Isajos 54 - Библия - Пэ Балтитко Романи чиб (Романэс) 2019

Ве́чно Завето пал Рама́нё (Мэро)

¹ Ра́дынпэ, накхабны́ (беплодно) джувлы́, сави́ ние́кхвар на бияндя́, ґа́здэ тыри́ зан радыма́са, и ра́дынпэ кодоя, сави́ николи на биянэлас! Джувля́тэ, савья́ ячкирдя́ ром буты́р чхаворэ́н, сыр одольятэ, сави́ дживэ́ла ромэса, – ракирэ́ла Рай Дэвэ́л.

² Кэр буты́р штэ́то ваш тыри́ ша́тра; кэр ша́тра барэдырэ пологэнца, на ладжа! Протырдэ шылэ длугэдыр, замар тырэ́ килорэ (конки).

³ Ту буглёса пэ сарэ́ рига́; чхаворэ́ тырэ́ залэна дро пле́но народы, и ёнэ явэ́на тэ дживэ́н дрэ ячадэ фо́рья.

⁴ На дар, ту на явэ́са ладжакирды; на ладжа, нико́н тут на ладжакирэла; Ту бистрэса ладжаипэ́н, саво́ прилыян дрэ тэрнэ́ бэрша́; и ту на явэ́са тэ рипирэс пал ладж, сави́ ту прилыян, сыр са́нас биромэскири.

⁵ Кодова́, Кон создыя́ тут, исын тыро́ ром; Рай Дэвэ́л, болыбна́скирэ-янголэ́нгиро исын Лэ́скиро лав; Свэ́нто Израилёскиро тут выкинэла; Ёв кхарлапэ сарэ́-пхувья́кирэ Дэвлэ́са.

⁶ Сы́рбы ромня́, сави́ ровэла, и сави́ исын ячкирды, кхарэ́ла тут Рай Дэвэ́л; сыр тэрня ромня́, сави́ никонэ́скэ на сыс трэй”, – ракирэ́ла тыро́ Дэвэ́л.

⁷ Мэ ячкирдём пэ на́бут тут, нэ барэ́ тангипнаса (жалимаса) Мэ прилава тут палэ.

⁸ Холясыём Мэ пэ ту́тэ, гарадём ту́тыр Миро муй пэ на́бут, нэ Мэ потангинава тут барэ́ лачхипна́са, – ракирэ́ла Рай Дэвэ́л, Саво́ выкиндя тут.

⁹ Дава́ исын ваш Ма́нгэ сыр пани́ дрэ Ноёскирэ дывэса́; сыр совлахадём, тэ́ньчи, ко́ли дживэлас Ноё, со пани́ буты́р на явэ́ла пэ пхув, адя́кэ совлахадём, со Мэ на лава́ тэ холясовав пэ ту́тэ.

¹⁰ Бэ́рги зджана пэ́скирэ штэто́стыр, бэ́ргицы издрана, Миро лачхипэ́н ту́тыр на отджала, Завето, дрэ саво́ исын Миро рама́нё (миро) на парудёла”, – ракирэ́ла Рай Дэвэ́л, Саво́ тангинэла тут.

¹¹ “Чорори, чхурдыны рискирибна́скирэ балваляса, сави́ ровэла и на пириячэ́ла! Акэ, Мэ чхува́ва тырэ́ бара́ пэ рубино, Мэ ла́ва тэ кэра́в тут сапфиростыр.

¹² Мэ кэра́ва тырэ́ фэнштры рубинэндыр и тыри́ по́рта мутинэндыр (жэмчужынэндыр), и саро́ тыро́ тыно дрогонэ́ барэндыр.

¹³ Сарэ́ Тырэ́ чхавэ́ явэ́на тэ сыклён Ра́стыр-Дэвлэ́стыр; явэ́ла лэ́ндэ баро́ рама́нё (миро).

¹⁴ Ту явэ́са зоралы́ чачипна́са, на трэй ту́кэ тэ дарэс, пал-дова́ со нико́н ту́кэ буты́р на дэ́ла пхарипэ́н, ту на явэ́са тэ дарэс, пал-дова́ со ёв кэ ту на подджа́ла.

¹⁵ Акэ, явэ́на тэ ґаздэ́нпэ пэ ту́тэ, нэ дава́ нанэ Ма́ндыр; кон ґаздэ́лапэ пэ ту́тэ, одова́ пэрэ́ла (хасёла).

¹⁶ Акэ, Мэ кэрдём фаурнарис (ковалёс), ёв росхачкирэла вангар дрэ яг, соб (кай) тэ кэрэ́л струменто ваш пэ́скири буты́; а Мэ созда́ва вэргос, соб (кай) ёв тэ хасёл.

¹⁷ Кон бы на ґаздэласпэ пэ ту́тэ вари-со́са, ничи́ ту́са на кэрэ́лапэ; со б на ракирэ́нас пал ту́тэ пэ сэ́ндо, ёнэ явэ́на бангэ́, а на ту. Дава́ исын да́ро сыр мэкно́ миштыпэ́н, со прилэ́на Ра́скирэ-Дэвлэ́скирэ писха́рья, ёнэ явэ́на отмэкнэ и дава́ исын Ма́ндыр,” – ракирэ́ла Рай Дэвэ́л.