Isajos 65 - Библия - Пэ Балтитко Романи чиб (Романэс) 2019

Сэ́ндо и Зракхибэ́н

¹ “Мэ сыкадём Пэс на одолэ́нгэ, кон пхучэлас пал Ма́ндэ; Ман латхнэ́ на одолэ́, кон родэлас: “Акэ Мэ, акэ”, Мэ пхэнавас народоскэ, саво́ на кхарэ́ласпэ Мирэ́ лавэ́са.

² Кажно дывэ́с протырдавас Мирэ́ васта́ кэ народо, саво́ на кандэ́ла, саво́ псирэ́ла налачхэ́ дромэ́са, саво́ дживэ́ла пир лэ́скири годы́.

³ Кэ народо, саво́ дрэ якха́ калякирэлас Ман: янэ́ла свэ́нта дыибэна́ дро вэш, хачкирэ́ла фимиа́мо пэ бара́.

⁴ Бэшэла дрэ коплицы (гробницы) и ратькирэла дрэ ґеба́р (пешчэра); ха́ла балычано мас и на́лачхо (нажужо) хабэ́н исын дрэ лэ́скирэ чарэ́.

⁵ Саво́ ракирэ́ла: ‘Тэрдёв, на джа́ кэ мэ, пал-дова́ со мэ сом свэ́нто ваш ту́кэ.” Ёнэ исын тхув, саво́ трэй Ма́нгэ тэ сунгав, яг, сави́ кажно дывэ́с хачола.

⁶ Акэ, со исын чхиндло́ анги́л Миро муй: “На лава́ Мэ тэ вырикирав, Мэ отда́ва палэ, отда́ва палэ лэ́нгэ.

⁷ Тумарэ́ грэ́хи и кхэтанэ́ тумарэ́-дадэнги́рэ грэ́хи, – ракирэ́ла Рай Дэвэ́л; пал-дова́ тумарэ́ дада́ хачкирэнас фимиа́мо пэ бэ́рги, пэ тыкнэ́ бэ́ргицы кошэнас Ман; Мэ отмеринава лэ́нгэ пал сарэ́ лэ́нгирэ рэ́нды.’

⁸ Адя́кэ ракирэ́ла Рай Дэвэ́л: “Ко́ли барьёла винаградо, тэ́ньчи ракирэ́на: ‘На чхин лэс, пака ёв выбарьёла, дрэ лэ́стэ исын бахтякирибэ́н; адя́кэ Мэ кэра́ва ваш Мирэ́ писхарье́нгэ, соб (кай) тэ на хасякира́в сарэ́н.

⁹ И вылыджава Мэ ро́до Яковостыр, Юда прилэ́ла Ма́ндыр Мирэ́ бэ́рги, дава́ прилэ́на Мирэ́ выкэдынэ́; Мирэ́ писха́рья (рабы) одо́й явэ́на тэ дживэ́н.

¹⁰ Пэ Сароно явэ́на тэ чаравэнпэ бакря́; пэ Акхоро гурува явэ́на тэ откхинён, Мирэ́ народоскирэ, саво́ латхя́ Ман.

¹¹ А тумэн, кон ячкирдя́ Рас-Дэвлэ́с, бистырдэ пал Мири́ свэ́нто бэ́рга, кон кэравэла хабэ́н ваш Гадоскэ, чхувэ́ла пхэрдо́ чаро́ ваш Мени (Судьба).

¹² Мэ тумэн отда́ва курталакэ; тумэ́ пэрэ́на пэ чанга́ и тумэн замарна, пал-дова́ со Мэ кхардём и тумэ́ на отпхэндлэ́, ракирдём – тумэ́ на шунэнас, а кэрэ́нас накуч анги́л Мирэ́ якха́ и выкэдэнас дова́, со сыс Ма́нгэ на пир ило́.’”

¹³ Палдава́ адя́кэ ракирэ́ла Рай Дэвэ́л: “Акэ, Мирэ́ писха́рья ха́на, а тумэ́ бокхалэ́ явэ́на; Мирэ́ писха́рья явэ́на тэ пьен – а тумэ́ явэ́на би панескиро.

¹⁴ Мирэ́ писха́рья явэ́на тэ радынэ́нпэ, а тумэ́ явэ́на ладжакирдэ́; ёнэ явэ́на тэ бага́н илэ́скирэ радыма́тыр, а тумэ́ явэ́на тэ годлэн илэ́скирэ дукхатыр, и заровэна пхагирдэ́ духо́стыр.

¹⁵ И ячкирэна тумаро́ лав, соб (кай) тэ прокошэн лэс Мирэ́ выкэдынэ́ мануша́; и замарла тут Рай Дэвэ́л, а Пэ́скирэ писхарье́н кхарэ́ла явирэ лавэ́са.

¹⁶ Ко́ли вари-кон бахтякирэ́ла пэс Лэ́са пэ дая́ пхув, явэ́ла бахтякирдо́ чачунэ́ Дэвлэ́са, и кон совлахала пэ пхув, явэ́ла тэ совлахал чачунэ́ Дэвлэ́са, пал-дова́ со ґаратунэ́ биды бистрэнапэ, явэ́на гарадэ́ Мирэ́ якхэ́ндыр.

¹⁷ Акэ, Мэ кэра́ва нэво́ болыбэ́н и нэви́ пхув; пал доя́ пхув болыбнаса, савэ́ сыс англэды́р вагэдыр (ґарэдыр) буты́р на пририпирна.

¹⁸ А тумэ́ явэ́на бахталэ́, явэ́на тэ радынэ́нпэ сарэ́ бэрша́ пал дова́, со Мэ кэра́ва. Акэ, Мэ кэра́ва Ерусалимо багаибнаса и лэ́скиро народо радыма́са.

¹⁹ И Мэ ла́ва тэ радынавпэ пал Ерусалимо; Мэ ява́ва радыпнытко пал Миро народо; одо́й буты́р нико́н на шунэ́ла ровибэн и годлыпэн.

²⁰ Одо́й буты́р на явэ́ла тыкнэ́ чхавэ́с и пхурэс, саво́ на дживдя́ сарэ́ пэ́скирэ бэрша́, пал-дова́ со шэлбэршэнгиро ману́ш мэрэ́ла тэрнэса; нэ шэлбэршэнгиро грэхи́тко явэ́ла прокошно́?

²¹ И явэ́на тэ кэрэ́н кхэра́, и явэ́на тэ дживэ́н дрэ лэ́ндэ; тэ барьякирэ́н винаградники, и явэ́на тэ хан лэ́ндыр.

²² На явэ́на тэ кэрэ́н, соб (кай) яви́р ману́ш одо́й тэ дживэ́л; на явэ́на тэ барьякирэ́н, соб (кай) яви́р тэ хал, пал-дова́ со Мирэ́-народоскирэ дывэса́ явэ́на, сыр дывэса́ кэ кашт; и выкэдынэ́ Мирэ́ ґара́ (длу́гэс) явэ́на тэ рикирэнпэ кэ дова́, со кэрдэ́ лэ́нгирэ васта́.

²³ На явэ́на тэ кэрэ́н буты́ ивья́ (дармэс), на явэ́на тэ биянэн чхаворэ́н пэ мэнька, пал-дова́ со явэ́на родоса, бахтякирдэ Дэвлэ́стыр, и лэ́нгирэ чхаворэ́ лэ́нца.

²⁴ Адя́кэ явэ́ла: анги́л дова́, сыр ёнэ кхарэ́на Ман – Мэ пхэна́ва; ёнэ ишчо (инкэ́) явэ́на тэ ракирэ́н, и Мэ шунава.

²⁵ Рув и бакроро́ явэ́на кхэтанэ́ тэ чаравэнпэ; шчэр (ле́во) явэ́ла тэ хал пхус, сыр гурув, а сап ха́ла пра́хо. Ёнэ на явэ́на тэ замарэ́н, на явэ́на тэ хасякирэ́н (тэ кэрэ́н чорипэ́н) пэ Мири́ свэ́нто бэ́рга”, – ракирэ́ла Рай Дэвэ́л.