Isajos 51 - Библия - Пэ Балтитко Романи чиб (Романэс) 2019

Рай Дэвэ́л Подрикирэ́ла Сио́но

¹ ““Шунэ́н Ман одолэ́, кон родэ́ла чачипэ́н, родэ́ла Рас-Дэвлэ́с! Дыкхэ́н акана́ пэ бэ́рга, савья́тыр тумэн вычингирдэ, пэ хорипэ́н дро рово (хохо́й), каты́р тумэн дорэснэ́.

² Подыкхэн пэ Авраамостэ, тумарэ́ дадэ́стэ и пэ Саратэ, сави́ тумэн бияндя́! Мэ кхардём лэс екхэ́с, дыём лэ́скэ бахтякирибэ́н, дыём лэ́скэ бут чхаворэ́н.

³ Чачо́, Рай Дэвэ́л подрикирла Сио́но, подрикирла лэ́скирэ роспхагирдэ́ кхэра́; а чхучи́ пхув лэ́скири Ёв кэрэ́ла сыр раё, и мал (степ) лэ́скири пирикэрэла сыр у́нта (садо) Раскири-Дэвлэ́скири; ра́дыма и весёлыма (лош) одо́й явэ́на, парикирибэн и багаибэн.

⁴ Пошунэн Ман, Миро народо и кхэри́тко ро́до Миро! Пошунэн Ман тумарэ́ канэнца! Ма́ндыр выджа́ла Зако́но, и сэ́ндо Миро чхува́ва сыр дуд (свэ́то) ваш народы.

⁵ Пашылэды́р исын Миро чачипэ́н; и джа́ла упрэ́ Миро зракхибэ́н и васт Миро сэндякирэ́ла народы. Островы явэ́на тэ рикирэ́н наде́я пэ Ма́ндэ, и явэ́ла наде́я пэ Миро васт.

⁶ Ѓаздэн тумарэ́ якха́ кэ болыбэ́н и подыкхэн тэлэ́ пэ пхув: болыбэ́н хасёла сыр тхув, а пхув кэрлапэ сыр пхураны и́дя, мануша́ пэ ла́тэ вымэрэна, а Миро зракхибэ́н исын ве́чно; чачипэ́н Миро на хасёла.

⁷ Пошунэн Ман, кон джинэ́ла чачипэ́н, народо, савэ́стэ дро ило́ исын Миро Зако́но! На дарэ́н, ко́ли традэ́на тумэн мануша́, на дарэ́н лэ́нгирэ налачхэ́ лавэ́ндыр!

⁸ Пал-дова́ со ёнэ хасёна; кирмо схала лэн, сыр вы́лна (шэрсь), а чачипэ́н Миро явэ́ла ве́чно, зракхибэ́н Миро николи на пириячэ́ла.”

⁹ Ѓаздэпэ, ґаздэпэ, яв зорало́, васт Ра́скирэ-Дэвлэ́скиро! Ѓаздэпэ сыр дрэ пхуранэ́ бэрша́, ко́ли ґаратуно ро́до дживэлас! Ци на ту хасякирдян Раавос, хасякирдян крокодилос?

¹⁰ Ци на ту вышутькирдян мо́рё (дэрья́в); шутькирдян пани́, саво́ исын дро лю́но (адо) хор тэла́л; кэрдя́н мо́рё (дэрья́в) дромэ́са, соб (кай) тэ джа́н мануша́, савэ́н выкиндя Рай Дэвэ́л?

¹¹ И рисёна одолэ́, савэ́н зракхця́ Рай Дэвэ́л, и явэ́на пэ Сио́но багаибнаса, ра́дыма лэ́нгири николи на пириячэ́ла; ёнэ явэ́на бахталэ́ и весе́ла (лошалэ́); ясва и бибахталэ́ ґондя́ (ўздохи) отджана.

¹² “Мэ, Мэ Кокоро́ подрикирава тумэн. Кон ту сан, ко́ли дарэса манушэ́стыр, саво́ мэрэ́ла, дарэса манушэ́скирэ чхавэстыр, саво́ исын адасаво́, сыр чар?

¹³ Кон ту сан, ко́ли бистрэса Рас-Дэвлэ́с, Саво́ тут создыя́, Саво́ протырдыя́ болыбэ́н и дыя́ джиибэ́н пхувьякэ? Кажно дывэ́с ту дарэса тырэ́-вэргоскирэ холя́тыр, адя́кэ, сы́рбы вэ́рго исын пашы́л ту́тэ, саво́ камэ́ла тэ хасякирэ́л тут. Нэ кай исын лэ́скири холы́?

¹⁴ Сы́гэс выджа́ла запхандло ману́ш (дро пле́но) пэ во́ля, и ёв на мэрэ́ла дрэ ґанби́н (яма), и явэ́ла лэ́стэ маро́.

¹⁵ Мэ сом Рай Дэвэ́л, Дэвэ́л тыро́, Саво́ ґаздэ́ла мо́рё (дэрья́в) адя́кэ, со ёв годлэла (ревинэла); Рай Дэвэ́л, болыбна́скирэ-янголэ́нгиро исын Лэ́скиро лав.

¹⁶ Мэ чхува́ва андрэ́ Мирэ́ лава́ дрэ тырэ́ ушта́, зэрьяса (тенёса) Пэ́скирэ вастэ́стыр Мэ учхакирава тут, соб (кай) тэ кэра́в болыбэ́н, и тэ дав зор пхувьякэ, и тэ пхэна́в кэ Сио́но: ‘Ту сан Миро народо.’”

¹⁷ Ушты́, ушты́, ґаздэпэ, Ерусалимо, ту, саво́ выпиян Ра́скирэ-Дэвлэ́скирэ вастэ́стыр тахта́й (чаша) холя́са, ту выпиян тахта́й пибнаса, саво́ матякирэла, выпиян лэс сарэ́са.

¹⁸ На сыс конэ́скэ тэ лыджа́л лэс, сарэ́ чхавэ́ндыр, савэ́ бия́ндынэ лэ́стыр, на сыс конэ́скэ тэ подрикирэ́л пал васт, сарэ́ чхавэ́ндыр, савэ́н ёв барьякирдя.

¹⁹ Явнэ́ кэ ту дуй биды, кон тут потангинэла (пожалинэла): чхучипэн (пустота) и хасякирибэн, бокх и курта́ла; конэса Мэ тут тэ подрикирав?

²⁰ Тырэ́ чхавэ́ ячнэ́ бизорья́кирэ, ёнэ исын паштэ́ пэ сарэ́ вули́цы (га́сы), пхандлэ сыр мирга (серна) дрэ фэлы́ (петля); пэ лэ́ндэ пхэрдия Тырэ́ Ра́скирэ-Дэвлэ́скири холы́; Тырэ́-Дэвлэ́скиро годлыпэн.

²¹ Палдава́, вышу́н дава́, бибахтало́, и мато на моля́тыр (виностыр)!

²² Адя́кэ ракирэ́ла тыро́ Рай Дэвэ́л, и Дэвэ́л тыро́, Саво́ отхала (отдэ́ла палэ) пал Пэ́скиро народо: “Акэ, Мэ ла́ва тырэ́ вастэ́стыр тахта́й (чаша) пибнаса, саво́ матькирэла; рошчына (дрожджы) Мирэ́ тахтастыр холя́са; Ту буты́р одотхы́р на пьеса.

²³ И Мэ да́ва лэс (тахта́й) тырэ́ вэргэ́нгэ, савэ́ тут мэнчынэнас; Мэ да́ва тахта́й дрэ лэ́нгирэ васта́. Мэ да́ва лэс одолэ́нгэ, савэ́ ракирнас: ‘Пэр тырэ́ мо́са, соб (кай) тэ джас пир ту́тэ”, – и думо тыро́ явэ́лас сы́рбы пхув и га́са, соб (кай) тэ джа́н.’”