Isajos 9 - Библия - Пэ Балтитко Романи чиб (Романэс) 2019

Кра́ли, Саво́ Явэ́ла

¹ Дро англатуно́ часо (цы́ро) сыс тэлякирды Завулоноскири пхув и пхув Нефалимоскири; нэ дова́ часо, саво́ явэ́ла, ґаздэ́ла барипнаса дром пашы́л мо́рё (дэрья́в), пал Иорданоскири пхув, Галиле́я, кай Наюды́тка мануша́ дживэ́на.

² Народо, саво́ псирэ́ла дро калыпэ́н, явэ́ла тэ дыкхэ́л дуд; кэ одолэ́, кон дживэлас дрэ калыпэ́н (цёмныма) сыр мэрибэ́н, захачола дуд.

³ Ту ґаздэса ду́хо (фа́но) дро народо, и дэ́са лэ́скэ бари ра́дыма. Радыпнытко Ёв явэ́ла тэ радынэ́лпэ анги́л ту́тэ, сыр радынэ́напэ мануша́, ко́ли скэдэ́на маро́, ко́ли розлэна дорэсыбэ́н.

⁴ Пал-дова́ со ґа́мо, пхарипэ́н лэ́скиро, дэсто́, саво́ лэс марэлас, Ту пхагирэса сыр дро Мадиамоскиро дывэ́с.”

⁵ Пал-дова́, со кажнонэскирэ-халадэскирэ тыраха марибнастыр, урибэ́н лэ́скиро, саво́ исын дро рат, схачкирэна, отдэна, соб (кай) яг тэ схал лэн.

⁶ Пал-дова́ со Бия́то бия́ндыя амэ́нгэ, чхаво́ исын дыно́ амэ́нгэ; Ёв лэ́ла зор дро Пэ́скиро васт, и дэ́на Лэ́скэ лав: Лачхо́ Годыпнари, зорало́ Дэвэ́л, Дад, конэ́стэ исын ве́чно джиибэ́н, далэ́-свэтоскиро Тхага́ри (Князё).

⁷ Зор Лэ́скири и рама́нё (миро) на пириячэ́ла пэ Давидо́скиро троно дро Лэ́скиро кралипэ́н, соб (кай) Ёв (Дэвэ́л) тэ подрикирэ́л лэс сэндоса и чачипна́са далэ́ дывэсэ́стыр и пэ саро́ ве́ко. Зэвлыныпэн Ра́скирэ-Дэвлэ́скиро кэрэ́ла дава́.

Со Явэ́ла Самарияса

⁸ Рай Дэвэ́л бичхавэ́ла лав кэ Яково, и пэ Израилё Ёв зджа́ла.

⁹ Соб (кай) тэ джинэ́л саро́ народо, Ефре́мо и Самариякирэ мануша́, савэ́ ракирэ́на барипнаса и исын пхутькирдэ́ илэ́са:

¹⁰ “Пынэ́ бара́ – ла́са яви́р бара́, исын вычхингирдэ сикоморы – запаруваса лэн пэ кедры.”

¹¹ Ѓаздэла Рай Дэвэ́л пэ лэ́стэ (Ефремостэ) Рецыноскирэ вэргэ́н, и Ёв дэ́ла курта́ла одолэ́нгэ, савэ́ холясона пэ лэ́стэ.

¹² Сирияни вастоко́стыр, Филистимля́ни западостыр; и ёнэ явэ́на тэ хан Израилё пхэрдэ́ мо́са. И на проджа́ла ишчо (инкэ́) Лэ́скири холы́, и васт Лэ́скиро исын протырдыно.

¹³ Нэ народо на обрисёла кэ Одова́, Кон марэла лэс, на родэ́ла Рас-Дэвлэ́с, болыбна́скирэ-янголэнгирэс.

¹⁴ Отчингирэла Дэвэ́л Израилёстыр шэро́ и пори, пальма и дэсто́ дро екх дывэ́с.

¹⁵ Пхуро́ и барвало́ – дава́ исын шэро́, а проро́ко – хохаибнари – дава́ исын пори.

¹⁶ Далэ́-народоскирэ шэралэ́ хохавэна одолэ́н, и кон исын кхэтанэ́ лэ́нца, одолэ́ хасёна.

¹⁷ Палдава́ на явэ́ла тэ радынэ́лпэ Рай Дэвэ́л пал лэ́скирэ тэрнэ́ манушэ́ндэ, на потангинэла лэ́скирэ бидадэскирэн и биромэскирэн пал дова́, со сарэ́ ёнэ исын хохаибнарья и чора, ушта́ лэ́нгирэ пхэнэ́на налачхэ́ лава́. Палдава́ на проджа́ла Лэ́скири холы́ и васт Лэ́скиро исын протырдыно.

¹⁸ Пал-дова́ со грэ́хо росхачия, сыр яг ха́ла пхусадэ́ чарья́, хачола дрэ вэша́, и тхув ґаздэ́лапэ стылбоса.

¹⁹ Ра́скирэ-Дэвлэ́скири, болыбна́скирэ-янголэнгири холы́ хачкирэ́ла пхув, народо кэрэ́лапэ сы́рбы хабэ́н ваш яг, на потангинэла ману́ш пэ́скирэ пшалэ́с.

²⁰ Явэ́на тэ чхинэн пир чачи́ риг – а бокхалэ́ ячэ́напэ, явэ́на тэ хан пир ле́во (зэ́рво) риг – на чалёна; кажно явэ́ла тэ хал кокоро́ пэс.

²¹ Мана́сия ха́ла Ефремос, Ефре́мо ха́ла Манасияс, а кхэтанэ́ ёнэ ха́на Юдас. И на пириячэ́ла Лэ́скири холы́, и васт Лэ́скиро исын протырдыно.