Isajos 6 - Библия - Пэ Балтитко Романи чиб (Романэс) 2019

Дэвэ́л Прикхарэла Исаёс

¹ Дро дова́ бэрш, ко́ли мыя́ кра́ли Ози́я, мэ дыкхцём Рас-Дэвлэ́с, Саво́ бэшэлас пэ вучо́ крали́тко штэ́то, а яго́ро (краё) пэ урибэ́н Лэ́скиро пхэрдякирдя́ сари́ Кхангири́.

² Пашы́л Лэ́стэ сыс тэрдэ́ серафимы: кажнонэ́стэ лэ́ндыр сыс шов пхака́ (крылы); дуе пхакэнца кажно закэрэлас пэ́скиро муй, ишчо (инкэ́) дуе пхакэнца закэрэлас пэ́скирэ ґэра́, а дуе пхакэнца вурнялас.

³ Ёнэ кхарэнас екх екхэ́с и ракирэ́нас: “Свэ́нто, Свэ́нто исын Рай Дэвэ́л, болыбна́скирэ-янголэ́нгиро, сари́ пхув исын пхэрды́ Лэ́скирэ барипнаса!”

⁴ Заиздранас вудара́ лэ́нгирэ занендыр, кхэр пхэрдия кучонэ́ тхувэса.

⁵ Мэ пхэндём: “Бида ма́нгэ! Хасиём мэ, пал-дова́, со мэ сом ману́ш нажужэ́ уштэ́нца, мэ джива́ва машки́р манушэ́ндэ нажужэ́ уштэ́нца, и якха́ мирэ́ дыкхэнас Крали́с, Рас-Дэвлэ́с, болыбна́скирэ-янголэнгирэс.”

⁶ Тэ́ньци вурняндыя кэ мэ екх серафимэндыр, а дро лэ́скиро васт сыс хачкирдо вангар, саво́ ёв лыя́ алтарёстыр.

⁷ Ёв чиладя́ мирэ́ ушта́ и пхэндя́: “Акэ, дава́ чиладя́ тырэ́ ушта́, на́лачхо рэ́ндо тыро́ исын лыно́ криг ту́тыр, и грэ́хо тыро́ исын жужакирдо.”

⁸ Мэ шундём Ра́скирэ-Дэвлэ́скири зан. Ёв пхэнэлас: “Конэ́с Ма́нгэ тэ бичхавав? Кон подджа́ла ваш Амэ́нгэ?” Мэ пхэндём: “Акэ, мэ сом, бичха́в ман.”

⁹ Ёв пхэндя́: “Джа́, пхэн далэ́ народоскэ: ‘Явэ́на тэ шунэ́н – и на ґалёна, явэ́на тэ дыкхэ́н якхэ́нца – и на роздыкхэна [дыкхэ́на-р.с.].’

¹⁰ Пал-дова́ со наковло яця́ далэ́-народоскиро ило́, пхарэ́с лэ́нгэ тэ шунэ́н закэрдэ якхэ́нца, и на дыкхэ́на якхэ́нца, и на шунэ́на канэнца, и на ґалёна илэ́са, и на обрисёна, соб (кай) Мэ тэ высастякирав лэн.”

¹¹ Мэ пхэндём: “Ци ґара́ (длу́гэс) дава́ явэ́ла, Раё, Дэ́вла?” Ёв пхэндя́: “Пириячэ́ла, ко́ли далэ́ фо́рья явэ́на чхучэ́, нико́н на явэ́ла тэ дживэ́л дрэ лэ́ндэ, ко́ли джа́на мануша́ далэ́ кхэрэндыр, ко́ли дая́ пхув явэ́ла сарэ́са чхучи́.

¹² Отбичхавэла Рай Дэвэ́л манушэ́н, никонэ́с на ячкирэ́ла пэ дая́ пхув.

¹³ И ко́ли ячэ́лапэ дэ́што паш пэ ла́тэ и рисёла, усае́кх явэ́ла пхув чхучи́, нэ сыр теревинфостыр и дэмбостыр, ко́ли ёнэ исын чингирдэ тэлэ́, исын ячаибэ́н, адя́кэ свэ́нто ячаибэ́н ячэ́лапэ.”