Isúso 13 - Библия - Пэ Балтитко Романи чиб (Романэс) 2019

Пхувья́, Савэ Ячнэ́пэ

¹ Ке́ли Ису́со пхурия, и загия́ дрэ пхурэ́ бэрша́, тэды Рай Дэвэ́л пхэндя́ лэ́скэ: “Ту пхуриян, загиян дрэ пхурэ́ бэрша́, а пхув тэ лэс дрэ мэкно́ миштыпэ́н ячэ́лапэ ишчо (инкэ́) древа́н бут.

² Ѓа́да, сави́ ячэ́лапэ пхув: сари́ провинцыя пашы́л Филистимо и сари́ Гесуроскири пхув.

³ Сихоростыр, со исын анги́л Еги́пто кэ ме́жа Екроноскири кэ паш-рати́тко (северно риг), далэ́ пхувья́ гинэнапэ Ханаансконэнца, пэ савэ́ исын пандж хулая́ Филистимоскирэ: Газско, Азотско, Аскалонско, Гефско, Екронско и Авейско;

⁴ кэ паш-дывэ́с (юго) сари́ Ханаано́скири пхув Меаратыр Сидонсконатыр кэ Афеко, кэ Аморее́нгирэ рига́,

⁵ адя́кэ-паць пхув Гевалоскири и саро́ Лива́но кэ кхамэскиро ўзгиибэн Ваал-Гадо, со исын пашы́л Ермоноскири бэ́рга, кэ загиибэ́н дрэ Емафо.

⁶ Сарэ́н бэргитконэн манушэ́н Ливаностыр кэ Мисрефоф-Маимо, сарэ́н Сидонянэн Мэ вытрадава Израилёскирэ-чхавэ́нгирэ мо́стыр; роздэ ла дрэ миштыпна́скири ме́ра Израилёскэ, сыр Мэ ракирдём ту́кэ;

⁷ роздэ дая́ пхув дрэ миштыпна́скири ме́ра еня́ родыцэнгэ и пашакэ Манасия́скирэ родыцо́скэ.

⁸ А ро́дыцо (чанг) Рувимоскиро и Гадоскиро явирэ пашэ́са Манасия́скирэ родыцоса дорэснэ́ пэ́скири миштыпна́скири ме́ра Мойзастыр пал Иорда́но кэ васто́ко, сыр дыя́ лэ́нгэ Мо́йза, Ра́скиро-Дэвлэ́скиро писха́ри,

⁹ Ароеростыр, саво́ исын пэ брэ́го Арноноскирэ рэкицакиро (лэнорьякиро), и фо́ро, саво́ исын машки́р сы́гно рэ́кица (лэнори́) пэ до́ло, и сари́ лошчы́на Медева кэ Дивоно;

¹⁰ адя́кэ-паць сарэ́ Сигоноскирэ фо́рья, Аморее́нгирэ крали́скирэ, саво́ сыс крали́са кэ Есево́но, кэ ме́жы Амонитянэнгирэ,

¹¹ адя́кэ-паць Галаа́до и ме́жа Гесурско и Маахакирэ, и сари́ бэ́рга Ермоно и саро́ Васа́но кэ Салха,

¹² саро́ Васаноскирэ-Огоскиро кралипэ́н, саво́ сыс крали́са дрэ Астарофа и дрэ Едрея. Ёв яця́пэ екх Рефаимэндыр, савэ́н Мо́йза домардя́ и протрадыя.

¹³ Нэ чхавэ́ Израилёскирэ на вытрадынэ́ манушэ́н Гесуроскирэн и Маахиёскирэн, и дживэ́ла Гесуро и Мааха машки́р Израилё кэ дава́ дывэ́с.

¹⁴ Екхэ родыцо́скэ Левиёскирэскэ на дыя́ миштыпна́скири ме́ра: свэ́нто яныбэ́н Ра́скиро-Дэвлэ́скирэ, Дэвлэ́скиро Израилёскиро, акэ, исын лэ́скири миштыпна́скири ме́ра, сыр пхэндя́ лэ́скэ Рай Дэвэ́л.

¹⁵ Родыцоскэ Рувимо́скирэ чхавэ́нгэ пир лэ́нгирэ кхэра́ дыя́ миштыпна́скири ме́ра Мо́йза:

¹⁶ ригаса лэнгирьяса сыс Ароеро, саво́ исын пэ Арноноскирэ-рэкицакиро (лэнорьякиро) брэ́го, и фо́ро, саво́ исын машки́р рэ́кица (лэнори́), и сари́ лошчы́на пашы́л Медева,

¹⁷ Есево́но и сарэ́ лэ́скирэ фо́рья, савэ́ исын пэ лошчы́на, и Дивоно, Вамофо-Ваало и Беф-Ваал-Меоно,

¹⁸ Иааца (Яца), Кедемофо и Мефаафо,

¹⁹ Кириафаимо, Сивма и Цэреф-Шахаро пэ бэ́рга Емеко,

²⁰ Беф-Фегоро и штэ́ты пашы́л склоно Фасгакиро и Беф-Ешымофо,

²¹ и сарэ́ фо́рья пэ лошчы́на, и саро́ Сигоноскиро кралипэ́н, Аморейсконэ-крали́скиро, саво́ сыс крали́са дрэ Есево́но, савэ́с замардя́ Мо́йза, адя́кэ-паць и Мадиамсконэ шэралэн: Евияс, и Рекемос, и Цурас, и Хурас, и Ревос, Сигоноскирэ тхагарьен, савэ́ дживдэ́ пэ доя́ пхув;

²² адя́кэ-паць Валаамос, Веороскирэ чхавэ́с, зумакирибнаскирэс, замардэ́ Израилёскирэ чхавэ́ куртала́са кхэтанэ́ дрэ гиныбэ́н, кицы́ ёнэ замардэ́.

²³ Ригаса пир ме́жа Рувимо́скирэ чхавэ́нгирэ сыс Иорда́но. Ѓа́да, исын миштыпна́скири ме́ра Рувимо́скирэ чхавэнгири, пир лэ́нгирэ кхэриткароды, фо́рья и гава́ лэ́нгирэ.

²⁴ Мо́йза адя́кэ-паць дыя́ миштыпна́скири ме́ра Гадо́скирэ родыцо́скэ, чхавэ́нгэ Гадоскирэнгэ, пир кхэри́тка ро́ды лэ́нгирэ:

²⁵ ригаса лэнгирьяса сыс Язеро (Иазеро) и сарэ́ Галаадо́скирэ фо́рья, и паш Амоноскирэ чхавэ́нгиро пэ пхув кэ Ароеро, со исын анги́л Рава,

²⁶ и пхувья́ Есевоноскирэ кэ Рамаф-Мицфа и Ветонимо, и Маханаимостыр кэ Давироскирэ-межакирэ рига́,

²⁷ и пэ до́ло Беф-Гарамо и Беф-Нимра и Сокхофо и Цафоно, со яця́пэ Сигоноскирэ кралипнастыр, Есевоноскирэ крали́скиро; лэ́скирэ ригаса сыс Иорда́но кэ Хинерефоскиро пани́ пал Иорда́но кэ васто́ко.

²⁸ Ѓа́да, исын Гадо́скирэ-чхавэнгири миштыпна́скири ме́ра, пир кхэри́тка ро́ды лэ́нгирэ, фо́рья и гава́ лэ́нгирэ.

²⁹ О Мо́йза дыя́ миштыпна́скири ме́ра и пашакэ Манасия́скирэ родыцо́скэ, саво́ сыс пал паш Манасия́скирэ-чхавэ́нгирэ родыцо́стыр, пир кхэри́тка ро́ды лэ́нгирэ;

³⁰ Лэ́нгири риг пир ме́жа сыс: Маханаимостыр саро́ Васа́но, саро́ Огаскиро кралипэ́н, Васаноскирэ-крали́скиро, и сарэ́ гава́ Яироскирэ, со исын дрэ Васа́но, шовдэша́ фо́рья;

³¹ а паш Галаадаскири и Астарофоскири и Едреякири, Васаноскирэ-Огоскирэ-кралипнаскирэ фо́рья, дынэ́ Махираскирэ чхавэ́нгэ, Манасия́скирэ-чхавэ́скирэ и пашакэ Махироскирэ чхавэ́нгэ, пир кхэри́тка ро́ды лэ́нгирэ.

³² Ѓа́да, со, Мо́йза дыя́ дрэ миштыпна́скири ме́ра пэ Моавитоскирэ лошчыны пал Иорда́но проти Ерихо́но кэ васто́ко.

³³ Нэ Левиёскирэ родыцо́скэ Мо́йза на дыя́ миштыпна́скири ме́ра: Рай Дэвэ́л, Дэвэ́л Израилёскиро, Кокоро́ сыс лэ́нгири миштыпна́скири ме́ра, сыр Ёв ракирдя́ лэ́нгэ.