Isajos 61 - Библия - Пэ Балтитко Романи чиб (Романэс) 2019

Лачхи́ Зан (Звесь) пал Зракхибэ́н

¹ Ра́скирэ-Дэвлэ́скиро Ду́хо (Фа́но) исын пэ Ма́ндэ, пал-дова́ со Рай Дэвэ́л помакхця Ман тэ пхэна́в бахтало́ лав (бахталы́ зан) чорорэнгэ; бичхадя́ Ман, соб (кай) тэ састякирав манушэ́н розмардэ илэ́са, тэ пхэна́в пал во́ля одолэ́нгэ, кон исын дрэ наволя (бэшыбэн); тэ пхэна́в манушэ́нгэ дрэ бэшыбэн, со вудара́ бэшыбнытка исын псирадэ (откэрдэ).

² Соб (кай) тэ пхэна́в пал лачхо́ бэрш Ра́скирэ-Дэвлэ́скиро, пал дывэ́с, ко́ли пхэрдёла холы́ амарэ́ Дэвлэ́скири, тэ подрикирав сарэ́н, дрэ конэ́стэ исын ту́га (тугинэла).

³ Тэ пхэна́в одолэ́нгэ, кон исын бибахтало́ пэ Сио́но, со пра́хо запарувэлапэ шукаронэ укэдыибнаса; ровибэн радымакирэ (лошалэ́) елеёса; пхаро́ (смэнтно) ду́хо (фа́но) запарувэлапэ шукаронэ урибнаса и кхарна лэн зоралэ́ чачипна́са, Ра́скирэ-Дэвлэ́скирэ бутяса дрэ Лэ́скиро барипэ́н.

⁴ И ёнэ явэ́на тэ ґаздэ́н пхувья́, савэ́ ґара́ исын чхучэ́; ґаздэ́на ґаратунэ́ роспхагирдэ́ кхэра́ и обчордэ фо́рья, савэ́ ґаратунэ́ дывэсэ́ндыр сыс чхучэ́.

⁵ Явэ́на мануша́ явирэ народо́стыр и явэ́на тэ чаравэн тумарэ́ кхэритконэ́ мурдалэ́н (ското); чхавэ́ лэ́нгирэ явэ́на тэ кэрэ́н буты́ пэ пхув и дрэ винагра́днико ваш тумэ́нгэ.

⁶ А тумэ́ явэ́на тэ кхарэнпэ Ра́скирэ-Дэвлэ́скирэ рашанца, тумэн кхарна амарэ́ Ра́скирэ-Дэвлэ́скирэ дынарье́нца; тумэ́ явэ́на тэ лэн ко́фо барвалэ́ народэнгирэ барвалыпнастыр, тумэ́ явэ́на шардэ лэ́нгирэ барипнаса.

⁷ Пал дова́, со тумэн ладжакирэнас, тумэ́ прилэ́на дрэ дуй мо́лы буты́р паты́в; пал-дова́, со кошэнас тумэн, тумэ́ явэ́на тэ радынэ́нпэ, со дасави́ исын лэ́нгири во́ля, пал-дова́ со дуй мо́лы тумэ́ дорэсэ́на (долэна) пэ пэ́скири пхув буты́р; ве́чно ра́дыма (лош) явэ́ла лэ́ндэ.

⁸ Пал-дова́ со Мэ, Рай Дэвэ́л, дава́ паты́в чачунэ́ сэндоскэ, Мэ на кама́м, ко́ли чорэна, ко́ли притасавэ́на; Мэ отда́ва палэ лэ́нгэ пир чачипэ́н; Мэ чхува́ва лэ́нца ве́чно завето.

⁹ И ґалёна машки́р Наюды́тка народы пал ро́до лэ́нгиро, лэ́нгирэ чхаворэ́н ґалёна машки́р ро́ды; сарэ́, кон дыкхэ́ла лэн, явэ́на тэ джинэ́н, со ёнэ исын ро́до, саво́ бахтякирдя́ Дэвэ́л.

¹⁰ Радыма́са мэ ла́ва тэ радынавпэ пал Растэ-Дэвлэ́стэ; явэ́ла тэ радынэ́лпэ зоралэ́с миро ду́хо (фа́но) пал мирэ́ Дэвлэ́стэ, пал-дова́ со Ёв уридя ман дрэ и́ди зракхибнытка, уридя ман чачипнаскирэ урибнаса; сыр пэ тэрнэстэ Ёв чхудя́ вя́нка, сыр тэрня укэдыя.

¹¹ И сыр пхув барьякирэл пэ́скэ чарья́, сыр у́нта (садо) барьякирэ́ла дова́, со дрэ ла́кири пхув чхудэ́, адя́кэ и Рай Дэвэ́л сыкавэ́ла чачипэ́н и паты́в анги́л сарэ́ народы.