгэ ґанынгорья (источники) панескирэ”. И дыя́ ёв ла́кэ ґанынгорья упратунэ и ґанынгорья тэлатунэ́.

Юда́скирэ Фо́рья

²⁰ Ѓа́да, исын миштыпна́скири ме́ра Юда́скирэ чхавэ́нгирэ родыцоскирэ, пир кхэри́тка ро́ды (пле́ми) лэ́нгирэ:

²¹ фо́рья пэ яго́ро (краё) Юда́скирэ чхавэ́нгирэ родыцо́стыр сыс кхэтанэ́ Идумеёса пэ паш-дывэсы́тко (таты) риг: Кавцэило, Едеро и Иагуро,

²² Кина, Димона, Адада,

²³ Кедесо, Асоро и Ифнано,

²⁴ Зифо, Телемо и Валофо,

²⁵ Гацор-Хадафа, Кириафо, Хецроно, явирэ́с кхарэ́лапэ Гацоро,

²⁶ Амамо, Шэма и Молада,

²⁷ Хацар-Гада, Хешмоно и Веф-Палето,

²⁸ Хацар-Шуало, Вирса́вия и Визиофея,

²⁹ Ваало, Иимо и Ацэмо,

³⁰ Елфоладо, Кесило и Хорма,

³¹ Цыклаго, Мадмано и Сансана,

³² Леваофо, Шэлихимо, Аино и Римоно: сарэ́ биш тэ еня́ фо́рья лэ́нгирэ гавэнца.

³³ Пэ тэлатунэ́ штэ́ты: Ештаоло, Цора и Ашна,

³⁴ Заноахо, Ен-Ганимо, Тапуахо и Гаенамо,

³⁵ Иарамуфо, Одоламо, Сохо и Азека,

³⁶ Шаараимо, Адифаимо, Гедера ци Гедерофаимо: дэшуштар фо́рья лэ́нгирэ гавэнца.

³⁷ Цэнано, Хадаша, Мигдал-Гадо,

³⁸ Дилеано, Мицфэ и Иокфеило,

³⁹ Лахисо, Воцкафо и Еглоно,

⁴⁰ Хабоно, Лахмасо и Хифлисо,

⁴¹ Гедерофо, Беф-Дагоно, Наема и Македо: дэшушов фо́рья лэ́нгирэ гавэнца.

⁴² Ливна, Еферо и Ашано,

⁴³ Ифофахо, Ашна и Нецыво,

⁴⁴ Кеила, Ахзиво и Мареша: еня́ фо́рья лэ́нгирэ гавэнца.

⁴⁵ Екроно лэ́скирэ форьенца и гавэнца, савэ́ сыс тэл лэ́скири зор.

⁴⁶ И Екроностыр саро́ кэ мо́рё (дэрья́в), со исын пашы́л Азото, лэ́нгирэ гавэнца,

⁴⁷ Азото, лэ́скирэ фо́рья и гава́, савэ́ сыс тэл лэ́скири зор, Газа ла́кирэ фо́рья и гава́, савэ́ сыс тэл ла́кири зор, кэ кокори Египто́скири сы́гно рэ́кица (лэнори́) и баро́ мо́рё (дэрья́в), савэскиро брэ́го исын межакири риг.

⁴⁸ Пэ бэ́рги сыс: Шамиро, Иатиро и Сохо,

⁴⁹ Дана, Кириафо-Сана, явирэ́с Давиро,

⁵⁰ Анафо, Эштэмо и Анимо,

⁵¹ Гошэно, Холоно и Гило: дэшуекх фо́рья лэ́нгирэ гавэнца.

⁵² Араво, Дума и Ешано,

⁵³ Ианумо, Беф-Тапуахо и Афека,

⁵⁴ Хумта, Кири́аф-Арбы, явирэ́с кхарлапэ Хевро́но и Цыгоро: еня́ фо́рья лэ́нгирэ гавэнца.

⁵⁵ Маоно, Кармило, Зифо и Юта,

⁵⁶ Изреелё, Иокдамо и Заноахо,

⁵⁷ Каино, Гива́ и Фимна: дэш фо́рья лэ́нгирэ гавэнца.

⁵⁸ Халхуло, Беф-Цуро и Гедоро,

⁵⁹ Маарафо, Беф-Анофо и Елтеконо: шов фо́рья лэ́нгирэ гавэнца.

⁶⁰ Кири́аф-Ваало, явирэ́с кхарлапэ Кириафо-Яримо, и Арава: дуй фо́рья лэ́нгирэ гавэнца.

⁶¹ Пэ чхучи́ пхув: Беф-Арава, Мидино и Секаха,

⁶² Нившано, Ир-Мелахо и Эн-Геди: шов фо́рья лэ́нгирэ гавэнца.

⁶³ Нэ Евусеен, Ерусалимо́скирэ манушэ́н, на могиндлэ́ тэ вытрадэн Юда́скирэ чхавэ́, и палдава́ Евусеи дживэ́на Юда́скирэ чхавэ́нца кэ Ерусалимо аж кэ дава́ дывэ́с.