Isúso 14 - Библия - Пэ Балтитко Романи чиб (Романэс) 2019

Пхувья́киро Роздыибэн кэ Западо

¹ Ѓа́да, со, дорэснэ́ (долынэ) дрэ миштыпна́скири ме́ра Израилёскирэ чхавэ́ пэ Ханаано́скири пхув, со роздынэ лэ́нгэ дрэ миштыпна́скири ме́ра раша́й Елиза́ро и Ису́со, Навиноскиро чхаво́, и родэнгирэ барыдыра́ пэ Израилёскирэ-чхавэ́нгирэ ро́дыцы.

² Пир жре́биё роздынэ ёнэ, сыр припхэндя́ Рай Дэвэ́л пир Мойзастэ, еня́ родыцэнгэ и пашакэ Манасия́скирэ родыцо́скэ.

³ Палдава́ со дуе родыцэнгэ и пашакэ Манасия́скирэ родыцо́скэ Мо́йза дыя́ дрэ миштыпна́скири ме́ра пал Иорда́но, Левитэ́нгэ на дыя́ миштыпна́скири ме́ра машкира́л лэ́ндэ;

⁴ пал-дова́ со Иосифо́скирэ чхавэ́ндыр выгинэ́ дуй ро́дыцы: Манасия́скиро и Ефремоскиро; пир дава́ ёнэ и на дынэ́ Левитэ́нгэ паша́ пэ пхув, а екх фо́рья ваш джиибэ́н лэ́нгирэ пхувья́са ваш кхэритконэ́ мурдалэ́нгэ (ското) лэ́нгирэ и ваш яви́р лэ́нгирэ льготы (выгоды).

⁵ Сыр припхэндя́ Рай Дэвэ́л Мойза́скэ, адя́кэ и кэрдэ́ Израилёскирэ чхавэ́, ке́ли роздэнас пхув дрэ миштыпна́скири ме́ра.

⁶ Юда́скирэ чхавэ́ явнэ́ дро Галга́ло кэ Ису́со (Ёхошуа́), и пхэндя́ лэ́скэ о Халево, Ефониёскиро чхаво́, Кенезеянино: “Ту джинэ́са, со ракирдя́ Рай Дэвэ́л Мойза́скэ, Дэвлэ́скирэ манушэ́скэ, пал ма́ндэ и пал ту́тэ дрэ Кадес-Варна.

⁷ Ма́нгэ сыс штардэша́ бэрш, ке́ли Мо́йза, писха́ри Ра́скирэ-Дэвлэ́скиро, бичхадя́ ман Кадес-Варнатыр тэ обдыкхав пхув, и мэ яндём лэ́скэ дрэ отпхэныбэ́н, со сыс ма́ндэ пэ ило́:

⁸ пша́ла мирэ́, савэ́ псирдэ́ ма́нца, яндлэ́ дар дро ило́ манушэ́нгиро, а мэ кэрдём саро́ дро чачипэ́н мирэ́скэ Ра́скэ-Дэвлэ́скэ, Дэвлэ́скэ;

⁹ и совлахадя́ Мо́йза дрэ дова́ дывэ́с и пхэндя́: ‘Пхув, пир сави́ псирдя́ тыри́ ґэро́й, явэ́ла миштыпнаскирэ мераса ту́кэ и тырэ́ чхавэ́нгэ пэ ве́ко, пал-дова́ со ту дрэ чачипэ́н саро́ кэрдя́н Ра́скэ-Дэвлэ́скэ, Дэвлэ́скэ мирэ́скэ.’

¹⁰ И адя́кэ, ґа́да, Рай Дэвэ́л ячкирдя́ ман джидэс, сыр Ёв ракирдя́; акана́ штардэша́ пандж бэрш прогия́ долэ́ часостыр, ке́ли Рай Дэвэ́л пхэндя́ Мойза́скэ дава́ лав, и Израилё псирдя́ пир чхучи́ пхув; акана́, ґа́да, ма́нгэ охтодэша́ пандж бэрш;

¹¹ нэ и акана́ мэ адя́кэ-паць сом зорало́, сыр и тэды, ке́ли бичхадя́ ман Мо́йза: ци бут тэды сыс ма́ндэ зор, ада́кицы и какана́ исын ваш дова́, соб (кай) тэ маравпэ, и тэ выджав и тэ заджав;

¹² и адя́кэ, дэ ма́нгэ дая́ бэ́рга, пал сави́ ракирдя́ Рай Дэвэ́л дрэ дова́ дывэ́с; пал-дова́ со шундя́н дро дова́ дывэ́с, со одо́й дживэ́на Енакоскирэ чхавэ́, и фо́рья лэ́ндэ исын барэ́ и зоралэ́ тынэ́нца, могинэ́ла тэ явэ́л, со Рай Дэвэ́л явэ́ла ма́нца, и мэ вытрадава лэн, сыр ракирдя́ Рай Дэвэ́л”.

¹³ Ису́со бахтякирдя́ лэс, и дыя́ дрэ миштыпна́скири ме́ра Халевоскэ, Иефониёскирэ чхавэ́скэ Хевро́но.

¹⁴ Адя́кэ Хевро́но яця́пэ миштыпнаскирэ мераса Халевоскэ, Иефониёскирэ-чхавэскири, Кенезеяниноскири, кэ дава́ дывэ́с, пал-дова́, со ёв дро чачипэ́н кэрдя́ саро́, сыр пхэндя́ Рай Дэвэ́л, Дэвэ́л Израилёскиро.

¹⁵ Лав Хевроноскэ англэды́р сыс Кири́аф-Арба, сыр кхардяпэ машкира́л Енакоскирэ чхавэ́ндэ екх баро́ ману́ш. И пхув яця́ штыл марибнастыр.