Isajos 64 - Библия - Пэ Балтитко Романи чиб (Романэс) 2019

¹ О, ко́ли б Ту росчхиндян болыбэ́н и ги́ян тэлэ́! Бэ́рги схачинэ б Тырэ́ мо́стыр.

² Сыр хачкирдэ́ ягатыр, сави́ билавэла (плавинэла), сыр пане́стыр, саво́ кэрадёла, соб (кай) тэ джинэ́н Тыро́ лав джиндло́ Тырэ́ вэргэ́нгэ; соб (кай) тэ издран анги́л Ту́тэ народы.

³ Ке́ли Ту кэрэсас даранэ рэ́нды, савэ́ амэ на ужакирасас, и Ту джасас тэлэ́ – бэ́рги биладёнас (таинэнас) Тырэ́ мо́стыр.

⁴ Пал-дова́ со николи мануша́ на шунэнас канэнца, и нисави́ якх на дыкхця́ явирэ́с дэвлорэс. Ту сан Екх Дэвэ́л, Саво́ бут кэрдя́ ваш одолэ́нгэ, конэ́стэ исын наде́я пэ Ту́тэ.

⁵ Ту лачхипна́са прилэсас одолэ́с, кон радынэласпэ и кэрэ́лас пир чачипэ́н, кон рипирэлас пал Ту́тэ пэ Тырэ́ дрома́. Нэ, акэ, Ту холясыян, пал-дова́ со амэ гара (длу́гэс) лыям тэ кэра́с грэ́хи; и сыр же амэ зракхасапэ?

⁶ Сарэ́ амэ кэрдямпэ-сыр нажужо предмето, амари́ паты́в – сыр замакхны и́дя, амэ шутиям сыр патри́н (листо); амарэ́ налачхэ́ рэ́нды лыджинэ́ амэн, сыр балва́л.

⁷ На сыс одолэ́с, Кон бы кхардя́ Тыро́ лав, кон закамдя́ б тэ рикирэлпэ пал Ту́тэ; палдава́ Ту гарадян Тыро́ муй амэ́ндыр, Ту ячкирдэн амэн тэ хасёвас грэхэ́ндыр.

⁸ Нэ какана́, Раё Дэ́вла, Ту сан амаро́ Дад; амэ сам ґлэя (бла́та), савья́тыр кэрэ́на кхорэ́, а Ту – Одова́, Кон создыя́ амэн; сарэ́ амэ – Тырэ́-вастэнгири буты́.

⁹ На холясов ґара́ (длу́гэс), Раё Дэ́вла! На ри́пир ве́чнэс пал грэ́хи! Дыкх акана́ – сарэ́ амэ сам Тыро́ народо.

¹⁰ Тырэ́ форо́скирэ свэ́нта штэ́ты кэрдэ́пэ чхучэ́ пхувья́са; Сио́но – чхучи́ пхув, Ерусалимо исын обчордо.

¹¹ Кхэр, кай амэ свэнтякирасаспэ, кай сыс амари́ паты́в и кай амарэ́ дада́ славинэнас Тут, исын схачкирдо яга́са; амаро́ барвалыпэ́н исын росчордо.

¹² Ко́ли саро́ дава́ пхэрдия, ци явэ́са ишчо (инкэ́) ту тэ зрикирэс Пэс амэ́ндыр, Раё Дэ́вла? Ци явэ́са Ту ничи́ тэ на ракирэ́с, тэ холясос пэ амэ́ндэ буты́р, сыр трэй?