Isajos 55 - Библия - Пэ Балтитко Романи чиб (Романэс) 2019

Рай Дэвэ́л Замангэла кэ Бахтало́ Джиибэ́н

¹ “Кон древа́н камэ́ла тэ пьел (исын трушало), мэк тэ джал кэ пани́! Ко́ли нанэ тумэ́ндэ ловэ́, усае́кх джа́н, кинэн и хан! Кинэн биловэнгиро мол (вино) и тхуд!

² Со́скэ тумэ́нгэ отдэ́н ловэ́ пал дова́, со нанэ маро́; со́скэ тэ отдэ́н ловэ́ пал дова́, со на чалякэрэла? Шунэ́н акана́ Ман и хан лачхипэ́н; мэк тумаро́ ди тэ явэ́л чало тхулыпнаса.

³ Откэрэн тумарэ́ кана́, явэ́н кэ Мэ; пошунэн и явэ́ла тэ дживэ́л тумаро́ ило́; и Мэ да́ва тумэ́нгэ ве́чно завето, Мэ да́ва лачхипэ́н, пал саво́ дыём лав Давидо́скэ.

⁴ Акэ, Мэ чхудём лэс, соб (кай) ёв тэ досыкавэл (тэ допхэнэл) чачипэ́н народэнгэ, соб (кай) тэ сыклякирэ́л лэн.

⁵ Акэ, ту кхарэса народо, савэ́с Ту на джиндян; народы, и савэ́ тут на джинэ́на, савэ́ джа́на кэ ту ваш Тырэ́ Ра́скэ-Дэвлэ́скэ, ваш Свэ́нто Израилё, пал-дова́ со Ёв дыя́ ту́кэ бари паты́в.

⁶ Родэ́н Рас-Дэвлэ́с, ко́ли сашты́ тэ латхэ́н Лэс; кхарэ́н Лэс, ко́ли Ёв исын пашы́л.

⁷ Мэк грэхи́тко ману́ш тэ мэкэл пэ́скиро дром и пэ́скирэ налачхэ́ ду́мы, мэк тэ явэ́л ёв кэ Рай Дэвэ́л, и Дэвэ́л отмэкэ́ла лэ́скиро грэ́хо; мэк ёв тэ явэ́л кэ Дэвэ́л амаро́, Савэ́скэ сарэ́ исын дро́га.

⁸ Мирэ́ ду́мы – нанэ тумарэ́ ду́мы; Мирэ́ дрома́ – нанэ тумарэ́ дрома́, – ракирэ́ла Рай Дэвэ́л.

⁹ Нэ сыр болыбэ́н исын вучэды́р пхувья́тыр, адя́кэ-паць и Мирэ́ дрома́: ёнэ исын вучэды́р тумарэ́ дромэндыр, и ду́мы Мирэ́ исын вучэды́р тумарэндыр.

¹⁰ Сыр ив и брышы́нд пэрэ́на болыбна́стыр, нэ палэ на рисёна, а пэрэ́на пэ пхув, соб (кай) ёй тэ биянэ́л и тэ барьякирэл; соб (кай) тэ дэл гив (зя́рка) одолэ́скэ, кон чхувэ́ла дрэ пхув, и маро́ одолэ́скэ, кон ха́ла:

¹¹ адя́кэ и лав Миро, саво́ выджа́ла Мирэ́ уштэндыр, – ёв на рисёла кэ Мэ палэ нисоса, нэ кэрэ́ла дова́, со Ма́нгэ трэй пир Мири́ во́ля, и кэрэ́ла дова́, ваш со Мэ бичхадём лэс.

¹² А тумэ́ выджа́на радыма́са, и лачхипна́са тумэн пролыджана; бэ́рги и бэ́ргицы явэ́на тэ бага́н гилы́ анги́л тумэ́ндэ, и сарэ́ кашта́ пэ фэ́лда явэ́на сы́рбы радыма́са мануша́, савэ́ марэна дрэ васта́.

¹³ Выбарьёла кипарисо пэ штэ́то, кай хру́сто сувьенца, пэ штэ́то цукнудякиро выбарьёла мирто; саро́ дава́ явэ́ла ваш барипэ́н Дэвлэ́скиро, дава́ исын досыкаибэн ве́чно.”