Isajos 50 - Библия - Пэ Балтитко Романи чиб (Романэс) 2019

Сыр Мэнчынэлапэ Свэ́нто Дэвлэ́скиро

¹ Адя́кэ ракирэ́ла Рай Дэвэ́л: “Кай исын лыл пал дова́, со тумари́ дай розгия́пэ ромэса, кай исын дава́ лыл, савэ́са Мэ отмэкцём ла? И конэ́скэ Мэ бикиндём тумэн? Акэ, бикиндлэ тумэн пал тумарэ́ грэ́хи, пал чорипэ́н тумаро́ сыс отмэкны тумари́ дай.

² Со́скэ на сыс никонэ́с, ко́ли Мэ явавас, и нико́н на отпхэндя́, ке́ли Мэ кхардём? Ци Миро васт буты́р на зракхэ́ла, ци нанэ Ма́ндэ зор, соб (кай) тэ зракхав? Акэ, Мирэ́ страхаса Мэ шутькирава мо́рё (дэрья́в), кэра́ва чхучи́ пхув рэкэндыр (лэнорьендыр); мачхэ́ дрэ лэ́ндэ кирнёна и мэрэ́на, пал-дова́ со нанэ пани́.

³ Мэ учхакирава болыбэ́н калыпнаса и сыр жалобнонэ гонэстыр праскаса Мэ кэра́ва учхакирибэн ваш болыбэ́н.”

⁴ Рай Дэвэ́л дыя́ ма́нгэ чиб годьварэ́ манушэ́ндыр, соб (кай) Мэ лавэ́са тэ подрикирав кодолэ́с, кон буты́р на вырикирэ́ла; тася́рлэс (ра́нэс) Ёв джингавэла Ман, джингавэла кан Миро, соб (кай) Мэ тэ шунав, сыр сыкляибны́тко.

⁵ Рай Дэвэ́л откэрдя Ма́нгэ кан, и Мэ на со́мас проти, Мэ на гиём палэ.

⁶ Мэ отдыём Миро думо, соб (кай) тэ марэ́н Ман; Мирэ́ чама (шчоки), соб (кай) тэ пэкавэн; муй Миро Мэ на закэрдём кошыбнастыр и чунгардыпнастыр.

⁷ И Рай Дэвэ́л дэ́ла васт (помогинэла) Ма́нгэ, палдава́ Мэ на ладжава, палдава́ Мэ рикирава Миро муй сыр бар, и Мэ джино́м (джина́в), со Мэ на ячавапэ ладжакирдо́.

⁸ Пашылэды́р исын одова́, кон пхэнэ́ла чачипэ́н пал Ма́ндэ: кон камэ́ла тэ марэ́лпэ Ма́нца? Тэрдёваса кхэтанэ́! Кон камэ́ла тэ сэндякирэлпэ Ма́нца? Мэк ёв тэ подджа́л кэ Мэ.

⁹ Акэ, Рай Дэвэ́л дэ́ла васт (помогинэла) Ма́нгэ: кон сэндякирэ́ла Ман? Акэ, сарэ́ ёнэ исын, сыр и́дя: пхурьёна, хасёна.

¹⁰ Кон тумэндэр дарэ́ла Ра́стыр-Дэвлэ́стыр, кандэ́ла Лэ́скирэ-Писхарискири (Рабоскири) зан? Кон псирэ́ла дро калыпэ́н (мрако) би дудэскиро (би свэтоскиро), мэк ёв тэ рикирэлпэ Ра́скирэ-Дэвлэ́скирэ лавэ́са, мэк ёв тэ чхувэ́л пэ́скиро ило́ дрэ пэ́скирэ Дэвлэ́стэ.

¹¹ Акэ, сарэ́ тумэ́, кон хачкирэ́ла яг, конэ́стыр джа́на хачкирдэ́ искры сыр марибны́тка бустя́ (стре́лы)! Джа́н дрэ яг и искры тумарэ́ стрелэндыр! Дава́ прилэ́на тумэ́ Мирэ́ вастэ́стыр, дрэ мэ́ньки (биба́хт) тумэ́ хасёна (мэрэ́на).